Ioan 14
14
Isusul Diznjirdã Ucenitsilji a Lui
1“S-nu s-cutreamburã inima a voastrã. Pistipsits tu Dumnidzã sh-pistipsits tu mini! 2Tu casa a Tatãlui a meu ari multi locuri, altã soi va vã dzãtseam. Ma mi duc s-vã ndregu un loc. 3Sh-cãndu s-mi duc s-vã ndregu un loc, va s-mi tornu napoi sh-va vã-ljeau ningã mini, tsi aclo iu escu mini s-hits sh-voi. 4Voi u-shtits calea cã iu ma mi duc mini.”
Isusul Easti Calea cãtrã Tatãl
5Toma lj-dzãsi: “Doamne, noi nu shtim iu ti duts. Cum putem s-u shtim calea?” 6Isusul lj-dzãsi: “Mini escu calea, alihea sh-bana. Vãrã nu yini la Tatãl dicãt mash prit mini. 7Ma s-mi aveat cunuscut, va s-aveat cunuscut sh-Tatãl a meu. Di tora lu cunushtets sh-lu avets vidzut.” 8Filipul lj-dzãsi: “Doamne, spuni-nã Tatãl sh-easti nimal.” 9Isusul lj-apãndisi: “Di-ahãntu chiro tsi escu cu voi, sh-tini ninga nu mi ai cunuscut, Filipe? Cai mi ari vidzut mini, ari vidzut Tatãl. Cum pots s-dzãts: ‘Spuni-nã Tatãl’? 10Nu pistipseashti cã mini escu tu Tatãl sh-Tatãl easti tu mini? Zboarili tsi ma vã dzãc, nu li dzãc di la mini. Tatãl tsi bãneadzã tu mini, elu lã fatsi faptili. 11Pistipsits-mi cã mini escu tu Tatãl sh-Tatãl easti tu mini! Ca s-nu pistipsits la mini, pistipsits trã faptili a meali. 12Dealihea ma vã dzãc, cai pistipseashti tu mini va s-facã sh-elu faptili tsi fac mini, sh-va s-facã sh-ma mãri di aesti, cã mini ma mi duc la Tatãl. 13Sh-itsido tsi va cãftats tu numa a mea, va-u fac, tsi Tatãl s-multumãreascã di la Hiljilu. 14Macã va s-cãftats tsiva tu numa a mea, mini va-u fac.
Tãxirea a Duhlui Sãmtu
15Macã mi vrets, vigljeats dimãndãrili a meali. 16Mini va lji fac rigeai a Tatãlui sh-elu va vã da un Diznjirdãtor altu, tra s-armãnã di totãna cu voi, 17Duhlu a Alihiljei, tsi lumea nu poati s-lu ljea, cã nu-l veadi sh-nu-l cunoashti. Ma voi lu cunushtets, cã sta cu voi sh-va hibã tu voi. 18Nu va s-vã alasã oarfãnji, va mi tornu la voi. 19Ninga putsãn sh-lumea nu va mi veadã ma, ma voi va s-mi videts. Cã mini bãnedz shi voi va s-bãnats. 20Atsea dzuã va s-cunushtets cã mini escu tu Tatãl a meu, sh-voi tu mini shi mini tu voi. 21Cai ari dimãndãrili a meali sh-li veaglji, easti atsel tsi mi va. Cai mi va mini, va hibã vrut di Tatãl a meu, sh-mini va lu voi sh-va mi aspun a lui.” 22Iuda, (nu Iuda Iscariotul) lu-ntribã: “Doamne, cum va s-ti aspunji a noauã, shi nu a lumiljei?” 23Isusul lj-apãndisi: “Macã vãrã mi va, sh-va veaglji zborlu a meu, Tatãl a meu va lu va, sh-noi va s-yinim la elu sh-va s-bãnãm cu nãsu. 24Cai nu mi va, nu li veaglji zboarili a meali. Zboarili tsi ma avdzãts nu suntu a meali, ma a Tatãlui tsi mi ari pitricut. 25Vã li-am dzãsã aesti, cara escu cu voi, 26ma Diznjirdãtorlu, Duhlu Sãmtu, tsi Tatãl va s-lu pitreac tu numa a mea, elu va s-vã nveatsã itsido sh-va s-vã aducã aminti tuti aesti tsi vã dzãsh. 27Pace ma vã alasã, pacea a mea ma vã-u dau. Mini vã-u dau, ma nu cum vã-u da lumea. Inima a voastrã s-nu si s-tulburã sh-nu s-asparã. 28Voi avets avdzãtã cã mini vã am dzãsã: ‘Mini ma mi duc sh-va mi tornu la voi.’ Ma s-mi vrets, va s-vã hãrsits cã mini dzãsh: ‘Ma mi duc la Tatãl’, cã Tatãl a meu easti ma mari di mini. 29Vã-am dzãsã tora, ma nãinti tra s-undzeascã, tsi cãndu s-undzeascã, s-pistipsits. 30Nu va s-grãiescu di ma multi cu voi, cã ma yini domnitorlu a lumiljei aishtei. Elu nu ari puteari pristi mini. 31Aestã s-fatsi tsi lumea s-cunoascã cã mini lu voi Tatãl sh-facã ashã cum Tatãl mi ari dimãndatã. Sculats-vã, s-fudzim di aoa!”
Currently Selected:
Ioan 14: BLRR
Highlight
Copy
Compare
Share
Want to have your highlights saved across all your devices? Sign up or sign in
