SUAHLANNAK 25

Biakinn Hrang Thawhlawm

(Suah 35.4-9)

1 Bawipa in Moses hnenah, 2“Ka hrangah thawhlawm an peknak dingah Israel mi pawl sim aw. Ka hrangih pek a duhtu hmuahhmuah hnen ihsin thawhlawm cu na rak saang pei. 3Na saan dingmi thawhlawm pawl cu sui, ngun, daar, 4a mepianmi le a sen-uai le a senmi tuuhmul puan, puan neem le mehmulih tuahmi hnipuan, 5a senih buhmi tuucang phaw, saphaw phun ṭha a neemmi le lawithing; 6mei-inn hrangah zinan le hnih dingah hriak le a rim hmuimi ur dingah zihmui; 7puithiam pawl in an ṭaangthlaih le an ṭaangben parih an ret dingmi lungvar sen le lungvar dangdang tla an si ding. 8Israel mi pawl in ka umnak hrangah inn an sak pei ih anmah lakah ka um ding. 9Ka inn nan sak dingmi cu ka lo hmuh dingmi vekin a innruang le a sungih thilri pawl cu an si pei.

Thukham Retnak Thingkuang

(Suah 37.1-9)

10“Lawithing in kuang an tuah pei ih dong hnih le hrek a sau pei, dong khat le hrek a kau pei ih dong khat le hrek a sang pei. 11A sungah siseh, a lengin siseh, sui hlir in nan khuut pei ih a tlang kimvel cu suipheeng in nan vel pei. 12Sui kual pali nan tuah pei ih khat lamah pahnih veve in a ke pali ah nan bun pei. 13Lawithing in zawnfung nan tuah pei ih sui in nan khuut pei. 14A putnak ah zawnfung cu thingkuang ke-ih sui kual sungah a kap le a kapah nan hrolh pei. 15Hi zawnfung pawl cu sui kual sungah taan ding a si ih lak ding a si lo. 16Cun cuih kuang sungah cun ka lo pek dingmi thukham ngannak lungpheng pahnih cu nan ret pei.

17“A sin cu sui hlir in nan tuah pei ih dong hnih le hrek sau le dong khat le hrek kau a si pei. 18A sinih khatlam le khatlam zim veve-ah sui ih sermi cherub timi thlanei ramsa lem pahnih nan tuah pei ih, 19zim khatah pakhat ciar nan ret pei. A dangte in si loin a sin thawn an peh-aw thluh pei. 20Cherub pahnih cu a tlunah an thla an pharh pei ih kuangsin cu an thla in an khuh pei. Cherub pahnih cu an hawih aw pei ih kuangsin cu an zoh veve pei. 21Kuang parah a sin cu nan ret pei ih kuang sungah cun ka lo pek dingmi thukham ngannak lungpheng pahnih nan ret pei. 22Cutawkah ka lo tong ding a si; kuangsin tlun le kuang parih a ummi cherub pahnih karlak in Israel mi pawl ih hrangah ka thukham hmuahhmuah ka lo pe ding a si.

Pathian Hnenih Pekmi Sang Hrangah Cabuai

(Suah 37.10-16)

23“Lawithing in cabuai pakhat nan tuah pei ih dong hnih sau, dong khat kau le dong khat le hrek sang a si pei. 24Cuih cabuai cu sui hlir in nan khuut pei ih a kimvel sui in nan vel pei. 25A tlangkap cu zungpibok pathum kau in nan tuah pei ih sui thotho in nan khuut pei. 26Sui kual pali in nan tuah pei ih a ke umnak kil li-ah nan bun pei. 27Cuih sui kual pali cu cabuai putnak zawnfung a kaitu an si pei ih cabuai ih tlangkap ah nan bun pei. 28Zawnfung pawl cu lawithing in nan tuah pei ih sui in nan khuut pei. 29Cule inmi thawinak hrangah pakan, hai, khuat le kheng pawl nan tuah pei. Sui hlir in nan tuah pei. 30Ka hrangih nan hunmi sang thiang cu cabuai parah nan ret ringring pei ih cuih cabuai cu Thukam Kuang hmaiah nan ret pei.

Meivannak Fung

(Suah 37.17-24)

31“Sui in meivannak fung nan tuah pei. A tawphah le a fung pawl cu sermi sui in nan tuah pei ih a mawitertu pangpar pawl, a mum le a par tla cu a fung thawn an peh-aw thluh pei. 32A fung ihsin ṭeek paruk a kho pei ih kap khatah ṭeek thum veve an um pei. 33A ṭeek hmuahhmuah ah kulhṭhuang par bangin a mum le a par thawn, a mawitertu pangpar par thum ciar an um pei. 34A fungah kulhṭhuang par bangin a mum le a par thawn, a mawitertu pangpar pali an um pei. 35A ṭeek khuah thumih hnuai ciarah pangpar mum pakhat fingfing a um pei. 36A mum le a ṭeek pawl tla cu a fung thawn an peh-aw thluh pei; sermi sui hlir pakhat in tuah ṭheh a si pei. 37Cuih meivannak fung pakhat parah mei pasarih nan vang pei ih a hmailam tleu dingin nan vang pei. 38Caiceh le darkheng pawl khal sui hlir in nan tuah pei. 39Hi meivannak fung le a thilri hmuahhmuah pawl tuahnak ah sui pawng zakhat nan hmang pei. 40Tlang parih ka lo hmuhmi innruang vek cekci in feltein nan tuah pei.

Currently Selected:

SUAHLANNAK 25: FCL

Highlight

Copy

Compare