1PETERU 1
1
1 Aseing Yesu Khristu da" lagyoo: Peteru jang" mo Puntu: Galati- Kapadoki Asha mung" yo' Bethuni mung" joem moo byo sain" nyid mo, Mangsoo khyen: yu to" da" byu phung: yi jhang khyoo: mougsoug" lhid" kaid. 2Phoo, Mangsoo gi nyang: myid to" ziyo' dakhyoo" ti"- Yesu Khristu ri tam" gyoo: wa ziyo' nya: suid" yo' ced" yung" ced" lhoo' wa shid re" phoo Mangsoo gi nyang: soin' nyheung ziyo' dakhyoo" ti"- nanu" ri khyen: yu bye: ziyo' nya: da" Venyi gi nanu" ri gyeungshang: da" byu yi bue" loo nhang: bye jeju" yo' myen, jham" khyoo: gi nanu" moo myo: tham: loo baja" o".
Kangso' Dei Nyid Da" Nheig Byu Joyoo
3Ngoonu" gi ngoonu" Aseing Yesu da" nya: phoo Mangsoo ri jeju" boin: nyid boem shang- khasu" wim gari Mangsoo gi atho' tid da" nheig khyeig shoo" myen: si su: nghoid yoomo Aseing Yesu Khristu ri shid: jang" mo doem dei to'' loo nhang: khyo" wigi ngoonu" ri kangso' aseig byid: bye- houg: yoomo ngoonu" moo dei nyid wa da" nheig byu joyoo ri yo" yu boem bye. 4Hougsu" nghoid yoomo ngoonu" gi Mangso byu phung: shid re" Mangsoo nyang: shoung: too" byid: bye: da" agyid asoo: ri yo" kham: zoo: wa ziri nheig byu lang" nyid boem. Mangsoo gi hau: da" agyid asoo: ri nanu" shid re" moug: khung: moug di moo young: too" byid: bye- houg: yoomo hau" agyid asoo: gi abyo, abei ashoem: apyang: lo: da" zi nghoid. 5Hau: agyid asoo: gi nanu" shid' re" nghoid- nanu" gi loem, khau loem" jeung" yoomo Mangso yoem: so' yo' lo" thang bidnyid moo yo" toin' shed' wa jen" bye: da" khyoid yu khyoo: yoo" sho' zung" lhug zi shau" mo, nghoid ago".
6Nanu" gi jham" ca, yu' da" gunglau aja: ja: thoung" shau" yoomo akhid" daso' dadam myid myoo: ung: loug zi shau" nyid boem nghoid loug we' tid lid loo bye: da" khyoo: yoomo gau yi ngei pyo: nyid ge'. 7Hougsu" jham" ca, yu" da" gunglau" shau" khyoo: gi Mangsoo ri nanu" loem" jeung" khyoo: gyeung" ziri toin" shid khyoo: nghoid. byug thang loo" se' da" ngei sheing: ri lang" myi: yo' jham" ca, yu" zi shau" nyid Houg: yo' dakhyoo" ti"- sheing: tho' moo je phau" da" nanu" da" loem" jeung nheigloem: ri we' gyeungshang: lho: geung: teing wa shid re" myi: moo kyeung zi shau" nyid Hougsu" nghoid lang" nanu" gi Aseing Yesu doem gyoo" lo da" bidnyid moo myonhoo: bug thu' sheing" jhu" ziyo' coung" nghei zi shau" kham: yu boem wa zi nghoid. 8Nanu" gi Khristu ri amyang yu" boem nghoid loug we' jheddab nyid-akhuid" amyang shi" nghoid loug we' nanu" gi Aseing: ri loem" jeung" nyid bye- hougsu" nghoid yoomo nanu" gi nhoid, yo' tid loo, a-oung: loo: sho' gau yi ngei pyo: ziyo' ngei pyo: nyid boem bye. 9Khasu" wim ga: ri nanu" gi Aseing Yesu ri loem, khau: loem" jeing" bye: yoomo nanu" da" kangso' ri khyoid yu zi shau" boem bye.
10Lapi: yi gi hau: khyoid yu khyoo: yo' sen: lho: wigi voin: tang: cang phoid: sho: lo" boem bye- nanu" gi Mangsoo nanu' ri byid: wa ga: da" he: da" jhung: shug khyoo: ri Lapi: pe: kyo" boem bye. 11He: da" khyoid yu khyoo: gi kha: yo' kha: khyeing: mo: ju" ri" wa zi we' ce: ja: ce: khyoo" re" bue" thu' loo wa ziri se' loo" wa shid re" phoid: sho: yu" boem bye. Nyangnu" da" akhoug: moo bo vang zei: nyid da" Khristu da" venyi gi Yesu shau" kham' zoo: wa dam shid' re" we' haugsu" bain' kham zo: da" thang: ri shau" kham' zoo: wa da" myonhoo: phung" yoeb, ri we' no re toin" shid' to" uri he: da" ayo, ri toin" shid zi nghoid nyid. 12Mangsoo hid: bang: ri' toin" shid' zigi akyu" yoo" wa shid re" anghoid- nanu' da" akyu" shid re" danghoid. Khasu" wim ga: ri nyangnu" gi nanu" akhid" lagyoo: yi jang" mo shau" gyo: yu da" ngei bu: lu dang: yo' sen: lho: no re tid to" boem- hau" ngei bu: lu dang: gi moug: khung: khyo" nhang: kaid' da" gyeungshang: da" venyi yoem: so' yo' lu dang: voin lagyoo: yi tid fu" byid: bye- hau: da" khyoo: yi ri moug: lagyoo: yi lang" bo, se' gyoo: nau nyid boem.
Gyeungshang: Da" Kangso' Dei Nyid Wa Shid Re" Khe: Nyid.
13Hougsu" nghoid yoomo nanu" da" nheigloem: moo moo" zei: wa shid re" jen" jen" koid lho: akhyoo" cang nyid ge,- Aseing Yesu doem gyoo" lo da' uri nanu" kham: yu wa da" jeju" jhung: shug yo" yu wa shid re" khanham we' nheig byu nyid ge'. 14Mangsoo ri tam" gyoo: ge' - shid' phyang" aboin: asi shi' da" ayo, moo nanu' cang lo yu" bye: da" vhoo: boo myo, no, kangso' dei khyoo: akoid loo: za:. 15Nanu" ri khe: yu su: Mangsoo gi gyeungshang: nyid yhang: ti"- nanu" we' byu nyid byu yab, khyoo: ja: khang" moo" moo gyeungshang: nyid ge'. 16Khasu" wim ga: ri ngoo gyeungshang: nyid yhang: ti"- nanu' we' gyeungshang: nyid ge' ga: jhoem: mungdang: moo lhid" to".
17Hau: tho' moo gootu: byu dangain" ri myonhoo: vhu" zung akhyen: loo za-nyangnu" da" moozoo" yo' dakhyoo" ti"- tarha" dang: phyed' byid: nyid da" Mangso jang" moo akyu" mho' nyid uri nanu" gi Mangsoo ri nga" phoo we" ga: mho' yoid nyid boem bye- Houg: yoomo mougmyid' moo dei nyid daloo gyoo: moo hau: Aseing: ri gyoug phau" nyid ge'. 18Nanu" gi nya: phoug" nya: phyid" yi apyaid' mo wigi cang gyo" lo da" akyu' abo da" asam" aved mo byo, yoin" loo" se' nyid da" ngei sheing: yo' nanu" ri yo" qei khyoid yu to" zi anghoid. 19Ce: noo adab da" yung" lho' yang nu" yo' du- Khristu da" phoug" dab, suid" yo' za: dayo" qei yu. 20He: da" mougmyid ajo, shi" mo Mangsoo gi nyang: ri khyen: yu to" lho: he: mougmyid' lo" thang da" bidnyid moo nanu" da" akyu" shid re" nyang: ri myang nhang: bye. 21Nyang: mo wigi nanu" Mangsoo ri loem, khau: loo bye- Mangsoo gi Yesu ri shid: jang" mo doem dei to'' loo nhang: wigi myonhoo: phung" yoeb, thu loo nhang: bye- Yesu khyo" wigi nanu" hougsu" loem" jeung loem khau: nheig byu khyoo: gi Mangsoo moo zoug jo, wa zi nghoid.
22Nanu" gi deingmain" da" tarha" ri cang so" loo" yoomo nanu" da" nheigloem: ung: khoug: ri ced" yung ced" lho, wigi nanu" nyang: cang" we' nheigloem: ung: khoug: bain sho' yo' jheddab go" nyid ge'. 23Khasu" wim ga: ri dadei nyid da" apyaid' ato: Mangso mungdang: mo nanu' gi dalheing: dam khu: lo boem bye- hougsu" nanu" gi shid: noo ase' myhi, pho da" nya: zoo: yi yo" bue" lo boem bye. 24Xang: su: byu yi dangain" mo, gi vu, fu" myo, yhang: ti" we'
nyangnu" da" myonhoo: ngeilang: gi siyo myid: vhoeb, bain: boo" yo' we' du nyid
vu, fu" myo, gi kyoug nyhau" lo" lho: bain: boo" we' te: shoem: lo.
25Nghoid loug we' Mangso da" mungdang: koem gi apyaid' atoo: moo geung: teung jo, - ga: wigi jhoem:
mungdang: moo tid to"- hau" mungdang: gi nanu" kho" kyoo" bye: da" ngei bu: lu dang: gi, nghoid bye.
Currently Selected:
1PETERU 1: LCL
Highlight
Share
Copy
Want to have your highlights saved across all your devices? Sign up or sign in
Lacid Bible © Bible Society of Myanmar, 2009.