1 Timoteyos 5
5
Santo kaniisah
1Xiyawti daacayna maskaalafinaaki, kayya abba balih ubul, burguude lel sacul balih aydukumus. 2Naba sayyo inon balih, cindha sayto lel sacoola balih umbuka tsitstsaylih aydukumus.
3Rummah gubon kin gubon xishmat. 4Akkinnan gubna laakin, cindham hido abuusa teellemko, usun yookomiinih sinni xawaz Yallih mashshih akah gerhaanaakah ten yaybulluynim labcaadoonaa. Tayim Yallih intidde mecem kinamhi sabbatah, sinni dhaltoyyah akah yafdawna kinni. 5Rummaahit gubna inkettäk racteya, Yalladde cag abittah, tibbirhekkeeko bar kee lellecih dhaaco kee salaat abitta. 6Tamaa ishe kixin tiyä laakin, tane hanuk rabte tiyä kinni. 7Cadale hinam yakkoona ciloh, taymih ten eemer. 8Akkinnanti ishelle dhaye marah, fertoh lel ishi xawazah takkem abe wayemko, usuk imaan yithlimeh yane, aamininnixe tiyaako lel uma.
9Akkinnan gubna laxtamko aganalle tekkeh, inki baclih numa kuuk tineh yekkemko tankattaboo. 10Ishe mece abittotuh tamidhdhige tiyä, cindham carishshe tiyä, gerha kabbatte tiyä, yinqiddise marahi iba wadishshe tiyä, biyaakite mara baclayishshe tiyä, umbuka mece abittoh lel ishe tillaabishshe tiyä tekkemko, xatan maradde gaxtoo. 11Tamaa cindha gubon laakin, ten farhi adde uguttah Masiixko mirix ten ishsha gedda, marcishimoona farhaanamhi sabbatah, xatan maraalih ten mihayin. 12Tamari tamaa erhedhdhot sinni amaana yithlimiinimhi sabbatah Yallih cadale sinnelle oobishan. 13Tayimhi osah lel, careeko careh aduuk bohsa kinni labcaadaanam; bohsa bisa makiiki lel, waanishoona eedinnixoonim waanishaanah, xamiteenit kee ten farhshiishinnixemidde saya mara gantah yakkin. 14Amaydo, cangi akah waatimo caashir wayo ciloh, tamaa cindha gubon marcishimeenih, dhaloona kee sinni xawazhi zan abitaanam farhe dhaarhe. 15Gari mece geddaako arax xabeenih Sheethan kataak yanin. 16Akkinnan taamine numa teyalle dhaye gubon teellemko, ten baclayishshoo. Tamaa kaniisa rummah gubon kin mara xatto ciloh, usun cuuka alle akke wayoonaa.
17Tamaa meceetih yaxkume kaniisat naba marah, fertoh lel warroyishnan kee aydarasah xawala marah, xishma kee casbi akah eeda. 18#Gabbaacime Sercat 25:4; Maatiyos 10:10; Luukas 10:7Amayim lel Kutuub: “Beceeri yaskiyyide gedda af akko tarhawo kolle mitane”, amayim lel “Yakhdumeti ishi casbe geyo akah eedda” yarhxemhi sabbatah kinni. 19#Gabbaacime Sercat 17:6; 19:15Lamma hido adooxa shaahid alle geytimeenih akke wayemko, kaniisat naba tiyalle yakke kisse mikabbaatin. 20Tamaa zambe aba mara yekkemko, aki xiyaw mashshiitoona ciloh, umbuka marahi afalle ten oskoolof. 21Barhsa kee gunco abekkah, tayim katattayto Yalla, Masiix kin Yeesus kee doorime malaykutti nifille ku asuusak ane. 22Akkinnan tiyalle gaba hayaanamah mammaakamin, aki marahi zambedde managali. Ishi tsitstsaye dhawurh.
23Ishi garba kee tamaa kodde gaxangaaxa laxuuh arhxituk, dago wayni ucub kibah, kamboh laye bisa maacabin.
24Xiyawko garih zambi mudhdhug kinam kinni, firde fanah lel nifidde akko aduuk yane, aki marahi zambi laakin sarrah yambulluwe. 25Amayim balih lel, mece abittot mudhdhug kinni, mudhdhug akkinnixem lel, sucuteh raaco mirhiica.
Currently Selected:
1 Timoteyos 5: SCC
Highlight
Copy
Compare
Share
Want to have your highlights saved across all your devices? Sign up or sign in
©2024 Wycliffe Ethiopia
