EZRA 1
1
Sairas In Judah Mi A Kirter
1Persia siangpahrang Sairas in siangpahrang#Persia siangpahrang Sairas in BC 539 ah Babilon khua a lak ih ram pumpulukih siangpahrang ah a cang. a ṭuannak kum khatnak ah Bawipa in a thinlung a thoter ih ca ngan in thu pakhat a suah ih a ramsung hmuahhmuahih siar dingah a kuat. Himi cu profet Jeremiah hmangin Bawipa ih thusimmi kimternak dingah a si.
2A thusuah mi sungah cun hiti in a ngan: “Himi cu Persia siangpahrang Sairas ih thupek mi a si. Bawipa, Van ih Pathian in keimah cu leilung pumpuluk uktu dingah i tuah zo ih Judah ram Jerusalem khua ah amah hrangih biakinn sak dingah ṭuanvo i pe a si. 3Pathian cu a minung nan zate hnenah um hram seh. Judah ram Jerusalem khua ah kir uhla Jerusalem ih a ummi Pathian, Israel ih Bawipa Pathian biakinn cu saksaal uh. 4Bawipa minung lakah hi saltaannak ihsin kir dingah bom a ṭulmi pawl cu an innhnen pawl in bawm hai seh. Sui le ngun, rawl le thil phurtu rannung le Jerusalem khua ah Pathian hnenih pek dingmi thawinak pawl tla pe hai seh,” a ti.
5Cutikah Judah mi le Benjamin mi sungkhat ih hotu pawl puithiam le Levi mi pawl le Bawipa in Jerusalem ih Bawipa ih Biakinn sak dingah an thinlung a thawhtermi hmuahhmuah cu feh dingah an tim an tuah ciamco. 6An innhnen pawl in thilri tampi an pek; an pekmi thilri pawl cu ngun beelkheng pawl, sui, rawl, thil phurtu rannung, a dang thil mankhung pawl le biakinn ih thawinak pek ding mi pawl an si.
7Siangpahrang Nebuchadnezzar in Jerusalem ihsin a lakih a khawzing pawl biakinn sungih a rak retmi kheng le khuat pawl cu siangpahrang Sairas in an hnenah a pek sal. 8Hi khuat le kheng pawl cu Judah uktu bawi Shehbazzar hrangah siangpahrang thilri kiltu upabik Mithredath ih tuahmi an si. Sairas in cuih khuat le kheng pawl cu Mithredath hnenah cun a pek. 9-10A pekmi pawl cu a tanglam pawl hi an si:
| raithawinak hrang sui kheng | 30 |
| raithawinak hrang ngun kheng | 1,000 |
| ngun kheng dangdang | 29 |
| Sui kheng fate | 30 |
| ngun kheng fate | 410 |
| beelkheng dangdang | 1,000 |
11A zate cun sui le ngun kheng pawl le khuat le bungbeel dangdang thawn thawng nga le zali a si ih Babilon ihsin Jerusalem ih an kir tikah Sheshbazzar in a kirpi.
Currently Selected:
EZRA 1: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.