TARHA" AGYI 1
1
Yuda yo' Simun Byumyu" Kung: wigi Adonibezeg ri Myheig Yu da" Khyoo:
1Yoshu shid: byug thang: Israela byumyu" yigi Aseing ri «Ngoonu" mo kha: byumyu" kung: yi shi" Khanan byumyu" yiri yhe: zain: wa la"» ga: myid: ago".
2 Aseing gi «Yuda byumyu" kung: yi xang: shi" yhi: wa zi nghoid. Mung" ri vhoeb wa shid re" ngoo nyangnu" lo, moo byid: wa» ga: tid da:.
3Yuda kung: bang: gi Simun kung: bang: ri «Ngoonu" ri kho' byid: to" da" mougmyid khyoo: ngoonu" yo' dage" yhi: goo" shang. Houg: lho: Khanan byumyu" yiri ngoonu" dage" gyi zain: wa zi nghoid. Hau: thang: ngoonu" we' nanu" ri kho' byid: to" da" mougmyid khyoo: nanu" yo' dage" yhi: wa zi nghoid» ga: tid. Houg: yoomo Simun kung: bang: yo' 4Yuda kung: bang: gi gyi dage" yhe: khaid ago". Aseing gi nyangnu" ri Khanan byu yiri yo' Perizi byu yiri oung: pyam nhang: da:. Houg: lho: nyangnu" gi Bezeg moo byu damoin ri khaid oung: pyam da:. 5Nyangnu" houg: moo Adonibezeg ri shau" myang boem yoomo nyang: ri khaid zain: boem ago". 6Nyang: gi tang" phang: lo" da:. Nghoid loug we' nyangnu" gi nyang: ri cang khaid lho: shoug" myheig yu ziyo' nya: lo, moo" cam" yo' khyid: moo" cam" joem ri phyed pyam byid: ago". 7Adonibezeg gi «Khyid: moo" cam" lo, moo" cam" joem ri phyed pyam byid: shau" boem da" khokham nyhed xi: yug gi nga" zoobui" gyid" mo zooshoin: ri cang koid: zo: ago". Akhid" Mangsoo gi ngoo nyangnu" ri koid lo khyo" ngoo ri we' koid abye:» ga: tid da:. Nyang: gi Yerusalem khyoo: shu" loo" shau" wigi houg: moo shid: byug bye:.
Yuda Byumyu" Kung: yi Yerusalem yo' Hebron ri Oung: Pyam Da" Khyoo:
8Yuda kung mo bang: gi Yerusalem ri gyi yhe: zain: wigi hau: ziri oung: yu pyam ago". Nyangnu" gi hau: voobyu yiri said pyam lho: voomoo" ri myi: nghe' pyam da:. 9Hau: thang: nyangnu" gi boem moug: moo boem khyid: moo mougpyi: shoid mo moug: kyug moo nyid boem da" Khanan byu yiri gyi zain: wa yhe: lo" ago". 10Nyangnu" gi Kiriad Arba ga: lhung tid da" Hebron voomoo" moo nyid boem da" Khanan byu yiri gyi yhe: zain: ago". Hougmoo: nyangnu" gi Sheshai- Ahiman- Talamai kung: yiri oung: pyam ago".
Othniela gi Debira Voomoo" ri Khaid Oung: Pyam Khyoo:
(Yos 15:13-19)
11Hougmo Yuda byumyu" yigi hau: ayo, ri Kiriad Sephera ga: myheing da" Dabira voomoo" ri gyi yhe: zain: ago". 12Nyangnu" mo Khaleb ga: su: gi «Kiriad Sephera voomoo" ri khaid oung: su: ri nga" myiyi: zoo: Agsa ri byid: zhoo" wa» ga: tid da:. 13Khaleb da" nya: nhung" Kenaza da" nya: yuggi zoo: Othniela gi hau: voomoo" ri khaid oung: yu bye: da:. Houg: yoomo Khaleb gi nya: myiyi: zoo: Agsa ri nyang: ri byid: zho" da:. 14Othniela gi lo, xo' da" bidnyid moo nya: phoo ri yoo dakhyang" mho' wa shid re" Agsa ri tid da:. Agsa gi nya: loo zei: dang moo gyo" wigi Khaleb gi nyang: ri civho:» ga: myid: da:. 15Nyang: gi «Ngoo gyid thu thoem" dayham" ri vho:. Nang ngoo ri byid: to" da" mougmyid gi moug: kyug danghoid da» ga: phug tid da:. Houg: yoomo Khaleb gi tho' mo gyid bug yo' vhoo: mo gyid bug ri byid: da:.
Yuda yo' Benyamin Kung: yi da" Oung: Doid Khyoo: Joem
16Moshe da" yug phoo Keni da" amyed ashen" yigi thab gam voomoo" Yerikho mo Yuda byumyu" yi yo' dage" Yuda mung" khoug: mo Arad mougpyi: shoid dain" pyoid yoo khyoo: cang yhe: lo" da:. Nyangnu" gi Amaleg byu yi phung: moo yhe: de: nyid boem. 17Yuda kung: yigi Simun kung: bang: yo' dage" cang yhe: wigi Zephad voomoo" moo nyid boem da" Khanan byu yiri dage" yhe: khaid oung: pyam ago". Nyangnu" gi voomoo" ri nheing" pyam ziyo' phyo' shoin' pyam wigi hau: ziri Horma ga: myheing pyam ago". 18-19Aseing Yuda kung: yiri pang" thoug byid: wigi nyangnu" gi boem moug: ri yo" seing: yu ago". Nghoid loug we' nyangnu" Gaza- Ashkelon- Ekron yo' lheing khoem mo mougmyid joem rigi ayo" khaid oung: pyam nghoid ago". Gyid yam cang nyid boem da" byumyu" yigi joto' gyi myang: rheing" yo" boem wigi Yuda byu yigi nyangnu" ri ayo" khaid thu pyam nghoid da:. 20Moshe amyeing" byid: to" ziyo' dakhyo" Khaleb ri Hebron voomoo" byid: ago". Nyang: gi Anag da" amyed ashen yi mo nghoid da" byumyu" kung: soem" kung: ri hau: voomoo" mo khaid thu pyam yug nghoid. 21Nghoid loug we' Benyamin kung: yigi Yerusalem moo nyid boem da" Yebusi byu yiri akhaid thu pyam nghoid ago". Hau: ayo, mo zi Yebusi byumyu" yigi Benyamin kung: yi yo' dage" xo' nyid lo" boem ago".
Ephrim Kung: yo' Manashe Kung: Bang: Bethela ri Oung: yu Pyam Boem da" Khyoo:
22-23Ephrim kung: yo' Manashe kung: bang: gi hau: ayo, moo Luza ga: myheing da" Bethela ri gyi yhe: zain: ago". Aseing gi nyangnu" ri pang" thoug byid: da:. Nyangnu" gi voomoo" khyoo: jooyu" bang: ri nhang: kaid wigi 24byu dayug thu re" zi nyangnu" myang lang" nyang: ri «Ngoonu" ri voomoo" khyoo: khasu" vang yhi: wa ein: ziri khyoo: shid byid: la- ngoonu" nang ri ce: dam atab' wa» ga: tid ago". 25Houg: yoomo nyang: gi nyangnu" ri khyoo: shid byid: wigi Ephrim yo' Manashe kung: bang: gi he: yug yo' nya: yhoem: byu yi mo lid voomoo" khoug: mo yugkhang" moo" ri said toem" pyam ago". 26Hau: thang: ri nyang: gi Hiti mung" khyoo: yhe: lho: houg: moo voomoo" da voo yhe: de: da:. Hau: voomoo" ri Luza ga: myheing da:. Akhid" nyid" ju" sho' myeing jo, da:.
Israela Byu yi wigi Akhaid Thu' Pyam da" Byumyu" Yi
27Manashe kung: bang: gi Bed Shan- Tanag- Dora- Ibelan- Megido voomoo" joem yo' hau: anam mo voogung joem moo nyid boem da" bang: ri akhaid thu pyam nghoid ago". Khanan byu yigi xo' lho: houg: moo nyid boem ago". 28Israela byu yi yoem: gyi: ri" lang" Khanan byu yiri nyangnu" shid re" moo" zei: byid: wa doin: zeig nhang: zo: ago". Nyangnu" gi houg bang: ri dangain" bain sho' akhaid thu pyam nghoid da:.
29Ephrim kung: yi we' Gezera voomoo" moo nyid da" Khanan byu yiri akhaid thu pyam nghoid ago". Houg: yoomo Khanan byu yigi houg: moo nyangnu" yo' dage" xo' wigi nyid ago".
30Zebulun kung: yi we' Kitron yo' Nahala voomoo" moo nyid boem da" byu yiri akhaid thu pyam nghoid ago". Houg: yoomo houg: moo nyangnu" yo' dage" xo' nyid wigi nyangnu" shid re" moo" doin zeig zei: nhang: ago".
31Ashera kung: bang: we' Akho- Sidon- Alab- Akhzib- Helaba- Apheg- Rehob voomoo" joem moo nyid boem da" bang: ri akhaid thu pyam nghoid ago". 32Ashera kung: bang: gi Khanan byu yiri akhaid thu pyam yoomo nyid xau" nghoid da" houg: bang: yo' dage" nyid boem da:.
33Napthali kung: bang: gi Bed Shame yo' Bethanad voomoo" moo nyid boem da" bang: ri akhaid thu pyam nghoid ago". Napthali kung: bang: gi nyid xau" Khanan byu yi yo' dage" nyid boem ago". Houg: bang: ri nyangnu" shid re" moo" doin: zeig zei: nhang: ago".
34Amori byu yigi Dan byumyu" kung: bang: ri boem moug: khyoo: khaid kaid wigi nyoem" khyoo: agyoo" ri" nhang: nghoid ago". 35Amori byu yigi Aiyalon- Shalabim yo' Here boem cang xo' nyid boem ago". Nghoid loug we' Ephrim kung: bang: yo' Manashe kung: bang: gi nyangnu" vhoeb da" akhoug: moo: houg: bang: ri nyhid: to" wigi houg: bang: ri nyangnu" shid re" moo" doin: zeig zei: nhang: ago".
36Edom byu yi da" mougkyoo" gi Sela mougzhung: shoid mo zi Akrabim koo' lhang khyoo: lid phyed lo" da:.
Currently Selected:
TARHA" AGYI 1: LCL
Highlight
Share
Copy
Want to have your highlights saved across all your devices? Sign up or sign in
Lacid Bible © Bible Society of Myanmar, 2009.