2 SIANGPAHRANG 22

Judah Siangpahrang Josiah

(2 San. 34.1-2)

1Josiah cu kum riat a ti ah Judah siangpahrang a ṭuan ih Jerusalem ihsin kum sawmthum le kum khat sung a uk. A nu cu Bozkath khuami Adaiah ih fanu Jedidah a si. 2Josiah cu Bawipa ih duhzawng a tuah; a pu siangpahrang David ziaza a thlun ih Pathian ih thupekmi pawl felzet in a thlun a si.

3Siangpahrang Josiah in Judah ram a uknak kum hleiriatnak ah Meshullam ih tupa, Azaliah ih fapa, siangpahrang zungih sungṭuan Shafan cu Bawipa ih Biakinn ah a thlah ih, 4“Puithiam Sang Hilkiah hnenah va feh awla mi pawl ih pekmi paisa cu Biakinn sangka kiltu puithiam pawl in ziangzat an khawl zo, ti va sut aw. 5Cuih paisa cu Biakinn remtu pawl hotu hnenih pek dingah va sim aw. Hnaṭuantu hotu pawl in, 6zungthiam, inn satu, le lungdawltu pek dingah le inn remnak ih a ṭulmi zanthing le lungto pawl leinak ah an hmang pei. 7Hnaṭuan hotu pawl cu zumtlak ngaingai an si ih an paisa hmannak pawl zingzoi rero a ṭul lo ding,” tiah thu a pek.

Daan Cabu An Sar

(2 San. 34.8-28)

8Siangpahrang ih thupekmi cu Shafan in Hilkiah a va sim. Cutikah Hilkiah in Biakinn sungih Daan cabu a sarnak thu a rak sim. Hilkiah in cuih cabu cu Shafan a pek ih Shafan cun a siar. 9Cule siangpahrang hnenah a kir ih, “Bawipa ih Biakinn sungih paisa cu na salpa pawl in an lak ih hnaṭuan hotu pawl hnenah an pe ko. 10Cun hinah Hilkiah ih i pekmi cabu a um,” tiah a ti. Cule siangpahrang hnenah ringzet in a siar.

11Cumi Daan cabu sungih thu cu siangpahrang in a theih tikah a ninghang in a hnipuan a thlek. 12Puithiam Hilkiah, Shafan ih fapa Ahikam, Mikaiah ih fapa Akbor, sungṭuan Shafan le siangpahrang bawmtu Asaiah pawl a ko ih an hnenah, 13“Feh uhla hi cabu-ih zirhmi thu-ah keimah le Judah mi pawl ai-awh in Bawipa va ron hnik uh. Kan parah Bawipa a thin a heng; ziangahtile hi cabu ih tuah ding, a timi cu kan pupa pawl in an thlun lo a si; kanmah thuhla ah hi cabu sungih nganmi vek in an thlun lo,” tiah thu a pek.

14Cutikah puithiam Hilkiah, Shafan, Ahikam, Akbor le Asaiah pawl cu Jerusalem vengthar ih a ummi profet nu Huldah tong dingah an feh. (A pasal Shallum, Tikvah ih fapa le Harhas ih tupa, cu Biakinn korfualpi pawl kiltu a si.) An thuhla cu an sim ih, 15Huldah cun an hnenah, “Siangpahrang hnenah va kir uhla, 16Bawipa ih ṭong cu hiti in a si, va sim uh: ‘Siangpahrang ih a siar zomi cabu sungih a um bangin Jerusalem le khawsung mi pawl ka hrem ding. 17Keimah in hnong ih khawzing dangdang hnenah thawinak an pek; an milem tuahmi hmuahhmuah in ka thin in hengter. Ka thinhengnak cu mei-sa bangin a alh ih zianghman in a toihdai thei lo ding. 18Siangpahrang amah parah cun Bawipa keimah Israel ih Pathian in hiti in ka sim: Cabu sungih nganmi cu na thei ih, 19Jerusalem le a khawsungmi pawl hmuahhmuah ka hrem ding, ti na theih tikah siir aw in na hnipuan na thlek ih ṭap phah in ka hmaiah na thinlung a neem ruangah na thlacamnak ka lo theihsak a si. Jerusalem le a khawsungmi pawl ka hremzia mi tampi in an hmuh tikah tuksumza an ti ding ih a hmun cu midang camnak ih hmanmi hminah a cang ding. 20Asinain Jerusalem ka hremnak ding tikcu tiang cu na nung lo ding; hnangamnak thawn na nunnak cu ka cemter ding,’ a ti va ti uh,” tiah a ti.

Cuih thu thawn annih cu Siangpahrang Josiah hnenah cun an kir.

Currently Selected:

2 SIANGPAHRANG 22: FCL

Highlight

Copy

Compare