إنجيل يوحنا 19

الحكم على يسوع أنو ينصلب

1ساعتها أمرهم بيلاطس بأنو ياخدوا يسوع ويجلدوه 2قاموا الجنود جدلوا طوق من الشوك وحطوه على راسه، ولبسوه لبس ارجواني. 3وصاروا يجيوا لعنده ويقولوا: «سلام يا ملك اليهود!» ويضربوه.

4وطلع بيلاطس مره تانية للناس المتجمهرين وقاللهم: «حخرجه لكم علشان تشوفوا أني ما لقيت فيه ذنب» 5طلع يسوع وكان عليه طوق الشوك ولباس أرجواني. قاللهم بيلاطس: «هادا هو الإنسان!» 6لما شافه رؤسا الكهان والحرس صاحوا: «أصلبو! أصلبو!» قاللهم بيلاطس: «خدوا أنتو وأصلبوه، أنا ما أشوف أنو مذنب!» 7رد عليه اليهود: «عندنا شريعة. وحسب شريعتنا لازم يموت، لأنو خلى نفسه ابن الله». 8لمن سمع بيلاطس هادا الكلام، خاف مره. 9ودخل لقصره وسأل يسوع: «من فين أنت؟» يسوع ما رد عليه بشي. 10قاللو بيلاطس: «ليه ما تكلمني؟ أنت ما تعرف أنو عندي سلطه أني أطلق سراحك، والسلطه أني أصلبك؟» 11رد يسوع: «ما ممكن يكون لك سطله علي مره لو أنها ما جتك من فوق. علشان كدا اللي سلمني ليك عندو خطيئة أعظم»

12علشان كدا حاول بيلاطس أنو يطلقو، بس الهيود صرخوا: «إزا انت أطلقت صراحه بكدا ما تكون تحب القيصر. لأنو كل واحد يخلي نفسه ملك، يكون يعادي القيصر».

13لما سمع بيلاطس هادا الكلام، أمر أنو يخرجوا يسوع، وجلس على كرسي القضاء في مكان يسموا «البلاط».، بالعبراني «جباتا». 14وكان الوقت تقريبا الساعة سته في اليوم اللي يجهزوا فيه للفصح. وقال بيلاطس لليهود: «هادا ملكلم!» 15فزَعَّقُوا:«خده! خده! أصلبة!» سألهم بيلاطس: «أصلب ملككم؟» رد رؤسا الكهان: «مافي ملك لينا إلا القيصر». 16وسلمو بيلاطس ليهم علشان ينصلب.

الصلب

أخدوا يسوع 17وخرج وهو حامل صليبو للمكان اللي معروف بمكان الجمجمه، وبالعبراني: «جلجثة». 18وهناكا صلبوه وصلبو معاه راجلين، راجل على كل جنب، ويسوع في الوسط.

19وعلق بيلاطس لوحه على الصليب مكتوب عليها: «يسوع الناصري ملك اليهود». 20قرا اللوحه كتير من اليهود، لأنو المكان اللي انصلب في يسوع كان قريب من المدينه. وكانت اللوحة مكتوبه بالعبراني واللاتيني واليوناني. 21قال رؤسا كهان اليهود لبيلاطس: « ما تكتب: ملك اليهود، أكتب أنو هادا الإنسان قال: أنا ملك اليهود». 22رد بيلاطس: «اللي انكتب انكتب!».

23ولما صلب الجنود يسوع أخدوا لباسو وقطعوه لأربع قطع، وأخد كل جندي قطعة. وأخدوا القميص كمانا، وكان القميص منسوج كله من قطعة واحده، من غير خياطة. 24قال الجنود لبعضهم: «مافي داعي نمزعه، خلينا نسوي عليه قرعة ونشوف مين اللي يكسبه!» وهادا الشي صار علشان يتم اللي جا في الكتاب: «قطعوا لباسي بينهم وعلى قميصي سووا قرعه». وهادا اللي سواه الجنود.

25وهناكا عند صليب يسوع، وقفت مريم أمه وأختها زوجة كلوبا، ومريم المجدلية. 26لما شاف يسوع أمه، والتلميذ اللي كان يحبو واقف قريب منها، قال لأمه « يا حرمة هادا ابنك!» 27بعد كدا قال للتلميذ : «هادي أمك». ومن داك الوقت أخدها التلميذ لبيته.

موت يسوع

28بعد ما شاف يسوع أنو كل شي صار وتم، قال: «أنا عطشان»، علشان يتم اللي جا في الكتاب. 29وكان في تنكه مليانه خل، غمسوا في الخل أسفنجه وحطوها على نبتة زوفا، ورفعوها لفمه. 30لما داق يسوع الخل، قال: «كل شي اكتمل!» بعد كدا نزل راسه وسلم روحه.

31ولما كان يجهزوا للعيد في داك اليوم، طلب اليهود من بيلاطس أنو تتكسر رجول المصلوبين، وتتاخد جثثهم وما تبقى معلقة على الصليب يوم السبت، علشان داك السبت كان يوم عظيم. 32جا الجنود وكسروا رجول الراجلين المصلوبين مع يسوع. 33بس يسوع لما وصلوا عنده لقوه ميت، وما كسروا رجولو. 34لكن طعنو واحد من الجنود برمح في جنبو، وخرج منه طوالي دم ومويه. 35اللي شاف هادا فهو يشهد، وشهادته حق وهو يعرف بالزبط أنو يقول الحق، علشان تآمنوا أنتم كمانا. 36وصار هادا علشان يتم اللي جا بالكتاب: «ما حينكسر منو عظم!» 37وفي موضع تاني جا في الكتاب كمانا: حيشوفوا اللي طعنوه داكا

دفن جثمان المسيح

38بعد كدا طلب يوسف اللي من الرامه من بيلاطس أنو يسمحلو ياخد جثه يسوع، وكان يوسف هادا تلميذ عند يسوع بس في السر، لأنو كان خايف من اليهود، وسمحلو بيلاطس. وجا يوسف وأخد جتة يسوع. 39وجا كمانا نيقوديموس اللي كان جا من قبل ليسوع باليل، وجاب معاه تقريبا تلاتين لتر من العطر المخلوط بالعود. 40وأخدوا جتة يسوع وكفنوه مع الطيب، زي ما كانت عادة اليهود في الدفن. 41وكان المكان اللي انصلب فيه يسوع بستان، وفي البستان كان في قبرجديد مافي أحد سبق انو اندفن فيه. 42ودفنوا يسوع في داك القبر لأنو كان قريب، لأنو داك اليوم كان يوم التجهز للعيد عند اليهود.

Currently Selected:

إنجيل يوحنا 19: HNAV

Highlight

Copy

Compare