2 Timoteyos 2
2
Masiix kin Yeesus mece caskarto
1Amaydo atu, yi barhaw, Masiix kin Yeesus araxah geytimta nicmadde isrii. 2Tamaa mango shohodah nifille atu yottaako toobbem, garo taydaraso dhicta umunaat kin maralle amaanah uxuu. 3Masiix kin Yeesus mece caskarto tekkeh lel waaxelta yottaalih xazziilit. 4Caskarto kin tiyahi bursaale tamaa kaa yisciskire tiya xedenisho kinamhi sabbatah, shacabti nabradde mixungugguubuwa. 5Yammokookometi lel tamaa obsa balih ammookome wayemko, ashshowaati bor migeya. 6Orobe ilawko afti gide kabbaato missilti, tamaa xawaleena kin xarastaa kinni. 7Maddari ummanimhi fahaama koh yaxaw kinamhi sabbatah, anu kok arhxuk aniyomudde adde exeeseb.
8Tamaa anu warroysha mece waredde akah warroysheekah, Dawud zara kin, rabaako ugute Yeesus Masiix xunsus. 9Ta mece warehi sabbatah kinni lel cagab-wanna balih umudhdhuweh, cazaab abliyuk anem. Yallih waanitta laakin maamadhdhayinna. 10Amaydo, tamaa doorime mari, Masiix kin Yeesus araxah umman geedit nabneelih garger geyoona ciloh ummanim curak aniyo. 11Ta marhxo rumma kinni:
Kaalih rabneh nekkemko,
kaalih gantah marno kino;
12 #
Maatiyos 10:33; Luukas 12:9 Curnemko,
kaalih gantah nangaso kino;
kaa xinnemko,
usuk gantah ni xino kinni;
13umunaat akke waynemko,
usuk umunuk raaca,
amayim lel usuk ishe xino mirhiicamhi sabbatah kinni.
Yalli akah yishhide khaddaam
14Tamaa yaabbe mara bisa taylaye, amficinnixe waanih zacabah yankeexediinimko, Yallih nifille ten asussak, tayim ten xunsus. 15Rummi waanitta araxah yabbirheh, akah xoolashshiitam hin tiya kee akah yishhidin khaddaam balih, Yallah ishe akah taxayeekah ab. 16Tamaa diin hin marih tharhqamqamko mirix-erhex. Amayim lel tayim ziyaada Yallih mashshih waytolle ten beyto kinamhi sabbatah kinni. 17Ten waani lel urinnixe biyaake balih faax-tarhxo kinni. Ten fanadde lel Himenayos kee Fileetos geytiman. 18Usun rummaako yicrhiyiinih: “Rabaakohi ugut mece geddaakoh yekkeh yane” arhxuk, xiyawko garohi imaan wahanak yanin. 19#Cadad 16:5Yisbite Yallih masarrat laakin maxtam yooqhoceyaako: “Maddari tamaa kaa mara kin xiyaw yaarhige”, amayim balih: “Inkoh Maddari migacah deecima mari umaaniiko mirix-yarhxoonaa” yarhxe.
20Naba caredde dahab kee fiddaako siraaxime nuwaa bisa akkekkah, boxo kee kallaako siraaximtem gantah yane. Tayimko gari naba nafaacadde, gari lel cindha nafaacadde asa. 21Amaydo, akkinnanti tayimko ishe yiytsitstsiyemko, naba nafaacadde asa nuwatta yakko kinni, quddus yakkeh lel ulah obsima, cari wannahi nafaacadde asah lel, umbuka mece abittoh yinqirribe tiya yakke.
22Amaydo, gufayinni farhiiko kudaaki, tamaa tsitstsii afcaado le mari Maddarah deecimayaalih, xaqqe, imaan, kaxano kee salaam katattaa. 23Zagaxa katayishsham akko taarhige duudiino kee amficinnixe ankaaxadko mirix akko erhex. 24Maddari garuzzo kinti, zuggux yakko kaalle mitaneeki, umman tiyaalih mece tiya, yaydaraso dhiica tiya, sabreelih umaani curo dhiica tiya, 25kaa didde kin mara xeelaatih yadabbo dhiica tiya yakko kaalle tane. Yalli rumma yaarhagoona ciloh, tooba akah axaye le. 26Usun lel kaa farhi aboona ciloh, ten tibbirheh tine ibliis machchawaadiyaako kudeenih sinni afcaadolle gaxoona kinon.
Currently Selected:
2 Timoteyos 2: SCC
Highlight
Copy
Compare
Share
Want to have your highlights saved across all your devices? Sign up or sign in
©2024 Wycliffe Ethiopia
