2 THESALONI 1
1
1Polu- Sila- Timothi ngoonu" gi ngoonu" da phoo Mang soo: yo' Aseing Yesu Khristu byu yi nghoid da" - Thesa loni phung: bang: jhang khyoo: mougsoug" doem, lhid" kaid' boem.
2Ngoonu" da" nya: phoo Mangsoo yo' Aseing Yesu Khristu gi nanu" ri jeju" yo' ngei pyo: da" khyoo: dabyid: nyid baja" o".
Khirsut Doem Ju" Re" Uri Tarha" Dang: Phyed' Wa Da" Khyoo:
3Jheddab, da" mang nhung" yi we"- nanu" da" khyoo; yo' sen: lho: wigi Mangso jeju" ri nyhang" khanham we' coung" nghei nyid boem ca:. Hougsu" coung" nghei byid: da" khyoo: moo ngoonu" zei: wa zigi ngoonu" nyang: zei: ca" khyoo: nyang: nghoid bye- khasu" wim ga: ri nanu" da" loem" jeung" khyoo: gi gye" gyi: sheung: loo bye: ziyo' byu yi ri jheddab da" e" myed we' je" je; gyi: sheung: yang" deung lo nyid boem bye. 4Hougsu" nghoid yoomo ngoonu" nyang: nanu" da" khyoo: ri Mangso da" phung yi moo gau yi phau: khuang zoo" re" tid fu" kyo" yen" boem- ngoonu" gi nanu" xo' lho: wigi thoung" shau" zo: nyid da" shen" yhen ziyo' kyi: khyeug da" khyoo: ri tid gau, phau: khuang yen" boem.
5He: khyoo: joem dangain" gi Mangso tarha" dang: phyed khyoo: deung ziri sagsi: toin" shid nyid hau: da" akyu" jeju" yoomo nanu" gi nya: da" mungdain yo' moin: yi" bang: bue" lo boem wa zi nghoid- hau" shid re" ein: nanu" gi kyi" kyeig jam jau zi shau" kham nyid boem bye. 6Mangsoo gi tarha" dain: khyoo: ri koid wa zi nghoid yoomo nanu" ri kyi" khyeug jam jau shau" nhang: mo, da" atho' moo kyi" khyeug jam jau doem toug" byid: wa zi nghoid. 7Nyang: gi kyi" khyeug jam jau shau" nyid da" nanu" yo' dage" ngoonu" ri we' dajhi' dathang: khyam: sa khyoo: ri shau" yu nhang: wa zi nghoid- nyang: gi yoem: moo" bo da" mau: lagyoo; yi yo" dage" myiyham: doem yo' moug: khung: mo thu re" da" uri. 8Mangsoo gi nyang: ri a lhoem: yu ziyo' ngeug pyam nyid bang: yo' yha" Aseing Yesu da" khyoo: ngei bu: lu dang: ri atam" gyoo: bang: ri shen" yhen wa zi nghoid. 9Nyang: nu" ri gi Aseing: da" shid' khoin" mo gang: loo" nhang: lho: nya: yoem: moo" bo da" myonhoo: phung" yoeb, yo' byed, gang: lo" ein: da" pyaid moo too" moo lhu: phyo' lhu: shoin pyam' da" shid: gyoin, ri shau" boem wa zi nghoid. 10Aseing: gi nyang: doem ju" re" da" bidnyid moo nya: byumyu" yi dangain" bang: da" shid' moo myonhoo: phung" yoeb, ri we' shau" kham: yu boem wa nghoid- ngoonu" kho" kyo" da" mungdang: ri nanu" loem" jeung" nyid boem bye: yoomo Aseing: ri coung" nghei myonhoo: byid: da" jang" moo nanu" we' bo boem bye. 11Khyoo: he: khaid yoomo nanu" da" shid' re" ngoonu" khanham we' akyu" dabo mho' nyid boem- nanu' gi mangsoo khe: yu shau" bang: da" kangso' dei khyoo: yo' moin: yi" khyo" kangso' dei nyid goo" baja"- ngoonu" gi Mangso jang" mo akyu" bo mho' nyid boem- nyang: gi nya; da" myonhoo: phung" yoeb, zeing yo' nanu' da" ge, lho khyoo; ri bui" nhang: nau, da" nheigloem: boo moo boo ri joeb, byeung" loo nhang: wigi nanu" da" loem" jeung" moozoo" jid: zoo" joem ri zei: pain' byid: baja". 12Hid: khyo" wigi ngoonu" da" Aseing Yesu da" voolang myeing" khyang" gi nanu" yoomo doug bang loo wa ziyo' Yha" da" mangsoo yo' Aseing Yesu Khristu da" jeju" gang mo nanu" moo we' hau: phung" yoeb bang gi yo" kham: yu wa.
Currently Selected:
2 THESALONI 1: LCL
Highlight
Share
Copy
Want to have your highlights saved across all your devices? Sign up or sign in
Lacid Bible © Bible Society of Myanmar, 2009.