१ कोरीन्थी 4
4
1ङीपाय् ख्रीस्कोः काम् जाङ्ह्ओ मान्तालम् स्याव्ती परमेस्वर्कोः छ्यानःआक्मालो कुरा स्यान्नाङःसु एत सबैइ चीःसा खेःतो। 2काम् जाङ्ह्ओ मान्तापाय् मालीक्कोः काम् पेतो जाङ्ह्सा खेःतो। ओउःइ जाङ्ह्ओ काम्पाय् पेनाःया पेलया त अरुइ योनानी। 3नाङ्इलेः ङाकोः काम् योतेःनेःनानाङ्स अरु मान्ताइमा योनाःताङः त खेःया ङापाय् दोह्मा म्हर्ङल। लयःकोः काम्कायः ङाइमा “पेओया पेलया” त तय्छनःती योङसल। 4ङाकोः काम्पाय् “पेलेःनाः” त लयःकोः ल्हुङ्हाङः ताःनाङ्स। एत ताःसापाय् ताःनाङःस ङाकोः काम्पाय् “दोङ् पेनाःया पेलया” त प्रभुइ ह तय्छनःती योसा स्याव्नाः। 5ओउःत झ्यान्ते प्रभु येसु वाङ्धाङ्माखाहाङःकायः सुकायःमा तय्छनःती योलाम्। लोन्ते प्रभु वाङ्तोक्हाङः ओउःइ सबै मान्ताकोः ल्हुङ्हाङः नुस्ओ च्याक्ओ कुरालम् फानःती छ्यानःताक्नौ। ओहाङःसैको परमेस्वर्इ मान्ता मान्ताकायः लःलयः जोक्कायः ओउःमयःकोः काम् जाङ्ह्ओकोः कुरा लुङ्तीलेः तोनौ। 6इ ङाकोः कुरामा आपोलस्कोः कुरामा तोती नीङ्कायः स्यान्साकायः लेखनेःनाङ्स। ओहाङःसैको लेखओ कुरापाय् ग्याती जाङ्ह्सा खेःतो ओउःसै जाङ्ह्तेःचानी। यात्चाक्खेकायः “अरुसै ताङ्ह्ओ लेःआः” अरु यात्चाक्खेकायः “अरुसै मीओ लेःआः” त म्हर्तेःचनै। 7नीङ्पाय् अरुसै ताङ्ह्ओलेः सुइलो जाङ्ह्तेःआकाय् र। नीङ्कोः नाःओ कुरापाय् परमेस्वर्इ सबै बयःतेःआकाय् माःर। ओउःइ बयःओ त खेःया दोह् हायःतीतेः लयःकोः नेह्रो ओर्तेःताक्तेःनानी। लयः क्रुत्इ दोःओलो लेखा नीङ्पाय् ताङ्ह्ताक्तेःनाःइसी ओउःत हायःसा स्याव्ल बा।
8नीङ्पाय् दोह्मा राह्तेःइलीया सबै थोक्तेः नाःतेःनैया। ङीखे राजा खेःङीली नीङ्खेपाय् “राजालेः स्याव्आतय्ही” त ताःतेःइसी यादो। नीङ्पाय् दोङ् राजात खेःया “ओउः पेओ लेःआः” त म्हर्चाङः। दोह् हायःती दाय्ह्सा ङीइमा नीङ्कुस् राजालम् स्याव्सा खाय्चाङःसु। 9ओउःतलेः झाक्नाङः द्याह् ङी परमेस्वर्इ छ्युङ्ह्ती ल्होक्ओमयःकायःपाय् सबै अरुसै लोन्ते वानःआताङी त ताःनाङः। न्युम्ह्ताक्ती सात्सा खेःओ मान्तालो लेखा ङीपाय् सबैकोः मीक्हाङः गम्ओआः। ङीपाय् मान्ताकोः मीक्हाङः झुङ्आले खेःल परमेस्वर्कोः ल्होक्ओमयःकोः मीक्हाङःमा मीतो स्याव्ताक्ती गम्ओआः ङी। 10ख्रीस्कोः काम् जाङ्ह्साकायः ङीखे जुगाङ् व्हाय्मालो मान्तालो लेखा स्याव्ङीतो नीङ्खेपाय् लयःकोः मीक्हाङः ख्रीस्कायः तय्ह्ती व्हाय्ओ लेःतेः इ। ङीखेइ दोह्मा जाङ्ह्सा खाय्ङुसुलु नीङ्खेइ सबै जाङ्ह्सा खाय्तेःनानी। नीङ्खेकायः अरुइ ताङ्ह्ताक्तेःनै ङीखेकायः मान्तालम्इ मीताक्ताङी। 11तेन्छ्याङ्मा योङ्क्राय्ती तीः अप्ती नाय् नाःमाःत वाह्लेःनाङी अरुइ ङीकायः घान्नाःताङी ङीकोः याक्सा थाव्पाय् दोह्मा नाःल। 12ङी लयःकोः क्रुत्इ आन काम् जाङ्ह्नाङःसु। अरुखेइ ङीकायः प्रनःनाःताङी प्रनःतोक्हाङः ङीखेइ आसीक् बयःनाङःसु अरुइ बयःओ लीह्सीःओ ङी गोरःनाङःसु। 13अरुइ पेमालो तोनाःताङी एत तोतोक्हाङः ङीपाय् पेतो त्याङ्नाङी। सबैकायः ङी जुगाङ् क्रीसीःओ स्याव्आलाङी तेन्छ्याङ्मा ओउःतलेः मुनाङी।
14इ कुरा नीङ्कायः रास्ताक्साकायः लेखओ खेःङल ङाकोः ल्हुङ्गोरे चोःलम्लो लेखालेः नीङ्कायः ङाइ गानाक्ती तोओ लेखनेःनाङ्स। 15ख्रीस्कोः काम् जाङ्ह्तोक्हाङः नीङ्कायः योतीमा गानाक्ती तोतीमा आन नाःतो मान्तालम् मुनै यादो। नीङ्कोः आपापाय् ङा झुङ्आले स्याव्नाङः दोह् हायःती दाय्ह्सा ङाइ येसु ख्रीस्कोः पेओ समचार् तोती नीङ्कायः रौ जीङः दोःताक्नेःआलाङ्स। 16ओउःत झ्यान्ते “ङाइ जाङ्ह्ओ कुरा नीङ्इमा तेःती जाङ्ह्नु दा” त ङाइ तोनेःनाङ्स। 17इ कुरा स्यान्साकायः ङाकोः ख्रीस्हाङः आन राप्ओ चोः तीमोथी त तोओ ल्होक्नेःनाङ्स। ओउःइ प्रभु येसुकायः पेतो ङ्हाम्ती झ्यान्ते ङाइ ख्रीस्कायः जाङ्ह्ओमा स्यान्ओ कुरालम्मा ओउःइलेः नीङ्कायः कोदीङःती तोतेःनै। इ कुरा ङाइ सबै हुम्ती वाङ्ओ ख्रीस्कोः कुरा ङ्हाम्ओलम्कायः स्यान्ती तोती मुलेःनाङः। 18“ङी ताङ्ह्ओ मान्तालम्कः रैती झ्यान्ते पावुल्पाय् इहाङः वाङ्सा ग्याल” त म्हर्ती नीङ्कःहाङः यात्नीस्इ लयःकोः नेह्रो ओर्ताक्नाःइसी। 19एतलेः सायःतेःइसीतो परमेस्वर् झाक्नाः त खेःया ङा रेन्ह्तोलेः नीङ्कःताङ् वाङ्चाङः। ओहाङःसैको ओउः नेह्रो ओर्ताक्ओलम्कोः काम् जाङ्ह्सा ग्वम्पाय् ओउःमयः नोःओच्युक् ताङ्ह्लेःनाःया ताङ्ह्लया त ङाइ योसा खाय्नाङः। 20दोह् हायःती दाय्ह्सा परमेस्वर्कोः राजीपाय् नोःओ कुरा झुङ्आले खेःल ग्वम्कोः कुरा लेःआः बा। 21लौ उया दोह्तेः झाक्तेःनै। ङाइ नीङ्कायः घान्लाङ् वाङ्सा झाक्तेःनैया नीङ्कायः राप्ती काङ्तीलेः वाङ्सा झाक्तेःनैया इत दाय्ह्ती तोनाङ्स दा।
Currently Selected:
१ कोरीन्थी 4: CDM93
Highlight
Copy
Compare
Share
Want to have your highlights saved across all your devices? Sign up or sign in
© 1993 Wycliffe Bible Translators Inc., All Rights Reserved.
