OBADIAH 1
1
Bawipa in Edom A Hrem Ding
1Edom ram thuhla ah Bawipa
Pathian in Obadiah hnenih
a simmi langnak cu,
Bawipa in miphun pawl lakah
a tlang-autu a thlah ih
a tlang aumi kan theih mi cu:
“Nan tim tuah uh,
Kan zatein tho in Edom kha do
uhsi,” ti a si.
2Edom hnenah Bawipa in,
“Zohhnik, miphun lakah phunnau
bikah ka lo tuah ding;
Hmuhsuam nautatmi na si ding.
3Na hngalnak in a lo bum ngah zo.
Lungpuk sungah na um ih,
Hmun sangzet ih na um ruangah
na thinlung cun,
‘Zoso i dir thla theitu ding?’
tiah na ti.
4Muvanlai bangin vansaangzet ah
zuang in na bu cu arsi lakah
sak hman awla,
Ka lo dir thla thotho ding,”
tiah Bawipa in a ti.
5“Zan ah rukru ra hai sehla,
An lo rammi cu a tam ding naón,
An lakmi cu an duhmi lawng
a si ding.
Sabit rutu pawl ra hai sehla,
Hlah mi nei loin maw an um ding?
6Asinain Esau#Esau - hitawk ah Esau a timi cu Edom ram a ti duhnak a si. (Seem 36:8; 36:43) thilri an ram
zia hi ruathnik uh;
A thupte ih a retmi sumsaw hman
an phorhsuak ṭheh hi!
7A hlanih a lo ṭanpitu pawl in
an lo bum,
Na ram sung in an lo dawihlo.
Nangmah thawn remte ih a rak ummi
pawl in an lo neh zo.
Nangmah rawl a hil pitu
na rualpi pawl in thang an lo kam;
‘Fimnak a neihmi khuiah so a si?’
an lo ti.
8“Cuih ni ahcun Edom mifim pawl
ka siatsuah ding ih,
Esau Tlang ah fimnak ka zuah
lo ding.
9Teman#Teman - cu Edom ram ih lal pakhat a si (Seem 36:42) ralkap pawl an thin a phang
ding ih Edom ralkap hmuahhmuah
thah an si ding.
Ziangah Edom Hremnak A Tong
10“Na unau Jakob tesinfa hnenih
thil sual na tuah ruangah,
Ningzak in na um ringring ding ih
Kumkhua in na hloralta ding.
11Ral pawl in an kotka tla an siat
bal ṭheh ni ah khan,
Zianghman poisa loin na rak
ding meen.
Jerusalem ih hlawnthil a la hlo ih
Camcawhfung zuuk in a zem aw
ṭhehtu ramdangmi tlukin
mi siava na si.
12Na unau ih vanduai ni ah porh aw
rero hlah;
Judah siatsuahnak a ton ni ah
na lungawi hlah.
Awloksong ih an um ni ah
hni suamso hlah.
13Ka minung pawl harsatnak an
tuar ni ah an kotka sungah
va lut hlah.
Siatnak an ton ni ah diriam in
va um hlah.
An tluk ni ah an thilri khal
va long hlah.
14Tlansuah a tumtu pawl that dingah
lamzin ṭeek in bawh hlah.
Vansanglam ih an um ni ah
An miluat hrekkhat an ral kut
sungah va pe hlah.
Pathian In Thu A ṭhen Ding
15“Reilote ah Keimah Bawipa in,
Miphun hmuahhmuah parah thu ka
ṭhen ni a ra thleng ding.
Maw Edom, midang parih na tuah
vekin na parah tuah a si ve ding.
Na thil tidaan cu na lu parah
a ra kir ding.
16Ka minung pawl in ka tlang
thianghlim parah a khami
hremnak khuathai an in zo.
Sikhalsehla a kiangkap ih ummi
Miphun hmuahhmuah cun,
Cuhnakih a khasawnmi khuathai
an in ding.
An zate in an in ding ih an hloral
ṭheh ding.
Israel Ih Nehnak
17“Asinain Zion Tlang ah mi hrekkhat
an luat ding.
Cuih tlang cu a thianghlim ding.
Jakob ih minung pawl in,
An covo anmah ih ram kha an co
sal ding.
18Jakob innsang cu meisa ah
a cang ding ih,
Josef innsang cu meihlio ah
a cang ding;
Esau innsang cu fanghi a si
ding ih,
An alh ding ih an kaang
ṭheh ding.
Esau innsang cu a luatmi pakhat
hman an um lo ding.
Bawipa in a sim zo a si.
19“Cule Negeb ih a ummi pawl in
Esau Tlang an luah ding,
Shephelah phairawn ih a ummi pawl
in Filistin ram an luah ding.
Israel mi in Efraim le Samaria ram
an luah ding a si.
Benjamin hrin in Gilead ram
an co ding.
20Israel Saklam um saltaang pawl
an kir ding ih,
Saklam ah Zarefath tiang
Foenisia ram an luah ding.
Jerusalem saltaang pawl
Sardis ih a ummi pawl in
Judah thlanglam ih um Negeb
khawpi pawl an luah ding.
21Nehtu Jerusalem mi pawl in
cu Zion Tlang ah an kai ding ih,
Esau Tlang uktu an si ding.
Cule Bawipa cu Siangpahrang
a si ding.
Currently Selected:
OBADIAH 1: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.