KOLOSE 1
1
1Mansoo myid' vho: da" khyoo: yoomo Khristu Yesu da" lagyoo: nghoid da" ngoo Polu yo' Mang nhung" phoo Timothi gi
2Kolose voogung mo Mangso da" byu yi nghoid da" Khristu moo deung: shoin" nyid ngoonu" da" loem" jeung" loem, khau: nyid mang nhung" yi jhang khyoo: dang: pyeung: kaid-
ngoonu" da" nya: phoo Mangso jang" mo jeju" yo' ngei pyo: khyoo: gi nanu" moo dajo, jo, baja" o".
Jeju" Boin: Da" Akyu" Mho' Dang:
3Ngoonu" gi nanu" da" shid re" akyu" mho' da" ayo, khang" moo"- ngoonu" da" Aseing Yesu Khristu da" nya: phoo - Mangsoo ri jeju" boin: coung" nghei nyid boem. 4Khasu" wim" gari Khristu Yesu ri loem" jeung" da" nanu" da" laloem, lakhoug: yo' Mangso byu yi dangain" bang: ri jheddab da" nanu" jhed khyeing: kang: khyeing: ri ngoonu" shau" gyo: nyid boem bye. 5Hau: deingmain" mungdang: ein: da" ngei bu: lu dang: nanu" jang" moo xang: shed" ju" lo da" uri hau: ngei bu: lu dang: wigi byid: lo da" nheig byu joyoo ri shau" gyo: yu" boem bye- (Hougsu" nghoid yoo mo nanu" da" loem" jeung" khyoo: yo' jheddab da" nheigloem: gi moug: khung: moo nanu" shid re" shoung: too" byid: ziri shau" kham: yu wa da" khyoo: nanu" nheig byu joyoo ayang: zug jo. 6Nanu" gi Mangso jeju" khyo" xang: shed" shau" gyo: yu da" bidnyid mo wigi hau: jeju" gi gyeing" nyang: se' gyo: kham' zoo: bye: ziyo' dakhyoo" ti"- hau: ngei bu: lu dang: gi nanu" jang" moo ju" loo bye- houg: yo' dakhyoo" ti"- hau" ngei bu: lu dang: gi ashi" myoo" sho' zei lo lho: mougmyid gyab, goin" jang" moo byo sain" loo" bye. 7Nanu" gi Mangso jeju" khyoo: ri ngoonu" da" moo" voin, byen, cang"- Epaphra jang" mo jhau" yu agoo" bye- nyang: gi ngoonu" da" gung thid' Khristu da" moozoo" moo voin, su: nghoid nyid. 8Nanu" ri gyeung shang: Venyi wigi byid: da" jheddab khyoo: ngoonu" ri tid kyo" boem bye.
9Houg: yoomo nanu" da" khyoo: ri shau" gyo: yu da" bidnyid mo wigi ngoonu" gi nanu" shid re" anoo: ayab, loo: za: akyu" mho' nyid boem bye- nanu" gi hau: gyeungshang: Venyi wigi byid: da" phajhi" byen- ya dangain" yo' Mangsoo myid vho: khyoo: ri yo" se' loo wa lasi, nanu" moo joeb, byeung" loo wa shid re" Mangso jang" moo ngoonu" akyu" mho' nyid boem. 10Hougsu" nghoid lang" gi nanu" gi Mangsoo myid vho: khyo" kangso dei nyid wigi nya: da" vho: ngei khyoo: moo khanham we' nanu" yo" cang zei: loo" wa zi nghoid- houg: lang" nanu" da" kangso dei khyoo: gi ge da" moozoo" ja" khang" moo" moo ashi" zei: lo wigi Mangsoo ri se' lo da" khyoo: moo gyi: sheung: loung: lo boem wa zi nghoid. 11Hougsu" nghoid yoomo nanu" thoung" shau" lo da" khyoo: khaid khang" moo" ri nheigloem: sheung: ziyo' yo" kham, zeung: nyid boem wa shid re" nya: da" phung" yoeb bo da" yoem: so' khoug: mo ju" re" da" yoem: vhoo" dangain" yo' nanu" ri yoem: lung: byid: zi shau" goo" baja". 12Hau: tho' moo gootu- bidbang da" mungdain khoug: moo bo jo, da" nya: da" gyeungshang: bang: shid re" Mangsoo nyheung soin' to" da" agyid asoo: joem ri nanu" ri shau" kham: zhoung" yu moin: bang: bue" lho: 13Mangsoo jeju" ri gau, yi ngei bu: coung" nghei nyid baja" o". Nyang: gi nyhang" ri akhyeing" ashoeb da" moug: coid' yoem: so' khoug: mo khyoid khyi: yu lho: nya: da" jheddab nya: zo: da" mungdain khyoo: fang kaid' bye. 14Hau: da" nya: zoo: khyo" ngoonu" gi lhoid pyoin, kaid zi shau" boem bye- hau: zigi ngoonu" da" youg: noo yooboo ri khyoid pyam byid: da" khyoo: nyang: nghoid bye.
Khristu Da" Layung Gung Yo' Moozoo"
15Khristu gi myo, jed" ze ayo" myang da" Mangso ved, voin, su:- ngoonu" myo, jed" ze shau" myang da" phain" so: to" zi yoo dangain" da" atho' moo je" tho' xeig zoo: shid" nyang: nghoid bye. 16Khasu" wim gari moug: khung: moug: di yo' mougmyid yooso" da" tho' moo yoem: moo" so' moo" bo da" yu join: soobyoo: joem seing: nyid mo, vhoeb khang" nyid mo, - amyeing" akhang" yoo" bang: yo' dage" myo, jed" yo' shau" myang zi ashau" myang gu: ri we' hau: nya: zo: khoug: khyo" phain" so: too" bye. 17Nyang: gi dangain" da" shid' mo nyid nyid wigi jo, moo jo, gi nyang: nya: joyoo yo' joyoo moo geung: jo, ago". 18Nyang: gi nya: gung du: ein: da" phoung: da" vhuloem nghoid nyid nyang: gi hau: gung du: da" kangso' apoem: we' nghoid nyid nyang: kyeing" za: dangain" da" yhoug: gyen: thang nam: baid' daloem: da" jo yoo ri yo" yu baja"- shid: bye: bang: mo doem dei to'' loo nhang: da" zooshid" mang: moo" nyang: nghoid. 19Khasu" wim ga: ri Mangsoo nyang: myid vho: myid phyed' to" ziyo' dakhyoo" ti"- nya: zoo: gi nyang: moo Mangso layung gung joeb, byeung" sho' kham: yu ci: bye. 20Hougsu" nghoid yoomo Mangsoo gi-nyid moo nyid jo, moo jo, dangain" gu: gi nyang: yo' doem veing" go" loo baja" ga- myid phyed' to" abye:- Mangsoo gi pyang" zing tho' moo-ab, noung" shid: kham: bye: da" nya: zo: suid" yo' doem nyeung veung" go" da" myenjham" ngei pyo: khyoo: koid wigi moug: khung: moug: di yo' mougmyid' yoosoo" moo jo, moo jo, nyid moo nyid ri nya: jhang khyoo: shu" yu bye.
21Nanu" we' shid' phyang" dalheing: gi nanu" nyang: koid da" akhyeing" ashoeb moozoo" yo' - myid soin' khyoo: yoomo Mangsoo yo' ve: gang: lo" wigi nya: da" gyivoo jeom bue" yu" boem bye. 22Nghoid loug we' akhid" Mangsoo gi nya: zo: da" xangsu: gung shoo" shid: lo" khyo" wigi nanu" ri nya: bidnoem, yi doem, koid pyam bye- Hougsu" koid da" khyoo: gi nanu" gi gyeungshang: lho: aco' ajhoid zi adab wa ziyo' yooboo aboo loo: za: nya: shid khoin" moo nanu" ri yo" fang yu wa shid re" nghoid nyid. 23Nanu" gi geung: teung da" ayang: moo nheigloem: zung" ziyo' agyi: zug wigi geung: teung jo, ge'. hau: lho: nanu" gi hau" ngei bu: lu dang: shau" gyo: da" uri nanu" yo" yu ci: da" nheig byu khyoo: ri moo" yoin da" dei zoo: dayug bue" loo bye- hau: ngei bu: lu dang: koem gi moug: gyab, goin" jang" mo byu yug khang" moo" ri kho" kyoo" bye: da" mungdang: nghoid nyid.
Phoung: Da" Dei Zoo: Khyo" Polu Moo" Voin, Lo Khyoo:
24akhid" koem gi nanu" da" shid re" ngoo thoung" shau" da" shid: gyoin, noogyoin, moo gau yi ngei pyo: nyid Khristu gi nya: gung du: ein: da" phoung: shid re" kyi" khyeug khyoo: thoung" shau" ziyo' dakhyoo" ti"- ngoo gi ngoo nya: gung du: shid re" kyi" khyeug kham, khyo" wigi Khristu gi nya: gung doem: ein: da" hau" phoung: shid re" kham, da" kyi" khyeung khyoo: moo ca" nyid shi" da" kyi" khyeug khyoo: ri nga" da" gung moo kham, zo: nyid da" kyi" khyeug khyoo: yo' joeb byeung" byid: nyid. 25Nanu" shid re" ge, da" khyoo: ri koid baja"- Mangsoo gi phoung: da" moo" voin, su: dayug khyo" wigi ngoori soin' nyheung to" zi shau" bye- ngoori ab, byid: to" da" yoovoin, gi hau: ngei bu: lu dang: ri myhed' to" zi aboo loo: sho' kho" kyoo" wa shid re" nghoid nyid. 26Nyang: gi hau: no, thang lho:-zau" yhoem" to" da" mungdang: ri mougmyid xangsu: byu yi asi loo: sho' goonham, gooco' mo dapyaid' yo' dapyaid' moo ju" sho' zau" yhoem" too" nghoid loug we' akhid" gi nya: da" byumyu" yi ri ci: shug kaid' abye:. 27Mangsoo nyheung soin' to" khyoo: gi byumyu" bain' sho' bang: shid re" nyang: yo" jo, da" myo: tham: phung" yoeb myonhoo: bo da" yhoem" shoung: to" da" phajhi" ri nya: da" byu yi jhang moo-pang shug byid: da" khyoo: nghoid- hougsu" yhoem" to" da" phajhi" gi nyangnu" da" nheigloem: ung: khoug: moo vang jo, bye: ein: da" khyoo: nghoid- hau: da" dangkang: gi nanu" Mangsoo yo' dage" hau: phung" yoeb, ri coem kham: yu da" khyoo: nghoid. 28Hougsu" nghoid yoomo ngoonu" gi byu yug khang" moo" ri Khristu da" khyoo: ri kho" kyo" boem bye- byu yug khang" moo" ri Khristu moo nheig bo myheung yang" da" Khristain byu yug khang" moo" bue" lo wigi Mangso shid moo yo" vang lo" boem baja"- ngoonu" gi phajhi" byen-ya boo moo boo yo' nyangnu" ri zed" lhid' nhang: khyoo: jhau mhoo, byid: nyid boem. 29Hougsu" hau: khyoo: yo" bui" sho' ngoo gi Khristu wigi byid: da" mau" pho" yoem: moo" yo' jam, jau kham lho: yoem: kaid' zei: nyid hau: yoem: so' gi ngoo moo moo" zei: nyid.
Currently Selected:
KOLOSE 1: LCL
Highlight
Share
Copy
Want to have your highlights saved across all your devices? Sign up or sign in
Lacid Bible © Bible Society of Myanmar, 2009.