2. Mose 31
31
O baro Devel rodell i boudepangren vin, kay krenn peskro plarhteno kheer
1Oun o baro Devel rakras o Moseha oun penas: 2Shoun, me rodom yekes vin, te krell lo kay boudi mange. Kova hi o Bezalel. Leskro dad hi o Ouri. Koleskro dad his o Hour dran o kheer Youda.
3Me čivom miro dourho an leste, oun dom les gosvepen oun vasta, hoy hayvenn mishto te boudrell, 4te nay krell lo shoukar koova dran sonakay, roup oun lolo saster. 5Ninna hayvell lo kouč barra te činell oun an goustria te čivell. Ninna nay dell lo shoukar koova vin čourye dran kasht, yaake te nay krell lo haki boudi.
6Shoun, me rodom ninna i vavares vin, te djal lo leske pash o vast. Kova hi o Oholiab. Leskro dad hi o Ahisamak, dran o kheer Dan. Lentsa boudrenn hake vavar, kay hayvenn mishto lengre vastentsa te boudrell. Lenge dom me o gosvepen an o dji, te krenn le lauter yaake, har me touke penom:
7O Debleskro plarhteno kheer, o morhton, kay o Debleskre deesh laba dren hi, o pralstouno kotar koy pre, hoy sikrella, kay o Devel lačo ap peskre menshende hi, ninna o tselo vavar koova, hoy an o kheer vell: 8i rhapaskri oun lauter, hoy pre hi, i sonakaskri momelengri oun lauter, hoy pashel hi, o Debleskro sonakaskro bob, kay kouč soungepaskro koova pre rhačedo vella, 9koy sasterni rhačepaskri#31:9 sasterni rhačepaskri: sasterno altaro , kay i firhe o Debleske rhačedo venna, oun ko tselo koova, hoy pashel hi, oun o thopaskro čaro oun koleskre herya; 10ninna kol rashayeskre koola, hoy o Aron oun leskre čave rivenna pash pengri boudi an o Debleskro kheer; 11ninna ko makepaskro djet, hoy ap kova maklo vell, hoy o Debleske hi; oun ko kouč soungepaskro koova, hoy rhačedo vella an o Debleskro kheer. Kova lauter krenn le yaake, har me les touke penom.
Rikrenn o Debleskro dives!
12Oun o baro Devel rakras o Moseha oun penas: 13Pen ap i tsele Israelitarya: Rikrenn o Debleskro dives#31:13 Debleskro dives, ap hebretikes: Sabbat t'menge! Kova sikrell t'men, kay me t'maro Devel hom, oun t'mer mire menshe han an hako tsiro. Kova hi t'menge oun t'mare čavenge oun lauterenge, kay pal t'mende venna, te dikenn t'mer, te rodom me, o baro Devel, t'men vin, te venn mire menshe.
14Rikrenn o Debleskro dives t'menge! Koon les gar rikrella, vell temerl dino. Ava, hakeno, hoy ap o Debleskro dives boudrella, hounte djivell bouder gar mank peskre menshende. 15Shob divessa boudress tou. O eftato dives kress tou či. Ko dives hi o baro Debleske. Kova, kay boudrella, vell moulo dino. 16Doleske hounte rikrenn i Israelitarya o Debleskro dives hako tsiro, yon oun lengre čave oun lauter, kay pal lende venna, yaake har krom me kova lentsa vin. 17O Debleskro dives hi i sikepen mange oun mire menshenge, i Israelitarya, hoy hako tsiro ačella. An shob divessa kras o baro Devel o bolepen oun i phoub. Oun o eftato dives kras yob či oun las nevi zoor.
18Oun har o baro Devel kova lauter ap o Mose rakras ap i berga Sinay, das yob les i douy barra, kay o Debleskre deesh laba dren činlo hi. O Devel činas len peskro goushteha dren.
Currently Selected:
2. Mose 31: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
