१ कोरीन्थी 3
3
1लौ पुःचोङ् हौचोङ्य परमेस्वर्कोः कुरापाय् परमेस्वर्कोः ग्वालामः दोःओ व्हाय्तोलेः चीःओ मान्तालम्लो लेखालेः ङाइ नीङ्कायः तोसा खाय्आक्ङल। नीङ्कायःपाय् ख्रीस्कोः कुरा चीःमालो मीओ हौलम्लो लेखालेः स्यान्ती तोसा खेःतो। 2मीओ हौलम्कायःपाय् चाक्ओ जेःगा खेःल दुत् ह बयःनानी। ओउःलो लेखालेः नीङ्इपाय् चाक्ओ कुराखे चीःसा खाय्तेःआक्तेःनीली त खेःओ ङाइ दुक्मालो कुराखे स्यान्नेःआलाङ्स। 3तेन्छ्याङ्मा नीङ्इ पेतो चीःसा खाय्धाङ्तेःनीली दोह् हायःती दाय्ह्सा नीङ्पाय् ल्हाव्ह्दैबाङ्कोः मान्तालो लेखालेः मुधाङ्तेःनै। नीङ्कःहाङः काय्काय्ओमा लओ ल्हुङ्मा मुनाः ओउःत हायःतीलेः नीङ्पाय् ल्हाव्ह्दैबाङ्कोः ङ्हाम्मालोलम्लो लेखा वाह्धाङ्तेःनै 4नीङ्पाय् यात्नीस्खे “ङापाय् पावुल्कोः मान्ता लेःआः ङ” त दाय्ह्ती तोतोक्हाङः अरुखे “ङापाय् आपोलस्कोः मान्ता लेःआः ङ” त दाय्ह्ती तोतोक्हाङः एत दाय्ह्तीलेः नीङ् ङ्हाम्मालोलम्लो लेखा खेःतेःनै। 5पावुल् त तोओ सुखेलो आपोलस् त तोओ सुखेलो त दाय्ह्सा परमेस्वर्इ बयःओ काम् जाङ्ह्ती नीङ्कायः ङ्हाम्ताक्ओ मान्तालेः ह खेःनाङी। दोह् दोह् काम् लःलयः जोक्कायः बयःओ लेःआः ओउःकायःलेः जाङ्ह्नाङःसु। 6ङाखेइ कुरापाय् बीया चोयालो लेखालेः वार्ङोतो आपोलस्खेइ तीः बयःउतो ब्याव्साकायः परमेस्वर्इलेः ब्याव्ताक्आकान्। ओहाङःसैको नीङ्इ ङ्हाम्तेःआकानी। 7ओउः वार्ओ मान्तामा ओउः तीः बयःओ मान्तामा ताङ्ह्ओ खेःबाय्इली ओउः ब्याव्ताक्सा परमेस्वर्पाय् ह ओउःखे ताङ्ह्लेःनाः। 8ओउः वार्ओ मान्ताइमा तीः बयःओ मान्ताइमा यातैज्योः काम् जाङ्ह्सा बोङःनाःचु। ओउःमयःकायः परमेस्वर्इ मान्ता मान्ताकायःलेः काम् जाङ्ह्झ्याङ्कोः बयःनौ। 9ङीखे परमेस्वर्कोः खेत्ल्यालो लेखा मुनै नीङ्खे परमेस्वर्इ दोक्ओ राङ्लो लेखामा मुतेःनै। नीङ्पाय् परमेस्वर्इ जाङ्ह्ओ कीम्लो लेखामा मुतेःनै। 10परमेस्वर्इ ङाकायः ग्वम् बयःआक्तीको ङाखेइ पेतो चीःओ कीम् जाङ्ह्सा मान्तालो लेखा परमेस्वर्कोः कीम् तुङःकायः गम्आलाङः। अरु मान्ताखेइ ओहाङः कीम्कोः गारा बाङ् देती जाङ्ह्नानी ओउः अरु मान्तालम्इ जाङ्ह्सापाय् जाङ्ह्नानी सबैइ नीलाय् धुलाय् त जाङ्ह्सा खेःतो। 11दोह् हायःती दाय्ह्सा परमेस्वर्कोः कीम्कोः तुङःपाय् यातैज्योःलेः गम्ओआः बा ओउःपाय् येसु ख्रीस् लेःआः बा। अरु तुङःपाय् सुइमा गम्सा खाय्नीली। 12ओहाङःसैको ओउः तुङःहाङः यात्नीस् मान्तालम्खेइ पेओ थोक्लम् देती गम्नानी सुन् चान्दीकोः खाल्लम् अरु पेपेओ मनीलम् गम्नानी अरुलम्खेइ सीङः ओन्कोः खाल्लम् गम्नानी। 13ओहाङःसैको ओउः लोन्ते वाङ्सा तय्छनःती योसा दीन्हाङः सबै मान्ताकोः काम्पाय् “पेनाःया पेलया” त छ्यानःओलेः स्याव्नाः। म्हेः तय्क्ओलो लेखालेः तय्छनःती योसा खेःतो। 14सुखे जाङ्ह्ओ काम्पाय् म्हेः तय्क्आक्तीको मुधाङ्नाः त खेःया ओउः मान्तापाय् काम् जाङ्ह्झ्याङ्कोः दोःलेःनाः। 15सुखेकोः काम् म्हीत्ती वाय्तोलेः स्याव्नाः त खेःया ओउःकायः दोह्मा दोःल ओउः मान्तापाय् लयः ह म्हेःसै दल्नाः।
16नीङ्पाय् परमेस्वर्कोः मन्दीर्लो लेखालेः खेःतेःनै बा। नीङ्कोः ल्हुङ्हाङः परमेस्वर्कोः ग्वालामः याक्नाः ओउःत नीङ्इ चीःतेःनीली र। 17सुखे परमेस्वर्कोः मन्दीर् क्रीसीःतो जाङ्ह्चानी ओउःकायःलेः परमेस्वर्इ वाय्नाःथास। दोह् हायःती दाय्ह्सा परमेस्वर्कोः मन्दीर्पाय् पेतो छय्ङ्तो लेःआः बा फेरी नीङ्पाय् ओउःकोः मन्दीर् लेःतेः इ बा। 18नीङ्पाय् सुमा आह्रे दाय्ह्ती “ङापाय् व्हाय्ओ लेःआः ङ” ततेः ताःतेःचाःइसी। सु मान्ता “ङा ल्हाव्ह्दैबाङ्कोः कुरा व्हाय्तोलेः चीःनाङः” त म्हर्चै ओउःपाय् दोङ् चीःमालो मान्तालो लेखा स्याव्आक्पाः। ओउःत स्याव्आक्तीको ह ओउःइपाय् दोङ् पेतो व्हाय्ओ कुरा त्याक्सा खाय्नौ। 19दोह् हायःती दाय्ह्सा मान्तालम्कोः व्हाय्ओ कुरापाय् परमेस्वर्कोः मीक्हाङः भ्यामःओ कुरा लेःआः बा। “व्हाय्ओलम्कोः कुरापाय् परमेस्वर्इ भ्यामःताक्नौ” त दाय्ह्ती दाय्ह्ओ परमेस्वर्कोः आखरःहाङः लेखती मुनाः। 20फेरी “ओउः व्हाय्ओ मान्तालम्कोः कुराकायः प्रभु परमेस्वर्इ चीःती ‘ओउःपाय् आह्रे कुरा लेःआः’ त दाय्ह्नाः” तमा लेखती मुनाः। 21ओउःत झ्यान्ते मान्ताइ जाङ्ह्ओ कुराकायःपाय् नोःओ कुराकायःपाय् “लौ इ ताङ्ह्लेःनाः बा” त लुङ्ती तोतेःचानी। लौ सबै कुरा नीङ्कायः स्याव्आनाः। 22ङा पावुल्मा नीङ्कोः लेःआः आपोलस्मा पत्रुस्मा ल्हाव्ह्दैबाङ्मा नीङ्कोःलेः स्याक्ओमा सीओमा तेन्छ्याङ्कोः कुरामा लोन्तेकोः कुरामा सबै नीङ्कोः लेःआः। 23फेरी नीङ्पाय् ख्रीस्कोः लेःतेः इ ख्रीस्पाय् परमेस्वर्कोः लेःआः बा।
Currently Selected:
१ कोरीन्थी 3: CDM93
Highlight
Copy
Compare
Share
Want to have your highlights saved across all your devices? Sign up or sign in
© 1993 Wycliffe Bible Translators Inc., All Rights Reserved.
