SUAHLANNAK 24

Thukamnak Cu Hngetter A Si

1 Bawipa in Moses hnenah, “Tlang parah Aaron, Nadab le Abihu le Israel mi hruaitu sawmsarih thawn ka hnenah ra uhla a hlat nawn in nan lu kunin in ra bia uh. 2Moses nangmah lawng ka kiangah na ra pei. Midang pawl cu in ra naih hlah hai seh; misenpi pawl cu tlangpar hmanah an ra kai lo pei,” tiah a ti.

3Moses cu misenpi hnenah a feh ih Bawipa ih thupekmi le daan pekmi hmuahhmuah cu an hnenah a sim. Cutikah misenpi in, “Bawipa ih simmi hmuahhmuah cu kan tuah ṭheh ding,” tiah hmun khatte-ah an ti. 4Cule Bawipa ih thupekmi pawl Moses in a ngan ṭheh. A thaizing zingpitte-ah acuih tlang hramah Moses in biakṭheng a don ih Israel miphun hleihnih hrangah rolung hleihnih a phun. 5Cun mei-ur thawinak a pek ih Bawipa ih hnenah thawinak pekmi cawcang pawl a thattu Israel mino pawl cu pawlkom thawinak tuah dingah Moses in a fehter. 6Moses in caw thisen a hrek cu a lak ih kheng sungah a ret ih a hrek cu biakṭheng parah a theh. 7Cun thukam cazual cu a lak ih zapi theih in misenpi hnenah a siar. Misenpi in, “Bawipa ih thupekmi hmuahhmuah cu kan tuah ṭheh ding ih a thu kan ngai ding,” tiah an ti.

8Cutikah Moses in kheng sungih thisen cu a lak ih misenpi parah a theh ih, “Hi thisen cu Bawipa in nanmah thawn thukamnak a tuah ih a thupekmi hmuahhmuah nemhngetnak thisen a si,” tiah a ti.

9Cule Moses, Aaron, Nadab, Abihu le Israel mi hruaitu sawm sarih cu tlang parah an feh ih, 10Israel mi pawl ih Pathian cu an hmu. A ke hnuai ahcun a thian tukah van fiim a bang kelkelmi mepian lungvarih phahmi lungphah bangtuk a um. 11Israel mi hruaitu pawl in Pathian an hmu naón hlohralnak an tong lo; cutawkah hmun khatah an ei an in tlang.

Sinai Tlangah Moses A Kai

12 Bawipa in Moses hnenah, “Tlang parah ka hnenah ra kai awla hitawk ih na ra um sungah Israel mi thuzirhnak dingih ka ngan ciami thukham le daan pawl cu lungpher in ka lo pe ding,” tiah a ti. 13Curuangah Moses le a bawmtu Joshua cu an tim an tuah hnuah Moses cu tlang thianghlim parah cun a hung kai. 14Cule Moses in, “Kan ra kirsal hlan lo hitawk ihsin in rak hngak uh. Aaron le Hur cu nan hnenah an um ih thupoi a um asile anmah nan rak tong pei,” tiah Israel mi hruaitu pawl hnenah a cahta.

15Moses cu tlang parah a hung kai ih tlang cu mero in a tuam leihleih ṭheh. 16Bawipa ih sunlawinak cu tlang parah a rung thleng ih cu ruangah mero in tlang cu ni ruk sung a khuh. Ni sarih ni-ah Pathian in mero sung ihsin Moses cu a ko. 17Israel mi pawl hrangah cun Bawipa ih sunlawinak cu tlangpar ih meisa a kaanghliau reromi a bang. 18Cuticun Moses cu tlangpar mero sungah ni sawmli le zan sawmli a um.

Currently Selected:

SUAHLANNAK 24: FCL

Highlight

Copy

Compare