SUAHLANNAK 18

Moses Hnenah Jethro A Leng

1Midian ramih puithiam, Moses ih pu Jethro in Moses le a minung Israel mi pawl hrangah Pathian ih a tuahmi hmuahhmuah le Izipt ram ihsin Bawipa ih a suahternak thu tla cu a rak thei ṭheh. 2Cutikah Moses ih nupi, a pu hnenih a kuatmi, Zipporah cu Jethro in Moses hnenah a ratpi. 3Jethro in Zipporah ih fapa pahnih, Gershom le Eliezer khal a rak hruai. Moses in, “Tluang ramah ramdang mi ka si,” tiin a fapa pakhat cu a hmin ah Gershom#18.3 Gershom: ti mi cu ramdangmi ti thawn a aw suah a bang aw. a sak ih, 4a pahnihnak cu, “Ka pa ih Pathian cu i bawmtu a si ih Faro ih ralnam ihsin i run a si,” a ti ih a hminah Eliezer#18.4 Eliezer: timi cu ka Pathian cu i bawmtu a si ti thawn a aw suah a bang aw. a sak. 5Jethro cu Zipporah le a fapa pahnih thawn Pathian tlang thiang kiangih Moses a riahnak ramṭhing ahcun an ra. 6Cun Moses hnenah a pu in, “Keimah na pu Jethro cu na nupi le na fapa pahnih thawn kan ra a si,” tiah thu a hei than. 7Cutikah Moses cu amah hmuak dingah a feh ih a ton tikah a hmaiah a kun ih a hnam. Cule an harhdam le dam lo thuhla an sut-awk hnuah Moses ih riahbuk sungah an lut. 8Moses cun Israel mi pawl ih ruangah Bawipa in Faro le Izipt mi pawl parih a tuahmi hmuahhmuah cu Jethro hnenah a sim ṭheh. Lamzin ih harsatnak an tonmi le Bawipa ih a runnak thu tla a sim ṭheh. 9Cutiih Izipt mi kutsung ihsin a runsuaknak ruangih Bawipa ih ṭhatnak thu a theih tikah Jethro cu a lung a awi ngaingai ih, 10“Faro le Izipt mi pawl hnen ihsin a lo runtu Bawipa cu thangṭhat uh. Izipt mi pawl hnuai ih saltuarnak ihsin a minung a runsuaktu Bawipa cu thangṭhat uh. 11Bawipa cu khawzing dang hmuahhmuah hnakin a tum sawn a si ti ka thei; ziangahtile Izipt mi pawl in Israel mi pawl ih parah huatnak thawn hna an ṭuan laiah hi thil hmuahhmuah hi a tuah a si,” tiah a ti. 12Cule Jethro in Pathian hnenah raithawinak le mei-ur thawinak a pek ih, Aaron le Israel mi hruaitu pawl cu Moses ih pu Jethro thawn Bawipa ih hmaiah rawl an hil tlang a si.

Thuṭhentu Pawl An Hril

(Daan 1.9-18)

13A thaisun ah Moses cu a minung pawl ih thuṭhen dingah a to ih, a hmaiah mipi pawl cu zing ihsin zanlam tiang an ding. 14Moses ih pu Jethro in cumi a hmuh tikah Moses hnenah, “Mipi pawl hrangih thiltuah na tummi hi ziangso a si? Ziangah so nangmah lawng hiti in na to ih midang hmuahhmuah cu na kimvelah zing ihsin zanlam tiang an din ringring?” tiah a ti.

15Cutikah Moses in, “Hitiih ka tuah cu a ṭul hrimhrim a si. Ziangahtile Pathian ih duhmi ziangso a si ti theih duh ah mipi pawl cu ka hnenah an ra. 16Mi pahnih thu an el awk tikah ka hnenah an ra ih cutikah zoso a mawh, zoso a mawh lo tiin thu cu ka relcat sak ih an hnenah Pathian thukham le daan pawl cu ka sim,” tiah a ti.

17Cutikah Jethro in, “Na thil tidaan hi a dik lo. 18Nangmah le nangmah na siatsuah-aw ding ih hi mipi pawl khal na siatsuah ding a si. Na thil timi hi a tam tuk. Nangmah pakhat lawngin na ti cawk lo ding. 19Curuangah ka thu i ngai aw. Ruahnak ṭha ka lo pe ding ih na hnenah Pathian a um ding. Nang cu Pathian hnenah misenpi ih palai na si pei ih an thu cu a hnenah na thlen ding. 20Cun Pathian thukham le daan pawl cu an hnenah na zirh ding ih an nundaan ding le an tuah dingmi cu na simfiang ding. 21Asinain thilti theinak a neimi mi hrekkhat hril awla cu pawl cu Israel mi hruaitu dingah ret aw. A thawngthawng, a zaza, sawmnga le pahra-ih hruaitu tla an si ding. Anmah cu Pathian ṭihzahtu le rinsan tlakmi an si pei ih nawhthuh pek theih lomi an si pei. 22Cumi pawl cu a kumkhua in mipi pawl ih thuṭhentu si hai seh. Thuhar deuhdeuh cu na hnenah an thlen pei. Asinain thu nepnawi pawl cu anmah tein rel hai seh. Cutiin na tuah asile na thilrit an lo phurh bawm ah a cang ih na nuam deuh ding a si. 23Pathian ih duhnak a si bangin cutiin na tuah asile nangmah le nangmah na siatsuah-aw lo ding ih mipi ih thu cu relcat sak ṭheh an si ding ruangah an innah thawsuakin an kir ding a si,” tiah a ti.

24Moses in Jethro ih thu cu a ngai ih a tivek cun a tuah. 25Israel mi sung ihsin thil titheinak a neimi pawl a hril ih misenpi hruaitu dingah a ret hai. A thawngthawng, a zaza, sawmnga nga le pahra hra-ih hruaitu an si. 26An nunsungah cat loin misenpi ih thuṭhentu an ṭuan. Thu harsa pawl cu Moses hnenah an thlen. Asinain thu nepnawi pawl cu anmah tein an rel.

27Cuih hnuah Moses in a pu cu cibai a buk ih Jethro cu a ramah a tlung.

Currently Selected:

SUAHLANNAK 18: FCL

Highlight

Copy

Compare