SUAHLANNAK 19

Israel Mi Pawl Sinai Tlang Parah

1Israel mi pawl cu Izipt ram ihsin an suah hnu thlathumnak ni khat ni-ah Sinai nelrawn ah an thleng. 2Refidim ihsin an pok ih Sinai nelrawn an thlen tikah Sinai tlang hmaizawn ah an riak. 3Cule Moses cu Pathian tong dingah tlang parah a kai.

Tlangpar ihsin Bawipa in Moses cu a ko ih a hnenah, “Jakob ih tesinfa pawl Israel mi hnenah hiti in sim aw, 4‘Izipt mi pawl parih ka tuahmi cu nan hmu zo a si ih nannih cu muvanlai in a thla parih a fano a thiar bangtuk in ka hnenah ka lo thiar, ti khal nan hmu zo. Cuticun hitawk ka hnenah ka lo thlenpi hai a si. 5Atu ka thu nan ngai ih ka thukham nan thlun asile nannih cu keimah ih minung nan si ding. Leilung pumpi hi ka ta a si, asinain nannih cu keimah ih hrilmi, ka minung hleice nan si ding. 6Nannih cu keimah hrangih pekmi miphun thiang, puithiam hnaṭuannak sungah keimah i riantu miphun nan si ding,’ tiin Israel mi pawl hnenah sim aw,” tiah a ti. 7Curuangah Moses cu a feh ih Israel mi hruaitu pawl a ko khawm ih Bawipa ih thupekmi hmuahhmuah cu an hnenah a sim. 8Cutikah misenpi in, “Bawipa ih sim bangtuk in kan tuah thluh ding,” tiah hmunkhatah an let tlang. Moses in Israel mi pawl ih thulehnak cu Bawipa hnenah a va sim sal.

9Cutikah Bawipa in Moses hnenah, “Nangmah ih hnenih thu ka sim tikah mipi pawl in an theih ih an lo zum ringringnak dingah na hnenah mero sahzet sungin ka ra ding a si,” tiah a ti.

Cule mipi pawl ih thulehnak cu Moses in Bawipa ih hnenah a va sim sal. 10Bawipa in Moses hnenah, “Mipi pawl hnenah feh awla, Bawipa bia dingah tuihsun le thaisun an tim tuah-aw hai seh. An hnipuan an sawp pei ih, 11tipsun ahcun timtuah ciain an um pei. Cuih ni-ah mi zate ih hmuh dingin Sinai Tlang ah ka rung ṭum ding. 12Sinai tlang a kimvel in mipi pawl hrangah ramri na tuah pei ih, ‘Tlang parih nan kai lonak dingah le a hram tla nan tham lonak dingah ralring uh. Mi pakhatkhat in a tham asile cu pa cu thah a si ding. 13Amah cu zohmanih tham loin lungto ih den that a si ding, a si lole thal in kah that a si ding. Minung a si khalle ṭilva a si khalle thah a si ding,’ tiin sim aw. Tuucang ki an tum tik lawngah mipi pawl cu tlang ah an kai pei,” tiah a ti.

14Cutikah Moses cu tlangpar ihsin a ṭum ih, Pathian bia dingah mipi pawl cu an tim a tuahter. An hnipuan an sawp ih, 15Moses in, “Tipsun cu timtuah ciain um uh; nunau hnen khalah it hlah uh,” tiah a ti.

16A ni thumnak ni zinglamah cun tlang parah khua a ri ih nimthla a kau zukzo. Mero sahzet a um ih tuucangki ringzet ih tummi a thang. Riahbuk ih a ummi hmuahhmuah cu an thinphang in an khur. 17Cutikah Moses in mipi pawl cu Pathian tong dingah an riahbuk ihsin a suahpi hai ih tlang hramah cun an ding. 18Sinai tlang hmuahhmuah cu meikhu in a tuam ṭheh. Ziangahtile Bawipa cu tlang parah meisa in a rung. Meikhu cu cahmang meikhu vekin a kai ih Sinai tlang cu a pumpi in a hnin durdo.#19.18 Sinai tlang cu a pumpi in a hnin durdo tiin Hebru Baibal ah a um. Grik Baibal ahcun, Mipi pawl cu an thinphang in nasa zetin an khur tiin a um. 19Tuucang ki tummi cu a thang sinsin. Moses a ṭong tikah Pathian in khuari in a run let. 20Bawipa cu Sinai tlang parih a rung ṭum tikah Bawipa in Moses cu tlangzim parah a ko ih a kawh vekin a hung feh. 21Cutikah Bawipa in Moses hnenah, “Vung feh awla keimah ra zoh duh ah ramri tla an lan lonak dingah mipi pawl ralrinnak vung pe aw. Culo ahcun mi tampi an thi ding a si. 22Ka hnenih a rami puithiam pawl hman an thianfaiter-awk a ṭul; culole ka cawh hai ding a si,” tiah a ti.

23Cule Moses in Bawipa ih hnenah, “Mipi pawl cu an hung thei lo ding. Ziangahtile hi tlang cu a ri tuah uhla tlang thiangah ret uh, tiah ralrinnak Nangmah in pe zo a si,” tiah a ti.

24 Bawipa in, “Vung feh awla na hnenah Aaron hun hruai aw. Asinain puithiam pawl le mipi pawl cun ramri lan hrimhrim hlah hai seh. Culo ahcun ka hrem hai ding a si,” tiah a ti. 25Curuangah Moses cu a vung ṭum ih misenpi hnenah a vung sim.

Currently Selected:

SUAHLANNAK 19: FCL

Highlight

Copy

Compare