Filipianji 1
1
1Pavlul sh-Timoteu, huzmichearlji al Hristolu Isus, a tut popului a Dumnidzãlui tu Hristolu Isus cai suntu tu Filipii, deadun cu episcoplji sh-diaconjlji: 2Har sh-pace a voauã di la Dumnidzãlu Tatãl a nostru sh-di la Domnul Isus Hristos.
Hãristisirea al Pavlu trã Filipianjlji
3Hãristisescu Dumnidzãlu a meu di cãti ori tsi vã aducã aminti. 4Tu cathi rugãciuni tsi fac, totãna mi rog cu harauã trã voi tuts, 5ti urtãclãchea a voastrã tu predicarea a evanghelui di dzua di prota pãnã azã. 6Escu sigur cã atsel tsi apãrnji un lucru bun tu voi, va l-bitiseascã pãnã tu dzua al Hristolu Isus. 7Easti ndreptu tsi mini s-minduescu ashãtsi ti voi tuts, cã vã am tu inimã. Voi tuts hits urtats tu harul tsi nji si deadi a njia tu prãnghili a meali icã tu apãrarea sh-alihipsirea a evanghelui. 8Am Dumnidzãlu martir cã cum mi ardu di dor trã voi tuts cu vrearea al Hristolu Isus. 9Mini mi rog tsi vrearea a voastrã s-creascã totãna sh-ma multu tu shtintsã sh-tu achicãsiri, 10tra s-hits axi s-alidzets cai easti ma bun shi s-hits curats sh-fãrã amãrtii tu dzua al Hristos, 11umplut cu frutili a ndriptatiljei tsi yin prit Isus Hristolu trã mãrirea sh-trã alãvdarea a Dumnidzãlui.
Hãpsinirea al Pavlu sh-Arãspãndirea a Evanghelui
12Tora, frats shi surãri voi sã shtits cã atsea tsi nji ari undzitã a njia, agiutã ma multã trã nãintarea a evanghelui. 13Ashãtsi, tut pretorium sh-tuts alantsãlji au nvitsatã cã mini escu cu prãnghi ti Hristolu,#Fap 28:30. 14ma multsã di fratslji sh-surãrili s-inimusirã tu Domnul di prãnghili a meali, greascã sh-dimãndu cu curaiu sh-fãrã fricã zborlu a Dumnidzãlui.#1:14 niscãnti manuscrisi au zborlu a Dumnidzãlui, iarã alantãli manuscrisi mash zborlu. 15Easti alihea, cã niscãntsã dimãndã Hristolu cu zilii sh-cu ngrãnji, ma niscãntsã cu bunã-vreari. 16Aeshti dimãndu Hristolu di vrearea, shtinda cã escu bãgat trã apãrarea a evanghelui. 17Iarã alantsãlji dimãndu Hristolu di ambitsili egoisti, nu cu inima discljisã sh-minduinda s-nji avdagã munduirili la prãnghili a meali. 18Sh-tsi easti? Cumtsido s-hibã, cu ipucrizii icã cu alihea, Hristolu s-preadicã sh-ti aestã mi hãrsescu, sh-ma multu va mi hãrsescu. 19Mini shtiu cã prit rugãciunjili a voastri sh-cu agiutarea a Duhlui al Isus Hristos aestã va s-aducã ascãparea a mea. 20Aestã ashteptu cu niarãvdari sh-nãdãescu si nu mi arushinedz tu tsiva, ma cu tut curaiulu, ca di totãna sh-tora multumãrescu Hristolu tu truplu a meu, cum prit banã, ashãtsi sh-prit moartea. 21Ti mini, bãnarea easti Hristolu sh-moartea easti amintatic. 22Ma, macã bana a mea tu trup fatsi tsi lucrul a meu s-aduc frut, atumtsea nu shtiu tsi s-aleg. 23Escu strimtu di doauã pãrtsã: di unã parti voi s-mi dispartu di aestã dunjeauã shi s-hiu cu Hristolu, cã aestã easti ma ghini, 24di alantã partã, macã armãnã tu trup, easti ma di ufelii trã voi. 25Trã aestã escu cãndãrsit shi shtiu cã va armãn cu tuts voi tu aestã dunjeauã trã nãintarea a voastrã sh-trã hãrsirea a pistiljei a voastrã. 26Ashãtsi alãvdarea a voastrã trã mini va artirseascã tu Hristolu Isus prit vinita a mea nãpoi la voi.
Acljimarea trã Ipiminisiri
27Voi mash bãnats cu tinjii trã evanghelu al Hristos, tsi, sh-macã yin, s-vã ved, sh-macã escu diparti di voi s-avdu cã hits deadun tu un Duh sh-tu unã minti, alumtãnda deadun trã pistea a evanghelui. 28Trã atsea, nu vã aspãrats dip di dushmanjlji. Aestã aspuni cã elji ma s-duc cãtrã chireari, iarã voi cãtrã ascãparea sh-aestã yini di la Dumnidzãlu. 29A voauã vã si easti datã harul trã hãtãrea a Hristolui, nu mash s-pistipsits tu nãsu, ma shi s-vã munduits trã nãsu, 30cã voi ma fãtsets idyia alumtã, cai avets vidzutã la mini sh-tora avdzãtã cã easti tu mini.#Fap 16:19-40.
Currently Selected:
Filipianji 1: BLRR
Highlight
Copy
Compare
Share
Want to have your highlights saved across all your devices? Sign up or sign in
