إنجيل يوحنا 17

المسيح بصلي علشان نفسه

1ولما خلص يسوع من هادا الكلام، رفع عيونه للسما، وقال: «يا بويا، قربت الساعه! مجد ولدك، علشان ولدك يمجدك كمانا. 2أنت اعطيته السلطه على كل البشر، علشان يددي كل اللي وهبتهم لو حياة أبدية. 3والحياة الأبدية هي أنهم يعرفوا أنك انت الله الحق وحدك، ويسوع المسيح اللي أرسلته. 4أنا مجدتك عالأرض، وخلصت العمل اللي كلفتني به. 5مجدني في حضرتك داحين، يا بويه، بالمجد اللي كان لي عندك قبل ما يتكون العالم.

المسيح يصلي علشان تلاميذه

6بينت اسمك للناس اللي وهبتهم لي من العالم. كانوا لك، ووهبتهم ليا. وسووا كلمتك، 7وعرفوا داحين إن كل اللي وهبتو ليا كان منك، 8لأني أديتهم الوصايا اللي وصيتني فيها، وقبلوها، وعرفوا اني جيت من عندك بجد، وآمنوا أنك انت اللي أرسلتني.

9علشان هدول أصليلك. ما أصلي داحين علشان العالم، لكن أصلي عشان هدول اللي وهبتهم لي، لأنهم لك: 10وكل شي لي هو لك، وكل شي لك هو لي، وأنا تمجدت فيهم. 11هدول باقيين في العالم، بس أنا مو باقي فيه، لأني راجع عندك. يا بويا القدوس احفظ في اسمك اللي وهبتهم لي، علشان يصيروا واحد، زي ما احنا واحد. 12لما كنت معهم، كنت أحافظ عليهم في اسمك. اللي وهبتم لي راعيتهم، وما هلك منهم واحد إلا ابن الهلاك، علشان يتم الكتاب. 13بس داحين أنا راجع لعندك، وأتكلم بهادا الكلام وأنا لسه في العالم، علشان يكون فرحي كامل فيهم. 14بلغتهم كلامك، وكرهم العالم لأنهم مو من العالم. 15وأنا ما أطلب أنك تاخدهم من العالم، لكن أنك تحفظهم من الشرير. 16وهمه مو من أهل العالم زي ما أنا مو من العالم. 17قدسهم بالحق، لأنو كلمتك هي الحق. 18وزي ما أرسلتني أنت للعالم، أنا أرسلتهم كمانا ليه. 19وعلشانهم أقدس نفسي، علشان يتقدسوا هم كمانا في الحق.

المسيح يصلي علشان كل اللي آمنوا بو

20أنا أصلي مو بس علشان هدول، لكن كمان علشان اللي حيآمنوا فييا بسبب كلمة هدول الناس. 21علشان الكل واحد، يا بويا، زي ما أنت فييا وأنا فيك، يكونوا هم كمانا واحد فينا، وعلشان يآمن العالم أنك انت أرسلتني. 22إني أديتهم المجد اللي أديتني، علشان يكونوا واحد زي ما إحنا واحد. 23أنا فيهم وانت فييا، علشان يكتملوا ويصيروا واحد، علشان يعرف العالم أنك أرسلتي وأنك حبيتهم زي ما حبيتني.

24يا بويا، أبغى هدول اللي وهبتهم لي أنهم يصيروا معايا مكان ما أصير أنا، ويشوفوا مجدي اللي أديتني، لأنك حبيتني من قبل ما يصير العالم. 25يا أبويا البار، العالم ما يعرفك، أما أنا عرفتك، وهدول عرفوا أنك أنت أرسلتني. 26وانا عرفتهم باسمك، ورح أستمرأعرفهم أني به كمانا، علشان تكون فيهم المحبة اللي حبتني فيها، وأصير أنا فيهم».

Currently Selected:

إنجيل يوحنا 17: HNAV

Highlight

Copy

Compare