रोमि 12
12
सिन्हुका भोक
1इदोइभाअ्सिङ दादाओने बाइओनेगेलाइ, परमेस्वर केलाइहेङ इस्तुङ दायानाङ नेलाइ ताइमिङहेङ पुनित रो परमेस्वरहेङ मोन्दाताका सिन्हुका भोक चार्हाइसु दोअ्तेङ का नेलाइहेङ बिम्ति पाखा। हाइदोनु नेलाइ परमेस्वरहेङ उपासाना पालिगोइका जातिङको काथा चाहि इदोइदोङ। 2नेलाइ इदोइ दुनियाको चालामालाता माचलिसु, कालाउ ताइको मनता नावा जेङतेङ पुरा रुपता फेरेन्हासु। कालाउ परमेस्वरको रेम्का, र्हुलिलाएक रो पुरा इछा हाइ हि, इङको नेलाइ गिलि दोसु।
3परमेस्वर कासेहेङ निगाहा तिङपानाङ का नेलाइ झाराङहेङ दोअ्दोङखा, नेलाइ बारालि माभोसु कालाउ परमेस्वरको पिका खान्धुर आन्सार ताइमि जिसिका हिसुन्हा, इन्सिकाङ फोम पासु। 4हाइपानु केलाइ झाराङको एलोङदोङ जिउ हि कालाउ हेन्जाङ आसिता बाखाराइन्हाका हि। कालाउ इदोइ गोताङ आसिगेलाइको एलोङदोङ काम मान्थुखे।#१ कोरिन्थि १२:१२ 5एन्साङपातेङ केलाइ हेन्जाङ हिलाउ बुङ ख्रिस्टता एलोङदोङ जिउ रो केलाइ झाराङ एअ्मि भेनेङहेङ गोइका आसि हिन्हाहि। 6इदोइभाअ्सिङ परमेस्वर ताइको निगाहाहोइ केलाइहेङ पिका भेनाभेनाङ बरआन्सार वाको कामगेलाइ पाइने। एदि हासुङदोफा आगमबानि दोअ्का बर हि पानु, ताइको खान्धुर आन्सार वाकोङ पाहासो धुयाको।#१ कोरिन्थि १२:४-११ 7एदि जाइदोफा चाकर पाका बर हि पानु वा चाकर पाको। एदि जाइदोफा धिरपाका बर हि पानु वा धिरपाको। 8एदि हासुङदोफा हाउसाको बर हि पानु वा बोमिहेङ हाउसा प्याको। एदि जाइदोफा साघाइका बर हि पानु वा बोमिहेङ साघायाको। एदि जाइदोफा आगुवाइ पाका बर हि पानु वा आगुवाइ पाको। एदि जाइदोफा दाया तिङपाका बर हि पानु वा लेङचातेङ बोमिहेङ दाया तिङपाको।
माया रो भालाइ
9नेलाइ माया तिङपाका खिनिङ माको कालाउ नेलाइको माया जातिङको ज्याको। जेदोङ काथा आखेका हि, इङकोहेङ दिगमिग पासु। जेदोङ काथा रेम्का हि, इङकोता लागितेङहिसु। 10दादाओने बाइओने भाइपाङ एअ्मि भेनेङहेङ माया पासु। ताइमिहेङ खान्तेङ बोमिहेङ हेन्जा मान पासु। 11प्रभुको कामता कुर्ह्या मालुसु। हाङसाता हाउसितेङ वाको चाकर पासु। 12ताइको आसता लेङचासु, पिरता थिर जेङसु रो दिनाङ पारथाना पातेङ हिसु। 13परमेस्वरको पुनित जनगेलाइहेङ हारजा परेलाउ साघाइसु। ताइको साअ्ता लोका बान्सालाइहेङ बान्सा बुझाइका जेङसु।
14नेलाइहेङ सान्ताइकालाइहेङ साराप माको, सहसाम्पा पिसु।#मत्ति ५:४४; लुका ६:२८ 15लेङचाकालाइदोफा नेलाइ बुङ लेङचासु रो खारकालाइदोफा नेलाइ बुङ खारसु। 16एअ्मि भेनेङदोफा मिलितेङ हिसु रो तुजुकि माजेङसु। नोइकालाइदोफा सङगत पासु रो हेअ्लाउ बुङ बारालि माभोसु।#रेम्काआरति ३:७
17एदि हासुङ नेलाइहेङ मारेम्का पानु, वासेहेङ मारेम्का मापासु। कालाउ झाराङ द्याङगेलाइ रेम्का ठार्हाइका काथागेलाइता खिनिङ मन लागाइसु। 18जेङलि दोखे पानु, झाराङदोफा मिलितेङ सान्तिता हिसु। 19का माया पाका दादाओने बाइओनेगेलाइ, जाइदोफा हेअ्लाउ बुङ बादाला मार्हुसु। कालाउ चेर तिङपाका काम परमेस्वरहेङ पालि पिसु। हाइदोनु धरमकिताबता इस्का लेखिका हि, “बादला र्हुका काम नेलाइको माको काङको, कादोङ बादाला र्हुकाङका।”#न्याम ३२:३५ 20धरमकिताबता इस्का बुङ लेखिका हि, “एदि नेलाइको दुस्मन म्हितुका हि पानु इङकोहेङ चालि पिसु। एदि नेलाइको दुस्मन चि आम्लि किअ्का हिनु इङकोहेङ चि आम्लि पिसु। एसा पासुन्हा पानु नेलाइको दुस्मन ताइमिङ लेदेरता पर्यावा।”#रेम्काआरति २५:२१-२२ 21मारेम्का काथाहोइ नेलाइहेङ माजित्याको, भुरुङ भालाइ पातेङ मारेम्का कामहेङ जितिसु।
Currently Selected:
रोमि 12: DHIM
Highlight
Copy
Compare
Share
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
