Cibraan 2

Garger xinaanamkohi asuuso

1Amaydo, tamaa noobbeh nanemko nacrhiyek, meceetih macalsinno nolle tane. 2Tamaa malaykut warroyshen farto thummut tekkeh, umbuka sercat-gidlo hido am-izzize wayaanam farhshiisha firde geytek sarrah, 3nanu tayidhdha naba garger xinnemko, aaginah nassaaco dhicna? Ta garger erherhih Maddari warroysheya, tamaa kaa yoobbe marahi araxah noh caddoyteh tine. 4Yalli gantah lel shaahid yekkeyaako ishaarar, barhsime bexsishsham kee Quddus kin Ufayehi muttuxuwah ishi farhi balih keleh yane.

Ni garger hi dhisheena

5Tamaa tamaato le caalam nanu adde waanishnaya, Yalli malaykutuh akah tangizziyeekah maki abeh yanem. 6Wulidde kaa zacabah:

# Zaabur 8:4-6 “Atu adde taxeesebe gedda, xiyawti aymotta kinni,

hido akah xaaliitto, xiyawti barhi aymotta kinni?

7Dago geddah malaykutko kaa tuscundhuwe;

nabne kee xishmah lel bor kaa sarishshe,

8ummannim akah tangazzawo lel kaa ibahi geridde hayte” yerhxiinih akah yishhidiinih yanin.

Kado ummanim ishi giz-atadde hayeyaako, ishi giz-atko irolle walaa inketta mixabinna. Kado laakin, ummanim kayyah angizzuuk kaddih nubleh minane. 9Laakin tamaa malaykutko dago geddah yucundhuweh yine Yeesus, rabih waaxelta yublemhi sabbatah, kado nabne kee xishmah bor kaa sarisheh ablinuk nane. Tayim lel Yallih nicmah umman tiyah arhxuk rabaako dhacameh yanemhi sabbatah kinni.

10Mango dhaylo nabnelle baaho ciloh, Yalli tamaa ummanim kayyah kee kaa araxah akko tunkhulluqheh taneti, tamaa ten garger hi dhisheenak waaxelti araxah naqhuse hinya akko abam akah eedak tine. 11Amayim lel tamaa yayqiddise tiya kee yanqiddise mara inkikkeeko kinoonimhi sabbatah kinni. Amaymih kinni lel “yi saculo” yerhxeh akah deecimo xoolashshiite wayem. 12Tayim lel akko yerhxe:

# Zaabur 22:22 “Inni saculuh ku migac hi zacabah akah warisho kiyo;

ku migac hi faylah lel akotti fanadde qannisho kiyo.”

13Malammih lel:

# Isayas 8:17-18 “Anu kayyadde imaan abito kiyo” yerhxe.

Gaxisheh lel:

“Taykinna, yotta kee Yalli yoh yoxoye cindham” yerhxe.

14Amaydo, tamaa kaa cindham xazo kee biilo le mara yekkiinik sarrah, usuk lel isheh amayim balih tenim beye; amayim lel ishi rabih tamaa rabit xayla le ibliis yaylawo ciloh kinni. 15Tamaa rabit mashshih sinni cumre inkoh garuuzinnah yumudhdhuweh yine mara yayyaaco ciloh kinni. 16#Isayas 41:8-9Thummutuh lel usuk xatam malaykut makiiki, Abraahim zara kinni xatam. 17Amaydo, raxmatta-le kee umun kin naba shekh Yalla yakhdumeya yakko kee xiyawah zambi-kalaa yakko, ummanimih ishi saculuh yammangado kaalle tine. 18Amayim lel usuk isheh cakanadde saye gedda waaxelta yublemhi sabbatah, tamaa cakanadde saya mara xato dhiica.

Currently Selected:

Cibraan 2: SCC

Highlight

Copy

Compare