Mika 6
6
Hoy o Devel peskre menshendar kamella
1Shounenn, hoy penell o baro Devel ap o Israel:
Ste pre, oun an tiro koova glan!
Oun mouk i bare oun tikne berge tiro rakepen te shounell!
2Shounenn t'mer phoure berge,
ap kolende i phoub tardo hi!
Denn yak,
hoy hounte penell o baro Devel peskre menshenge.
Yob rakrell o čačepen vin pral peskre menshende,
oun penell i Israelenge, kay kova, hoy le kran, gar mishto hi.
3Hoy krom t'menge, mire menshe?
Čivom i phari boudi ap t'mende?
Penenn les mange!
4Me hom kova,
kay anas t'men dran o them Egiptia vin,
kay hans pandle boudepangre.
Me dom t'men o Mose, o Aron oun i Miryam,
te djan le glan t'mende.
5T'mer mire menshe,
moukenn t'menge an o shero te vell,
hoy kamas o Balak
– ko baro ray pral o them Moab –
t'menge te krell,
oun hoy penas leske o Bileam,
koleskro dad o Beor his!
Moukenn t'menge an o shero te vell,
har djan t'mare phoure pral vergel o pani Yordan
ap lengro drom dran Shittim doureder an Gilgal.
Palle hayvenn t'mer, havo boud lačepen t'menge krom.
6T'mer poučenn: Har te vap glan o baro Debleste?
Hoy te anap ko pralstouno Debleske?
Har nay mangau les an?
Anap leske groumya, hoy yek bersh phouro hi,
te venn le leske maredo oun tseles rhačedo?
7Hi o baro Devel barhtelo pral boud zerya bakre,
oun deesh zerya khore djet?
Hounte dap leske miro phoureder čaves,
te vell miri doosh krik lino
oun ko čilačo koova, hoy krom?
8Na-a, o baro Devel penas menge,
hoy lačo hi,
oun hoy lo mendar kamella:
Kova hi: Rike tout ap o čačepen,
ab lačes ap o vavareste,
oun dja o tselo djiyestar tiro Debleha!
Rhorhepen an o foro Yerusalem
9Shounenn, hoy dell o baro Devel gole pral o foro Yerusalem!
– Koon gosevo hi, kova lell leskre laba ap o dji!
Shounenn, t'mer menshe, kay venn khetne an o foro!#6:9 Kal hebretikre laba hi phares te hayvell. Ko yek hayvell len yaake, ko vavar yaake.
10An i khera i čilačendar hi bravlepen,
hoy kolla rhorhepah khetne anan.
Te bikrenn oun ginenn le čomone,
lenn le i piri, hoy tikneder hi har li hounte vals.
Savo koova hi djoungeles glan mande.
11Lengri vaga oun kol barra koy pre
sikrenn gar o čačo pharepen.
Savo koova nay bistrau me gar.
12I bravele an o foro
lenn i čorvelen vin,
oun rikrenn len tele.
Oun t'mer halauter an o foro
han rhorhene oun rakrenn rhorhepen.
13T'mer lan boud doosh ap t'mende.
Doleske dau t'men t'mari phagi,
oun krau t'maro foro paash.
14Te rhan t'mer čomone,
venn gar čalo.
Oun kova, hoy t'mer t'menge ap i rig čivenn,
nay rikrenn gar.
Kova, hoy t'menge ačas,
krau paash an o kourepen.
15T'mer čivenn djob an i phoub,
oun nay anenn kek nevo djob dren.
T'mer krenn djet dran i djeteskre drake,
oun nay makenn t'men gar leha dren.
T'mer krenn mool,
oun nay piyenn lat gar.
16Ko čilačo koova, hoy kol raya, o Omri oun o Ahab, t'menge glan kran,
kova kran t'mer ninna.
Oun hoy yon penan,
kova kran t'mer ninna.
Doleske krau me dran t'maro foro i moulo foro.
Oun pral t'mende, kay kote djivenn,
san i vavar menshe.
Bari ladj vell pral t'mende.
Currently Selected:
Mika 6: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
