रोमि 16
16
पावलको सेउपाका
1एला का केलाइको ओने फिबिदोफा नेलाइहेङ नालपाङका। जाइ किक्रियाको मन्डलिता चाकरको काम पाखे। 2वा हेन्जाङहेङ साघाइहि रो कासेहेङ बुङ हेन्जाङ साघाइका हि। इदोइभाअ्सिङ नेलाइ बुङ परमेस्वरको पुनित द्याङभाइपाङ प्रभुको मिङता वासेहेङ सेउपासु रो हारजाता वासेहेङ दोकाझोको साघाइसु।
3इसु ख्रिस्टको काम पालाउ कादोफाङ काम पाका प्रिस्का रो आकिलासहेङ काङको सेउपाका हि दोअ्तेङ दोअ्पिसु।#साल्तेङ दिङगिल्का १८:२ 4एम्बालाइ कासेहेङ बान्चिपालि झान्दाइ सिलि बुङ गोइका हिघाहि। इदोइभाअ्सिङ का एम्बालाइको बारका गुन फोमपाखा। का खिनिङ माको कालाउ झाराङ बोजात्याको मन्डलिको खान्धुरिगेलाइ बुङ एम्बालाइको गुन फोमपाखे।
5कालाउ एम्बालाइको साअ्ता जोम्का मन्डलिको खान्धुरिगेलाइहेङ बुङ काङको सेउपाका हि। मोन्दाताका सानाइति इपेनितसहेङ बुङ काङको सेउपाका दोअ्पिसु। जाइ एसिया माउजासो ख्रिस्टहेङ खान्धुर पाका लाङ खामाल।
6मरियमहेङ बुङ काङको सेउपाका दोअ्पिसु। जाइ नेलाइहेङ साघाइलिको भाअ्सिङ न्हिसिङनितिम मादोअ्सिङ काम पाहि।
7काङको यहुदि सानाइति एन्ड्रोनिकस रो युनियसहेङ बुङ काङको सेउपाका दोअ्पिसु। साल्तेङ दिङगिल्कालाइता एम्बालाइ हेन्जाङ मान पालिगोइका खामालगेलाइ। हाइदोनु एम्बालाइ काखान्तेङ लाम्फाङ ख्रिस्टहेङ खान्धुर पाका हिघाखे।
8प्रभुता खान्धुर पाका काङको मोन्दाताका सानाइति एम्प्लिआतसहेङ बुङ काङको सेउपाका दोअ्पिसु।
9ख्रिस्टको भाअ्सिङ कादोसाङ काम पाका उरबानस रो मोन्दाताका स्ताखुसहेङ बुङ काङको सेउपाका दोअ्पिसु।
10आपेल्लेसहेङ बुङ काङको सेउपाका दोअ्पिसु। जाइ मुसकिल दासाता बुङ ख्रिस्टको खान्धुर जातिङको दोअ्का दासि पाहि। कालाउ आरिस्तोबुलसको साअ् जाहानगेलाइहेङ बुङ सेउपाका दोअ्पिसु।
11काङको यहुदि ओने हेरोदियनहेङ बुङ सेउपाका दोअ्पिसु। कालाउ प्रभुता खान्धुर पाका नरकिसस रो वाको साअ् जाहानहेङ बुङ सेउपाका दोअ्पिसु।
12प्रभुको भाअ्सिङ हेन्जाङ काम पाका मोन्दाताका ओनेगेलाइ त्रुफेना, त्रोफोसा रो परसिसहेङ बुङ सेउपाका दोअ्पिसु।
13प्रभुता सालन्हाका रुफस रो इङकोको आमाइ, जाइ काङको बुङ आमाइ जेङका हिघाहि। एम्बालाइहेङ बुङ सेउपाका दोअ्पिसु।#मरकुस १५:२१
14कालाउ आसिंक्रितस, फ्लेगन, हरमेस, पत्रोबास, हरमास रो एम्बालाइदोफा हिका दादाओने बाइओनेगेलाइहेङ बुङ सेउपाका दोअ्पिसु।
15फिलोलोगस, युलिया, नेरियस रो इङकोको ओने, ओलिम्पास रो वाकोदोफा हिका झाराङ परमेस्वरको पुनित जनगेलाइहेङ काङको सेउपाका दोअ्पिसु।
16जेलाउ नेलाइ दुसु सुखेना कालाउ एअ्मि भेनेङहेङ पुनित मनहोइ सेउपासु। कालाउ ख्रिस्टको गोताङ मन्डलिको द्याङगेलाइ बुङ नेलाइहेङ सेउपाका पिगिल्का हि।
आखिरि साल्हा
17दादाओने बाइओनेगेलाइ, नेलाइको लाम्फा धिरका जातिङको काथाको खिलापता लागिका द्याङगेलाइसो होस पातेङ हिसु दोअ्तेङ का नेलाइहेङ खुर गासेतेङ बिम्ति पाखा। इस्का काथाहोइ नेलाइता खेङका काथा चुमाखे रो हेथे द्याङगेलाइहेङ ते एम्बालाइको खान्धुरसो दुरे चुम्पुखे। कालाउ नेलाइ इन्सिका द्याङगेलाइदोफा सङगतदोङ मापासु। 18हाइदोनु इस्का द्याङगेलाइ केलाइको प्रभु ख्रिस्टको माको कालाउ ताइकोङ हेमुङको भाअ्सिङ चाकर पाखे। एम्बालाइ ताका रो ह्यालाअ्का काथापातेङ सोझा द्याङगेलाइहेङ ठगिखे। 19नेलाइ परमेस्वरको हुकुम मानितेङ हिसुखेना दोअ्का काथा झाराङ खान्धुरिगेलाइ गिका हि। इदोइभाअ्सिङ का नेलाइदोफा हेन्जाङ लेङचाका हिघा। कालाउ का भोखा, जेदोङ रेम्का हि इङकोको भाअ्सिङ नेलाइ आकिल हिका जेङसु रो जेदोङ आखेका हि इङकोता दुस मान्थुका जेङसु।
20सान्ति चुमाका परमेस्वर मारफाङ साइतानहेङ नेलाइको खोकोइलेता पाप्यावा। कालाउ केलाइको प्रभु इसु ख्रिस्टको निगाहा नेलाइदोफा दिनाङ ह्याको।
21कादोफाङ काम पाका तिमोथि नेलाइहेङ सेउपाका पिगिल्का हि। एन्साङपातेङ काङको यहुदि ओनेगेलाइ लुकियस, यासोन रो सोसिपात्रोस बुङ नेलाइहेङ सेउपाका पिगिल्का हि।
22पावल पाहासो इदोइ चिथि लेखिपिका का तरतियस बुङ नेलाइहेङ प्रभुको मिङता सेउपाका पिगिलदोङखा।
23साअ्धनि गायस रो वाको साअ्ता जोम्का खान्धुरिगेलाइ बुङ नेलाइहेङ सेउपाका पिगिल्का हि। कालाउ इदोइ पुरको खाजान्चि इरास्तस रो ओने क्वारटस बुङ नेलाइहेङ सेउपाका पिगिल्का हि।#साल्तेङ दिङगिल्का १९:२९; १ कोरिन्थि १:१४; २ तिमोथि ४:२०
24[केलाइको प्रभु इसु ख्रिस्टको निगाहा नेलाइदोफा ह्याको। आमेन।]
25केलाइ झाराङ परमेस्वरहेङ मान रो बाखिनाइने। वा नेलाइहेङ खान्धुरता थिर बान्हाइलि सरबङ हिका हि। काङको पारचार पाका रेम्काबानाल रो इसु ख्रिस्टको बारेता पाका पारचारसो बुङ इदोइ दोअ्पिखे। कालाउ जुगजुगसो म्होअ्न्हातेङ हिका ख्रिस्टको रेम्काबानाल एला देखाल जेङका हि। 26एला ख्रिस्टको बारेता माबुझिका काथागेलाइ परमेस्वर पाहासो धुइकालाइ लेखिका किताबगेलाइता देखाल पान्हाका हि। कालाउ हेअ्लाउ मामुअ्का परमेस्वरको हुकुम आन्सार इदोइ म्होअ्न्हाका रेम्काबानाल चारपाहाङ पारचार पादोङखे। एसा पालाउ झाराङ खान्धुरपातेङ एअ्मिखिनिङ परमेस्वरहेङ मानिलि द्वावा। 27गोताङ काथा गिका एअ्मिखिनिङ परमेस्वरहेङ इसु ख्रिस्टसो दिनाङ बाखिन्का ज्याको। आमेन।
Currently Selected:
रोमि 16: DHIM
Highlight
Copy
Compare
Share
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
