Yoannesi Phrinzangpo XIX.
XIX.
1Dekana Pilatosis Yeshu khyere rshtalchaqs tang(chuks). 2Yang rshmaqmiunis thsermi thod chikchik hlase khoe goa skons, yang khongis khoa marpo gonchek skons. 3Yang khongis zes : Kasa Yudayaspauni Rgyalpo [skuthse rshtanshik!] Yang khongis khoe manggaliang tangs. 4Pilatos yang phyistâ bings, yang khonga zes : Ltashigang, ngâ khoreang chang budthalchik thongma med zere khyentanga shespi mingna ngas kho khyenti der phyistâ khyonged. 5Dekana Yeshu de thsermi thodpo rangi goeka gone yang marpo goncha (gone) phyistâ skyod; yang Pilatosis khonga zes : Miwa ltashigang. 6Dekana gowa kohenun nang yoqpounla kho thongmana diu zeren rua bas: Kaṯo shinga phing, katoshinga phing! Pilatosis khonga zes : Khyentes kho khyere kaṯoshinga phingshik, chiazerbana ngâ khoeang chang budthalchik thongmamed. 7Yudayaspaunis khoa tamlaniang zes : Ngachâ khakhrims chik yod, yang ngachi khakhrims nazomse kho sadpa rgosed chiazerbana khos khorang Rshnamchoe Rshras rchos. 8Pilatos la di tampo thsorbana kho yangang mangmo jiks. 9Yang kho rabsalpeang yang loqse songsena Yeshua zes : Khyerang gana in ? Amma Yeshus khoa chang tamlanchik masals. 10Dekana Pilatosis khoa zes : Khyeres ngâ spera chia tangmamed ? Ngâ khyerang phude tangmiang bashan yodpao yang katoshinga phingmiang bashan yodpao khyeranga rshtaḵẖspa meda ? 11Yeshus tamlaniang mols : Taqdir yeranga wangpo gyenna kaṯo matangspin na ngika yeranga chang bashanchik michhapa. Diphya nga yeri laqa rshtadskhanpoa nyespa mangmo yod. 12Dius Pilatosla kho phude tangsnyi yongchuks, amma Yudayaspaunis kri base diu zes : Taqdir yeres diu phude tang na, yerang Kesari rgakhan men; sus khorang rgyalpo rchoedna khos Kesarla ldzoq base in. 13Dekana Pilatosla di tamun gosena khos Yeshu phyistâ phingse khyongs, yang ldyaqbu zerkhan amma Heberi skadika Gabatha zerkhan de shaḵẖs phe se khrîka duks. 14Ni, Pesaqi Rgamoe chetaq be (jaqpo) inmin; yang namzi tho duthsod truktsek (nyima tro) songmin yang khos khonga zes : Khyenti Rgyalpowa ltashigang! 15Amma khongis kri base diu zes : Khyershik, khyershik! Kato shinga phingshik! Pilatosis khonga zes : Ngas khyenti Rgyalpo kaipshinga phingnuga ? Gowa kohenunis tamlaniang zes : Qesar mene ngachâ yang rgyalpo su med. 16Dekana khos Yeshu kaṯo shinga phingmi phya khongi laqa rshtads. Dekana khongis Yeshu zunena [khyes]. 17Ni, kho khuri kaṯo shingpo khure Ibranika Golgotha zerkhan, chizesna gophodi malseka bingse skyods. 18Deka khongis kho kaṯo shinga phings, yang kho nanyambo mingga nyis, chikchik diljongsla, yang echikchikpo eljongsla yang Yeshu khorang rshkilpeang (kaṯo shinga phings). 19Yang Pilatosis tamthsir chikchik zbris yang kaṯo shingpeka spyars; yang diu zbrise yodpin: Yudayaspauni Rgyalpo Nazaretpa Yeshu. 20De zbrise yodkhan tamthsirpoa Yudayaspa mangmos sils, chiazerbana Yeshu kaṯo shinga phingskhan malsao rgyalsa na nyemoa yodpin, yang de Heberpi skadiang Hellenpi skadiang, Latini skadiang zbrise yodpin. 21Dekana Yudayaspauni gowa kohenunis Pilatosla zes : Yudayaspauni Rgyalpo ma zbris dobasang nga Yudaspauni Rgyalpo in zere khores zersed zere zbris. 22Pilatosis tamlaniang zes : Ngas zbriskhanpo zbrised. 23Dekana Rshmaqmiunis Yeshu katoshinga phingma (thsarbapa) khoe gonchaun khyongsena po jbji bas; rshmaqmi reres po rere; khoe gonchaoang (khyongs) amma khoe gonchao thud medkhan go nang rthsa snyomshik inmin. 24Dephya khongis khontang chikchiga diu zes : Diu chadmachadshik dobasang diu sua bingen duga lta shingbu tangshik. "Khongis ngi gonchaun zgok yang ngi gonchawa shingbu tangnuk" zere zbrise yodkhanpo chhe phya rshmaqmiunis dyana ḏanḏa bas.
25Ni, Yeshui ama nang khoe ami nomo nang Klopaspa Mariam nang Magdalenpa Mariam Yeshui kaṯoshingpe shitiwa langse yodpin. 26Ni, Yeshua khuri ama nang khores rchespa base yodkhan de lzadrulbakhanpo shitiwa langse yodpao thong mana, khos khuri amâ mols : Kasa ama ziksang, diu yeri buthsao in. 27Ni, lzadrulbakhanpoa mols : Ltosang diu khyeri amao in. Yang do nang diltek de lzadrulbakhanpos Yeshui amao khuri khangmâ khyongs. 28Dejukna Yeshua saq malla hlebao shesena shoqbiang zbrise yodkhanpo chhe phya khos : Nga skomsed mols. 29Der skyurmo rgunchhu rgyangse yodkhan snod chikchik jaqse yodpin, ni, khongis chhuthen chikchik skyurmo rgunchnueang zbangsena zuphe-shing chi-chigika jaqse khoe kheka kals. 30Dekana Yeshus de skyurmo rgunchhu jibsena mols : Diu thsangse chnomsed, yang go zgusena stroqpo sals. 31Dekana chetaq be jaq inmana, yang Sababi jaqa katoshingika yodkhan roun miluspi phya Yudayas-paunis Pilatosla douni rshkangun chaqse doun phabse khyerchuk zere jus, chiazerbana de Dalbi jaqpo chhô inmin, 32Dekana rshmaqmiun yongs yang Yeshu nanyambo kaṯoshinga phingse yodkhan snanpao nang echikchikpe rshkangun chaqs. 33Amma, khong Yeshui der yongmsna kho snâ nongse yodpao thongmana khongis khoe rshkangun machaqs. 34Dobasang rshmaqmiuniangna chikchigis khoe rtsimawa neza tsuks, yang tsukpachikha khraq nang chhu bings. 35Yang (diu) thongkhanpos rshpangpo tangsed yang khoe rshpangpo mantaḵẖs in, yang khyentesang chhesluks bephya khos mantaḵẖs zerbao khoranga rshtaḵẖspa yod. 36Chiazerbana Khoe ruspa chang chaqcha michha "zere zbrise yodkhanpo chhe mingna, diun songskhan in. 37Yang zbrise yodkhan chikchigis diu mols : "Khongis khontes (neza) tsukskhanpoa ltok".
38De jukna Yeshui lzadrulbakhan, amma Yudayaspaunla jikse sangse yodkhan Aramathaiaspa Yossphis Pilatosla Yeshui rgo khyerchuk zere jus. Yang Pilatosis khyerchuks. Dekana kho yongse Yeshui rgo khyes. 39Yang chisna thsanla Yeshui der yongskhan Nikodemosang sposkar nang trijimi mar skrimse ser qab-chutsek khure yongs. 40Dekana khongis Yeshui rgo khyongs yang Yudayaspauni kabi khrimspo na zomse de trijimpo nadrese shirasiang tums. 41Ni, Yeshu katoshinga phingsseka thsashik yodpin, yang de thsaspeang mana suang majaqskhan soma durkhang chikchik yodsuk. 42Dekana khongis Yudayaspauni chetaq be jaq inmi phya Yeshu deang jaqs chiazerbana de durkhangpo nyemoayodpin.
Currently Selected:
Yoannesi Phrinzangpo XIX.: SOMA
Highlight
Share
Copy
Want to have your highlights saved across all your devices? Sign up or sign in
© Société Biblique de Genève