Efesios 1
1
1O Pablo, apostol e Jesukristoko pala e volia e Devleki, del salami gole llenenge kai si katar o foro santo kai si ando Efeso kai pachan ta si ande iek ttan e Kristoia. 2O Del kai si amaro Dad ta amaro Gazda o Jesukristo, te ttovel pe tumende po volipe ta pi pas.
O Pablo blagosil e Devle pala o braduipe
3Blagosime te avel o Del kai si o Dad amare Gazdako o Jesukristo, soke ando Kristo blagosisarda amen ando miloso katar sa o blagosipe duoko. 4O Del esvirisarda amen ando Kristo mai anglal te cherel e ppuv, te sai ava sante ta bi dosake angla le pala po volipe. 5Vou chinadaia amenge te lel amen sargo pe chaurren pala o Jesukristo, soke gia chinadale ande po volipe. 6O Del cherda sa gava te sai blagosi le pala po baro volipe, ta blagosisarda amen pala po chaurro kai volil. 7Ando Kristo, fala katar leko rat kai perada, si amen braduipe ta o prostipe katar o bilachipe. Soke o Del bariarda pe amende po baro barvalipe volimako, 8ta dia amen te achara ta i dia amen baro bizaipe, 9ta dia amen te pinllara so saia gurudino katar leki volia, katar so vou mangel te cherel. Vou ande po volipe mangla te cheren ando Kristo gaia volia. 10Kana ka avel o vreme ka cherel so vou mangel ta ka chidel sa e ezgode katar o miloso ta i katar e ppuv, ta angla lende ka ttovel e Kristo te gazdaril.
11Ando Kristo o Del esvirisarda amen mai anglal te sai avel amen leko barvalipe,#Dt 7.6; 32.9; Rm 8.17; Gl 3.29; Efs 1.14,18. gia sar manglale isto o Del ta sa so cherel, cherel le sar vou mangel. 12Ta vou mangla mai anglal amen te ttova amaro pachape ando Kristo, te sai saurre blagosi leki zor e bari. 13Ta fala e Kristoke, i tumen asunden e orba chachuni, katar e lachi viasta katar leko braduipe, ta tumen lien gava pachape, ta i lien o Santo Duo kai ppendaia kai ka del tumen.#Lk 24.49; Jn 14.26; Apost 1.4; 2.33. 14O Duo kai lien si te llanen kai o alau kai o Del dia tumen ka cherel le kana ka braduil sa e llenen kai sam katar leko foro, te sai saurre blagosi leki zor e bari.
O Pablo molilpe pala e llene kai pachan
15Goleke, sar me llanau kai si tumen pachape ando Gazda o Jesus ta si tumen volipe pala sa o foro santo, 16ni achau te dau fala e Devle cheres tumende, ta dau man golli tumendar kana moliuman. 17Mangau katar o Del amare Gazdako o Jesukristo, o Dad o baro, te del tumen po Duo te sai aven bizai, te sai pinllaren le chachimaia. 18Mangau e Devletar te putarel tumaro mislo te sai llanen savo si o braduipe kai sen ikkarde, gia baro si o barvalipe kai ka del o Del pe foro kai si santo. 19Ta gia bari si leki zor kai radil ande amende kai pacha. Gaia zor si isto goia kai o Del sikadaia bare zoriaia 20kana vazdia e Jesuse katar o meripe ta cherda le te besel pe pi rig e chachi ando miloso, 21ta ttoda le upral pe suako zor, pe suako gazdaripe,#Efs 6.12. pe suako birovi duonengo, ta pe suako anau kai sai ppendol pe gaia ppuv ta i pe o goia e nevi ppuv kai si te avel. 22Ttoda sa e ezgode telal tala e porrne e Kristoke ta ttoda le te avel o soro e kkanllirako. 23Soke e kkanlliri si e esnaga e Kristoki, ta letar lel sa so trubul la, soke o Kristo si kai pperel la katar sa so trubul la, ta e kkanlliri achel pperdi.
Currently Selected:
Efesios 1: ROM07
Highlight
Share
Copy
Want to have your highlights saved across all your devices? Sign up or sign in
Nuevo Testamento en Romané © Sociedad Bíblica Chilena, 2007.