NAHUM 3

1Hi khawpi cu a cem a si,

Mi bumnak le mi thahnak in a khat

mi khawpi,

Mi thilri lonnak le ramnak in a

khatmi khawpi.

2Ngaihnik uh, an rang vuak thawm,

An rangleng ke ring thawm,

An rang ke vuak thawm,

An rangleng tlan thawm durdo cu!

3Rang ralkap pawl in an nam hai,

An ralnam an lek zukzo,

an feipi a tle zurhzo.

Miruak cu a thuah in an thuah aw,

Siar cawk lo miruak cu!

Ruak parah milai an bah rero!

4Hlawhhlangnu Nineveh cu hremnak

a tuar;

Duh thlala a si ih iang a nei;

Asinain a iang neihnak cun

tur a nei.

Miphun tampi a thlem ih,

Sal ah a tuah hai a si.

5Cungnungbik Bawipa in,

“Maw Nineveh, keimah hi na ral

ka si;

Na hni ka lo hlit ṭheh ding ih

na hmai ka lo khuh ding;

Miphun pawl in na taklawngte ih

na um kha an lo hmu ding;

Ram uknak pawl in na mualphonak

an lo hmu ding a si.

6Nautatnak thawn ka lo zoh ding,

Mi ih fihmi ah ka lo tuah ding;

Mi in mangbang in an lo zoh ding.

7A lo hmutu pawl cu an com dukdi

ding ih,

‘Nineveh a siat ṭheh zo e,

Zotal ih zaangfah a tong maw?

Hnemtu ding zotal an um maw?’

an ti ding,” a ti.

8Nineveh, Izipt khawpi Thebes hnakin na ṭhadeuh cuang maw? Thebes khal cun phar bangin mi humtu tiva a nei - Nail tiva pi cu a hrangah a ṭanhmun khuarnak a si. 9Amah in Ethiopia le Izipt ram a uk; a cahnak cu cem ti a nei lo; Put le Libia khal amah ṭantu an si. 10Sikhalsehla Thebes mi pawl khal sal kaihmi an si ih an hruai hlo. Lamzin kel kipah an faale pawl cu an vuak that. An mi upa le bawi deuhdeuh pawl cu thir cikcin khit tahratin an hruai ih anmah kaitu lakah camcawhfung zukin an zem ih an ṭhekdarh ṭheh hai.

11Nineveh, nang khal na ri ve ding ih zianghman thei loin na tlu ding ih na ral pawl kut sung ihsin luat na tum ve ding. 12Na ralhruang pawl cu a rah a hmin zetmi theipi kung vek an si: Theipi kung cu hnin awla a rah cu a eitu ka sungah an rung tla ding. 13Na ralkap pawl cu nunau vek an si; na ral pawl hmaiah na ram cu zohman ṭantu nei loin a um. Na kotka kharnak kothrolh pawl cu meisa in a kaang ṭheh zo. 14Ral in an lo kulh ding ruangah tidai rak khai cia aw; na ralhruang le na ruhkulh pawl hngetkhoh deuh in rak tuah aw. Tlakrawh hrangah tlak rak pal cia awla, tlakrawh ahnak kuang tla rak tuah cia aw. 15Asinain ziangvek in na rak tuah cia ṭheh khalle meisa in a lo ur that thotho ding; a si lole ral kut in na thi thotho ding. Kharbok ih piat ṭhehmi thlaikho bangin na cemfai thotho ding.

Kharbok bangin karhzai dingah zuam aw. 16Sumtuah pawl tla cu van ih arsi hnakin tam sawn na rak nei naón atu ahcun an um nawn lo. An thla pharh tahrat in a zuang hlomi kharbok vekin an hlo zo a si. 17Na bawi upa pawl cu khawsik ni ah phar parih a bokmi kharbok bangtuk an si. Asinain ni a hung suah tikah cun an zam hlo ih khuitawk ah an feh ti zohman in an thei nawn lo.

18Maw Assiria siangpahrang, na ram uktu pawl an thi, na hrin upa pawl cu kumkhua in an it that zo! Na minung pawl tlangpar ah ṭhekdarh an si ṭheh ih zohman inn ih a rak hruai kirtu ding an um lo. 19Na tuahmawh hma cu dam theinak a um lo; thihpi tlak hma sia a si. Siatsuahnak na ton thu a theitu hmuahhmuah in an lungawi in an zaa an beeng. Zaangfahnak nei loih mi na tisiat ringringnak ihsin a luattu zotal an um maw?

Currently Selected:

NAHUM 3: FCL

Highlight

Copy

Compare