2 SIANGPAHRANG 20

Siangpahrang Hezekiah A Na

(Isai 38.1-8, 21-22; 2 San. 32.24-26)

1Cuih ṭumah Siangpahrang Hezekiah cu besia zetin a na. Amoz ih fapa profet Isaiah in a va veh ih a hnenah: “Bawipa in, ‘Ro na cah duhmi tla cahta aw; ziangahtile na nung lo ding; na thi ding,’ a ti,” tiah a sim.

2Cutikah Hezekiah cu phar lamah a her ih thla a cam, 3“Maw Bawipa, nangmah ih rinsantlak le thinlung ka neihmi zate thawn na hna ka ṭuan ih na hmaiah a ṭhami lawnglawng ka tuah, ti na thei thluh ko,” a ti ih napi in a ṭap.

4Isaiah cu a suak ih a feh; asinain siangpahrang inn ih khaan laifang a lan hlanah Bawipa in, 5“Bawipa ih minung pawl uktu Hezekiah hnenah kirsal awla a hnenah, ‘Bawipa keimah, na pu David ih Pathian in na thlacamnak cu ka thei ih na mitthli cu ka hmu zo. Ka lo damter ding ih ni thum sungah Biakinn ah na feh thei ding. 6Tuih hnu kum hleinga na nung hrih ding. Nangmah le hi khawpi cu Assiria siangpahrang kut in ka lo runsuak ding. Hi khawpi cu ka hminthannak ah le ka salpa David hnenih ka thukam mi ruangah ka hum ding, a ti,’ va ti aw,” tiah a ti.

7Cule Isaiah in siangpahrang hnen-um pawl hnenah, “A khuaihli hma ah theipi rah ih tuahmi sii hnih uhla a dam ding,” a ti. 8Siangpahrang Hezekiah cun, “Bawipa in i damter dingih ni thum sungah Biakinn ah ka feh thei ding, tiih khihhmuhnak cu ziangso a si ding?” tiah a sut.

9Cutikah Isaiah in, “Bawipa in a thukam mi a kimter ding, ti langternak ah khihhmuhnak a lo pe ding. Phenthla cu hmailam ah karbak pahra ṭhawnter na duh maw, asilole dunglam ih karbak pahra kirter na duh sawn?” tiah a sut.

10Hezekiah in, “Phenthla hmailam ih kar hra ṭhawn cu a ol deuh ding; dunglam ah kirter aw,” a ti.

11Cutikah Isaiah in, Bawipa ih hnenah thla a cam ih, Bawipa in phenthla cu Siangpahrang Ahaz ih tuahmi kailawn ih a suh vivo laiah dunglam ah kar hra a kirter a si.

Babilon In Palai An Ra

(Isai 39.1-8)

12Cuih caanah Baladan ih fapa, Babilon Siangpahrang Merodak Baladan in siangpahrang Hezekiah a na, ti a thei ih ca le laksawng a run kuat. 13Cutikah Hezekiah cun Babilon ihsin a rami palai pawl cu ṭhazet in a rak zoh hai ih a lennak hmuahhmuah, a sui le a ngun, a rimhmui pawl le a ralkap pawl ih hriamnam pawl tiangin a hmuh thluh hai. A thilri le a thilthuam pawl retnak khaan ta siseh, a ram sungih ummi thilri dangdang siseh, a hmuh lomi zianghman a um lo. 14Cule profet Isaiah cu Siangpahrang Hezekiah hnenah a feh ih, “Hi milai pawl cu khuitawk inso an rat? Na hnenah ziangso an reel?” tiah a sut.

Cutikah Hezekiah in, “Annih cu ram hlapi, Babilon ram in an ra a si,” a ti.

15Isaiah in, “Siangpahrang inn sungah ziangso an zoh?” a ti.

Hezekiah cun, “Ziang hmuahhmuah an zoh ṭheh. Thilri retnak sungih ta ka hmuh hai lomi zianghman a um lo,” tiah a sawn.

16Cutikah Isaiah in siangpahrang hnenah, “Bawipa in, 17‘Na pupa pawl in tuihsun tiang an khawlmi thilri pawl hi Babilon a thlen thluh caan a ra thleng ding. Zianghman a taang lo ding. 18Nangmah ih sungsuak na tefa hrekkhat pawl tla an hruai hai ding ih Babilon siangpahrang inn ah an til per tahratin hnaṭuantu an si ding,’ a ti,” tiah a sim.

19Cutiih a timi cu Siangpahrang Hezekiah cun, “Ka nun sungah cun daihnak le humhimnak a um ding a si cu,” tiih a ruah ruangah Isaiah hnenah, “Bawipa ih ṭong, in run thanmi cu a ṭha a si,” a ti.

20Siangpahrang Hezekiah ih thil tuah mi dangdang, ralṭha zetih hna a ṭuannak, khawpi hrangah tidai khawlnak tumpi a tuah ih leihnuai in tikong a tuahmi pawl thuhla cu Judah Siangpahrang Thuanthu Cabu sungah an ngan a si. 21Hezekiah cu a thi ih a fapa Manasseh in a ai ah siangpahrang a run ṭuan.

Currently Selected:

2 SIANGPAHRANG 20: FCL

Highlight

Copy

Compare