Malɨkɔ 1

Yɔanɨ ngɨa a꞉tɨɓatisa ɔɓɨakɨɔ Ɨsaʉ yɔ Yeso

(Mat 3:1-12; Luk 3:1-6—15:18; Yɔa 1:19-28)

1-2Ɨsaʉ yɛta Iɗo ngɨyɔ Yeso Klisito, Mwana ɔ Asɔɓɨɨ, ngbanga ndʉ aka ɓa꞉tɛndakɨa-ɔɔ amati ɔ ɨtaɓʉ ngɨyɔ ɨgbɛ Isaya, ya꞉pʉnganɨa ɓɔ:

«Na꞊tʉma sina titima ngɨasɛmɨ apɛɨ asɔɔ,

nɔwɛ akɔtambanakɨa ɨngbaa.

3Iso yɔ titima ngɨananɨ, yatʉɓɨa, mʉsɨna amukengu akɔsugo ɓɔ:

‹Tambanakeni ɨngbaa ngɨyɔ Makwɔɓɨɨ,

yomokeni lingbaa ngɨlɛ lɛta lipingonokie.›»#Popoko Mal 3:1; Isa 42:3

4Titima ɔngɔ a꞉ɓio Yɔanɨ, ngɨa a꞉tɨɓatisa. Ɨyɔ akɛ, a꞉chwɛanɨa amukengu, nɔ, ɔ꞉pʉnga ɓɨakɨa ɓombi ɨsaʉ ɓɔ: «Kweni uɓatiso, akɔpananiso ɓɔ nánecho mʉkyananakɨa ngʉweno nachoni, iɗo ambɔ Asɔɓɨɨ ɨnɨpaakɨa ɓʉɓɨɓɨ ngʉɓeno.» 5Kʉdɔ, ɓombi ɓaɓomu ngʉɓɔ ihoi yɔ Yudɛa, nɔ ʉɓɔ gʉlʉ ɔ Yelusalɛma, ɓɛ꞉ka apɛɨ ɔ Yɔanɨ ga hɨtɔɔ. Ɓɔ꞉pʉnga panjaka ɓʉɓɨɓɨ ngʉɓeɓo aɓʉmba, nɔ, Yɔanɨ ɔ꞉ɓuɓatisa amati ɔ lisini ngɨa ino ɓɔ Yɔlɔdanɨ.

6Ɨpʉkʉ ngɨyɛ Yɔanɨ a꞉ɓio nayɔ ɨpɛnɨɛ, ɓa꞉ɨkɨa nɔ mata kɔ ngamɨa, nɔ, ɔ꞉ɨnamangana nɔ muki wɔ ʉmba wɔ nama aɨɓʉnɨ. Idyo ngɨangɔ, ya꞉ɓio ɓanɛmɛnɛ, ɨhɔ nɔ ɓɛʉ. 7A꞉ɓio akɔɓɨakɨa Ɨsaʉ ɓɔ: «Mombi mʉngana ɛ꞊ka suo ambise asɛmɨ, ɨya, a꞊ɓio nɔ angu nɔgbɛ nɛmɨ anagaaka. Ɨmɨ, nɔkwananɔmʉ pɔ atʉkʉma apɛɨ angɔ, nayɔ aɓoo muki wɔ lɨkpakʉ ngɨlangɔ. 8Ɨmɨ, na꞉nɨɓatiso pɔngɔ amati nɔ mipo, yakamɛngana ɨyɔ, a꞊nɨɓatisa suo tɨa nɔ Mʉtɨma wɔta Tu.»

Sɨtanɨ ɔkanio Yeso ambise ɔ uɓatiso ngʉangɔ

(Mat 3:13-17; Luk 3:21-22)

9Ɓisi mʉngana, Yeso a꞉ngwa anɔ Najalɛtɨ, ɨkʉmbʉ mɛngana amati ɔ ihoi yɔ Galilaya, ɛ꞉ka anɔ Yɔlɔdanɨ aki Yɔanɨ a꞉muɓatisa-ɛɛ. 10Ɨyɛ ndʉ a꞉ɓio tɨa achwɛa amipo, ta gagaa ngɨananɨ, ɛ꞉na ɓisi akɔganananɨa, nɔ Mʉtɨma wɔta Tu anujo akʉʉ angɔ ndʉ anjua. 11Iso mɛngana, yɔ꞉kanɨa akʉʉ ɔ ɓisi ɓɔ: «Ʉwɛ, wa mwana ngɨasɛmɨ ɔ ɓʉkʉnda nɔgbɛ. Na꞉napɨana mʉtɨma ngʉwɔsɛmɨ akʉʉ asɔɔ.»

12Ta gagaa ngɨananɨ, Mʉtɨma wɔta Tu wɔ꞉mʉtʉma Yeso anɨsa amukengu. 13Inani, Yeso a꞉kɨa makwaa ɓatɛkɛɓɛ ɓɔgɨna, nɔ ɓanama ɓɔ iju ɓaɓio kʉ inani. Angbinga muɓomu ngɨananɨ, Sɨtanɨ ɔ꞉mʉkanakio. Kʉdɔ, ɓamalaika ɓɛ꞉ka nayɔ akyananakɨa.

Yeso esoko ɓakpata ɓɔgɨna

(Mat 4:12-17; Luk 4:14-15; 5:1-11)

14Ambise ngɨa ɓa꞉fa-ɔɔ Yɔanɨ aboloko, Yeso ɔ꞉sa anɔ Galilaya, akɔɓɨakɨa ɓombi Ɨsaʉ yɛta Iɗo ngɨa Asɔɓɨɨ. 15A꞉ɓio asugo ɓɔ: «Ngbinga ɔndanɔ tɨa ndananɨ, nɔ Ɓʉngama ngʉɓɔ Asɔɓɨɨ ɓa tɨa tinene, sieni ɓʉɓɨɓɨ ngʉɓeno, nɔ, bayeni Ɨsaʉ yɛta Iɗo.»

16Ɨyɛ ndʉ a꞉ɓio achana amutii wɔ ipuu ngɨyɔ Galilaya, ɔ꞉tɛna tɨa gue mʉngana ino ɓɔ Simoni, ɨɓɔ nɔ manye Andɛlɛa. Ɨɓɔ, anunoko mayia amati ɔ ipuu, dɔ ɓa꞉ɓio ɓombi ngʉɓa ɓafa sipe. 17Ga Yeso naɓɔ ɓɔ: «Anakpateni, dɔ na꞊nɨnatakanakiso nɛmɨ ahatɨa tɨa ɓombi.» 18Ta gagaa ngɨananɨ, ɓɔ꞉sɨa mayia ngɨyeɓo, nɔ, ɓɔ꞉mʉkpata. 19Anɨsɨnganaka mwana ɔngɔ ɗu ɓɔ, ɔ꞉tɛna tɨa atɨ Yakɔɓɔ, mwana ɔ Jɛbɛdayɔ, ɨɓɔ nɔ manye Yɔanɨ. Ɓa꞉ɓio, amati ɔ ɨngbɔɔ, akɔtambanaka mayia ngɨyeɓo. 20Ta gagaa ngiananɨ, Yeso a꞉ɓisoko-ɔɔ, ɓɔ꞉sɨa atɨ ɨsɛ eɓo Jɛbɛdayɔ, ɨhɔ nɔ ɓombi ɓɔ tɛa inani amati ɔ ɨngbɔɔ ga vu, nɔ, ɓɔ꞉pʉnga nayɔ akpata.

Yeso ɔheiso mombi mʉtɨma wɔ idu amati ɔ ɨkáá yɔ nɨta

(Luk 4:31-37)

21Kʉdɔ, ɓa꞉ngwɨa kyɛnda anɨsa anɔ Kapalanaumu. Akɔ ɓisi ɓɔ nuhomuo ngʉɓɔ Ɓayuda, Yeso ɔ꞉kumonio aɨkáá yɔ nɨta ngɨyɔ Ɓayuda, nɔ ɔ꞉pʉnga panɨa. 22Mapanʉ ngʉkangɔ kɔ꞉ɓʉmbangɨa ta mbangɨa, dɔ, mapanʉ kɔngɔ, ka꞉ɓio nɔ angu nɔgbɛ akɔnagaaka ʉka, kɔ ɓapananakɨa ɓɔ mapanʉ. 23Ambenigɔ ɓɔ pe, inani amati ɔ ɨkáá yɔ nɨta ngɨyeɓo, mombi mʉngana a꞉ɓio nɔ mʉtɨma wɔ idu. Ɔ꞉pʉnga nachokoo ɓɔ: 24«Ɨyeso nenu yɔkwa tanɨ, ha Yeso ngɨyɔ Najalɛtɨ-ei! Wɛkɔ-ndɨ nesu adʉka? Isu tanɨmbɨa iɗo ɓɔ, ʉwɛ, wa anɨ. Ʉwɛ, wa mombi ata Tu ngɨyɔ Asɔɓɨɨ.» 25Yakamɛngana, Yeso ɔ꞉nyakɨa mʉtɨma wɔ idu ngʉwɔnanɨ ɓɔ: «Ʉwɛ, gbaa ta gbaa, nɔ, chwɛa amati ɔ mombi ngɨa!» 26Kʉdɔ, mʉtɨma wɔ idu ngʉwɔnanɨ, wɔ꞉mugugumiso mombi ngɨananɨ ɓɔ kpu kpu kpu, wɔ꞉mʉchwɛa, nɔ, nachokoo ɓɔ waa, waa. 27Yaka ngɨyɛnɛnɨ, yɔ꞉ɓʉmbangɨa ɓombi ɓaɓomu, ga ɨɓɔ ɓɔ: «Eeeɓe! Ɨkananja yɔ yaka nga ya ino tanɨ ɨyayɛ? Ya ndʉ ʉpanʉ wɔ angu wɔ ɨtakɨtakɨ! Gue ngɨa anyakɨa kʉ nɔ mɨtɨma yɔ madu, nɔ yɔmʉkumo ta kumo!» 28Pɔ gbalakɨa, awɨa ngɨyɔ Yeso ɔ꞉pʉnga nʉndanaka alindu lɔ Galilaya liɓomu.

Yeso ɔheiso inyenguu yɔ Simoni

29Ɨyɛ ndʉ atɨ Yeso ɓa꞉chwɛa ananɨ aɨkáá yɔ nɨta, ɨɓɔ nɔ atɨ Yakɔɓɔ nɔ Yɔanɨ, ɓɔ꞉sa tɨa atɨ Simoni nɔ Andɛlɛa. 30Inani, ɓɔ꞉tɔgbʉka ndʉtʉ yɔgbʉndanieni inyenguu yɔ Simoni nɔ kaɓu, ɨyɔ tɨta ɓakwaɛ. Yeso a꞉ɓɔya ta ɓɔya ɓɔ, ɓɔ꞉pʉnga nayɔ aninjo ɨsaʉ yɔ kaɓu. 31Kʉdɔ, Yeso ɔ꞉mɨsɨnganɨa, ɔ꞉mʉpoto ɨkɔndɔ, nɔ, ɔ꞉mimaiso ga gba. Ndʉtʉ yɔ꞉mʉkataka nɔ ɔ꞉pʉnga naɓɔ akyananakɨa.

Yeso ɔheiso ɓombi ɓɔ ɓakaɓu ɓaja

32Tɨa nɛpasɨ yɔngɔ, ɨyɛ ɨpá ya꞉kwa nayɔ ɓanɨ, ɓombi ɓɔ꞉mɨkɨa Yeso nɔ ɓombi ɓɔ ɓakaɓu ɓaɓomu, nɔ ʉɓa ɓɔmɔ mɨtɨma yɔ madu yaɓʉjɛnganakiso. 33Ɓombi ɓɔ gʉlʉ ngɨananɨ ɓaɓomu, ɓɛ꞉ka agbuchonokio tɨta ananɨ anambamba ɔ umongu wɔ ɨkáá ngɨyɛnɛnɨ ɓɔ kyɔ kyɔ kyɔ. 34Kʉdɔ, a꞉heiso ɓombi ɓɔ ɓakaɓu di di di, nɔ chwɛiso mɨtɨma yɔ madu ɨja. Yakamɛngana, ɔ꞉gbɛma madu ɓɔ katɨsamʉamʉ pɔ samʉa, dɔ, ɓa꞉ɓio anɨmbɨa iɗo ɓɔ ɨyɔ Yeso, anɨ.

Yeso ɔɓɨakɨɔ Ɨsaʉ yɛta Iɗo anɔ Galilaya

35Nekuɓa yɔngɔ nɔ igbandindi, umomo sɨ ta kʉɔ, Yeso ɔ꞉chwɛa aɓei, nɔ, ɔ꞉sa anɨta Asɔɓɨɨ akɔ ʉmʉa ngʉwa ɓombi ɓangɔmʉ-ɛɛ. 36Ambise ɔngɔ bele, atɨ Simoni, ɨhɔ nɔ ɓombi ngʉɓa ɓa꞉ɓio naɓɔ, ɓɔ꞉sa nayɔ ahata. 37Ndʉ ɓa꞉mɨna, ga ɨɓɔ nayɔ ɓɔ: «Ɓombi ɓaɓomu ɓanɔwɛ ahata tɨta hata!» 38Yakamɛngana, Yeso ɔ꞉ɓutosio ɓɔ: «Tiseni aki tabi-ɛɛ, alɨkʉmbʉ ngɨlɛ la tinetine aka! Yɔkwananɔ ɓɔ nɨɓɨakɨa Ɨsaʉ inani kʉ ɓɨakɨa, nɛ꞉kɔ ɨyanɨ akɔ yaka ngɨyɛnɛnɨ.» 39Kʉdɔ, ɔ꞉chanaka amati ɔ ihoi iɓomu yɔ Galilaya, akɔpanɨa amati ɔ lɨkáá lɔ nɨta ngɨlɔ Ɓayuda, nɔ chwɛiso ɓombi mɨtɨma yɔ madu.

Yeso ɔheiso mombi ɔ keɓukeɓu

40Ɓisi mʉngana, keɓukeɓu mʉngana a꞉mɨsɨnganɨa, ɔ꞉kwa nɔ mawu apɛɨ angɔ ga kpru, nɔ, ɔ꞉mʉndɨanɨa ɓɔ: «Hii aba, wɔkʉndeni, wa ta adaa ngɨa wanagyaɓaka-ɔɔ nɔ kaɓu ngɨa gyaɓakanɨ» 41Kʉdɔ, Yeso ɔ꞉mɨnɨa ikoko, ɔ꞉yomo ɨkɔndɔ, nɔ, ɔ꞉mʉɓoto. Ɔ꞉musigio ɓɔ: «Ii, nɔbáyɔ bayanɨ, gyaɓanakɨa!» 42Ta gagaa ngɨananɨ, keɓukeɓu ɔ꞉mʉngwa ga ngwa, nɔ, ɔ꞉gyaɓanakɨa. 43Yakamɛngana, Yeso ɔ꞉mutoiso gbɛgbɛ ta ananɨ, nɔ, ɔ꞉goniso nɔgbɛ, 44nayɔ asigio ɓɔ: «Kanganɨa iɗo, watɨɓɨamʉ mombi pɔ mʉngana yaka ngɨyɛnɛnɨ. Yakamɛngana, sa apanana apɛɨ ɔ kumukumu. Nɔ, wenjo mutebii ngʉwɔ mʉgyaɓa, ngbanga ndʉ mapanʉ kɔ Musa ka꞉sugo. Ɨyɛnɛnɨ yapananiso aɓʉmba ɓɔ wɔhɛyɔ hɛyanɨ.» 45Yakamɛngana, ɨyɔ mombi ngɨananɨ ɔ꞉sa ɨyɔ tɨta apanjaka, nɔ, nʉngaka ɨsaʉ ngɨyɛnɛnɨ ʉmʉa uɓomu. Kʉdɔ, Yeso a꞉ɓio tii ɓata adaa ngɨa akumonio-ɔɔ amati gʉlʉ aɓʉmba. Nɔ, ɔ꞉ɓio tɨta akɔ ɨda ngɨyɛ mombi angɔmʉ-ɛɛ. Ɓombi ɓɔ꞉sa nayɔ anijeyo tɨta inani, anɨngwa alɨda di di di.

Currently Selected:

Malɨkɔ 1: buuN

Highlight

Copy

Compare