2 SIANGPAHRANG 15

Judah Siangpahrang Uzziah

(2 San. 26.1-23)

1Israel siangpahrang Jeroboam pahnihnak in Israel ram a uknak kum kul hluansarih kum ah Amaziah ih fapa Uzziah#15.1 Uzziah: hi Azariah ti tla in an ti. Caang 13, 30, 32 le 34 ah Uzziah tiin a um ruangah a hramthok ihsin Uzziah kan ti lawlaw. cu, 2kum hleiruk a ti ah Judah siangpahrang a cang. Jerusalem khua in Judah ram cu kum sawmnga le kum hnih sung a uk. A nu cu Jerusalem khuami Jekoliah a si. 3Uzziah in a pa bangtuk in Bawipa ih duhzawng a tuah. 4Asinain khawvel pawl ih an khawzing biaknak pawl a siatsuah lo ruangah mi tampi in cutawkah rai an thawi ih rimhmui urnak an pek. 5Bawipa in Uzziah parah phaarnat a thlenter ih a nun sung phaarnat a nei tata. A hnaṭuanmi hmuahhmuah mi dangin an sawng ih amah ih inn ah hlimphir in a um; a fapa Jotham in ram pumpi hrangih hnaṭuan cu a ṭuan.

6Uzziah ih hnaṭuanmi a dang pawl cu Judah Siangpahrang Pawlih Thuanthu Cabu sungah an ngan. 7Uzziah cu a thi ih Jerusalem David khawpi, siangpahrang thlaan ah an phum.

Israel Siangpahrang Zekhariah

8Siangpahrang Uzziah in Judah ram a uknak kum sawmthum le kum riat kum ah Jeroboam pahnihnak ih fapa Zekhariah cu Israel siangpahrang a cang ih Israel ram cu Samaria khua in thla ruk sung a uk. 9Nebat fapa, Israel a hruai sualtu, siangpahrang Jeroboam sualnak a thlun ve ruangah a hlanih siangpahrang a ṭuantu pawl vek thotho in Bawipa ih parah sualnak a tuah. 10Jabesh fapa Shallum in siangpahrang Zekhariah cu phiar tahrat in Ibleam ah a that ih a ai ah siangpahrang a ṭuan.

11Zekhariah ih hnaṭuanmi a dangdang pawl cu Israel Siangpahrang Pawlih Thuanthu Cabu sungah an ngan.

12Cuticun Bawipa in siangpahrang Jehu hnenah thu a kam ih, “Na tesinfa pawl lakin san linak tiang Israel siangpahrang an ṭuan ding,” a timi cu a kim a si.

Israel Siangpahrang Shallum

13Siangpahrang Uzziah in Judah ram a uknak kum sawmthum le kum kua kumah Jabesh fapa Shallum cu Israel siangpahrang ah a cang ih Samaria khua in thla khat sung a uk.

14Gadi fapa Menahem cu Tirzah in Samaria ah a feh ih siangpahrang Shulam a thah hnuah a ai ah siangpahrang a cang. 15Shallum ih hnaṭuanmi a dang pawl, mi a phiarnak thuhla pawl thawn, Israel Siangpahrang Pawlih Thuanthu Cabu sungah an ngan. 16Menahem cu Tirzah ihsin Samaria lamih a feh laiah, Tappuah khawpi in a kotka a rak on duh lo ruangah cuih khua cu a siatbal thluh; khawsungmi pawl a that thluh ih a kiangkap khawte pawl tla a siatsuah ṭheh. Favun nunau hmuahhmuah tiangin a zaithlek thluh hai a si.

17Siangpahrang Uzziah in Judah ram a uknak kum sawmthum le kum kua kumah Gadi ih fapa Menahem cu Israel siangpahrang a cang ih Samaria khua in kum hra sung a uk. 18Nebat fapa, a thih tiangih Israel a hruai sualtu, siangpahrang Jeroboam ih sualnak cu Menahem in a thlun ve ih Bawipa ih parah sualnak a tuah a si. 19Cule Assiria siangpahrang Tiglath Pileser#Tiglath Pileser: timi hi Tiglath Pileser pathumnak a si ih Assiria ram cu 745 BC in 727 BC tiang a uk. Cule Pul ti tla in an ko (1 San 5:26). in Israel ram a do ih Assiria siangpahrang kut thuai ih Israel siangpahrang a ṭuan thei thothonak dingah Tiglath Pileser hnenah ngun tangka a phurh in phurh thawngkhat a pek. 20Israel ram sungih mi neinung deuhdeuh hnen ihsin mi pakhat ah ngun tangka sawmnga ciar siah a lak. Cuticun Tiglath Pileser cu a ram ah a kir sal.

Israel Siangpahrang Menahem

21Menahem ih hnaṭuanmi dangdang cu Israel Siangpahrang Pawlih Thuanthu Cabu sungah an ngan. 22Menahem cu a thi ih an phum. Cule a fapa Pekahiah in a ai ah siangpahrang a ṭuan.

Israel Siangpahrang Pekahiah

23Siangpahrang Uzziah in Judah ram a uknak kum sawmnga kumah Menahem ih fapa Pekahiah cu Israel siangpahrang a cang ih Samaria khua in kum hnih sung a uk. 24Nebat fapa, Israel a hruai sualtu, siangpahrang Jeroboam ih sualnak a thlun ruangah Bawipa ih parah sualnak a tuah. 25Pekahiah ralkap sungih ralbawi pakhat, Remaliah ih fapa Pekah in, Gilead mi minung sawmnga thawn Pekahiah a phiar ih Samaria khua, siangpahrang inn sungtabik khaan ah Argob le Areih thawn a that ih a ai ah siangpahrang a ṭuan.

26Pekahiah ih hnaṭuanmi dangdang cu Israel Siangpahrang Pawlih Thuanthu Cabu sungah an ngan.

Israel Siangpahrang Pekah

27Siangpahrang Uzziah in Judah ram a uknak kum sawmnga le kum hnihnak ah Remaliah ih fapa Pekah cu Israel siangpahrang a cang ih Samaria khua in Israel ram kum kul sung a uk. 28Israel a hruai sualtu, Nebat fapa siangpahrang Jeroboam ih sualnak a thlun ve ruangah Bawipa ih mithmuh ah sualnak a tuah a si.

29Pekah in Israel siangpahrang a ṭuan laiah hin Assiria siangpahrang Tiglath Pileser in Ijon, Abel Beth Maakah, Janoah, Kadesh le Hazor khawpi pawl a lak. Gilead ram, Galilee ram le Naftali ram pawl khal a lak ṭheh ih cuih ram mi tampi Assiria ah salah a hruai hai. #15.29 Himi hi 733 BC hrawngah a si.

30Uzziah fapa Jotham in Judah siangpahrang a ṭuannak kum kulnak kumah Elah ih fapa Hoshea in siangpahrang Pekah cu a phiar ih a that; cule a ai ah siangpahrang a run ṭuan. 31Pekah ih hnaṭuanmi dangdang cu Israel Siangpahrang Thuanthu Cabu sungah an ngan.

Judah Siangpahrang Jotham

(2 San. 27.1-9)

32Remaliah ih fapa Pekah in Israel ram a uk kum hnihnak kumah Uzziah fapa Jotham cu Judah siangpahrang a ṭuan. 33Amah cu siangpahrang a ṭuan ah kum kul hluannga a ti ih Jerusalem ihsin kum hleiruk sung a uk. A nu cu Zadok ih fanu Jerusha a si. 34Jotham cun a pa Uzziah ih dungthlun in Bawipa ih duh zawng a tuah. 35Asinain khawvelmi pawl ih khawzing biaknak pawl a siatsuah lo ih mi tampi in cutawkah rai an thawi ih rimhmui an ur ringring. Bawipa ih Biakinn ih Saklam Kotka a tuahtu cu amah Jotham a si.

36Jotham ih thil tuahmi dangdang cu Judah Siangpahrang Thuanthu Cabu sungah an ngan a si. 37Jotham in Judah siangpahrang a ṭuan laiah Bawipa in Siria siangpahrang Rezin le Israel siangpahrang Pekah cu Judah do dingin a thlah. 38Jotham cu a thi ih Jerusalem khua, David khawpi siangpahrang thlaan ah an phum. Cule a fapa Ahaz in a ai ah siangpahrang a run ṭuan.

Currently Selected:

2 SIANGPAHRANG 15: FCL

Highlight

Copy

Compare