Ai Vola I Sikariya Na Parofita 9
9
Ena vakarurugi ira na nona tamata na Kalou, 1-8. O Saioni, sa vakavulici me rekitaka na nona lako mai na Mesaia, kei na nona lewa loloma, 9-11. Ena gumatua ka tiko vinaka ko ira na nona tamata dina, 12-17.
1AI colacola ni vosa i Jiova me tauca na vanua ko Ateraka, ia ko Tamasiko ena kenai vakavakacegu: ni na sa qaravi Jiova na mata ni tamata, io, na veimataqali nei Isireli kecega. 2Ia ko Emaci talega, e sa voleka kina; o Teiri, ni sa qaseqase sara, kei Saitoni. 3A sa tara ko Teiri na koro kaukauwa me nona, ka binia vata na siliva me vaka na kuvu-ni-soso, kei na koula dina me vaka na oruoru e nai saqata.
4Raica, na Turaga ena biuti koya tani, ka yavita ki waitui na nona kaukauwa; io, ena vakamai ko koya e na buka. 5Ena raica ko Esikiloni, ka rere; o Kesa talega, ka rarawa sara kina; o Ekironi talega, ni sa vakamaduataki e na ka sa vakararavi kina; ni na rusa na tui mai Kesa, ia ko Esikiloni, ena sega ni tawa; 6ena tiko talega e dua na kai tani mai Esitoti, au na muduka talega na nodra viavialevu na kai Filisitia. 7Ia kaʼu na kauta tani na kena dra mai na gusuna, kei na kena ka vakasisila mai na draka ni batina: ia ena vakalaivi ko koya talega me nona na noda Kalou, ia ena yaco ko koya me vaka sa turaga ni Juta, o Ekironi talega, me vaka sa kai Jepusa. 8Ia kaʼu na tiko vakavolivolita na noqu vale e na vuku ni valu, ni sa lako voli mai, ka lesu voli yani: ia ena sega ni lako voli tale mai vei ira e dua na dauveivakasaurarataki: niʼu sa qai raica e na mataqu.
9Mo reki vakalevu, na gonealewa ni Saioni; mo kaikaila, na gonealewa ni Jerusalemi: raica, a nomu Tui ena lako mai vei iko, sa yalododonu, a sa dauveivakabulai ko koya, sa yalomatua, a sa vodo lako e na asa, io, e na asa lailai na luve ni asa. 10Ia kaʼu na muduka tani na vale-vodoki mai Ifireimi, kei na ose mai Jerusalemi; ena muduki tani talega na dakai ni valu; ena tukuna ko koya na veivinakati ki na lewe ni veivanua; ia ena lewa ko koya mai na wasawasa e dua ki na wasawasa e dua, mai na uciwai talega ka yaco ki nai yalayala kei vuravura.
11Ia ko iko, e na vuku ni dra ni nomu veiyalayalati kaʼu sa vakatalai ira tani kina na kai nomu era vesuki, mai nai keli sa sega kina na wai. 12Dou lesu mai ki na koro kaukauwa, oi kemudou sa vesuki ka wawa tiko: io, e na siga o qo kaʼu sa tukuna nai votavota e rua kaʼu na solia vei iko; 13niʼu sa qai yavi Juta me noqu dakai, ka gasautaki Ifireimi me kenai vakatawa, ka vakauqeti ira na luvemu, Saioni, me veivala kei ira na luvemu, Javana, ka sa cakavi iko mo vaka nai seleiwau ni qaqa. 14Ia ko Jiova ena raici me nodrai to, ena lako yani talega na nona gasau me vaka na liva; io, na Turaga ko Jiova ena uvuca na davui, ka kauta lako kaya na covulaca ni mata ni ceva. 15Sai Jiova ni lewe vuqa ena vakarurugi ira, a ra na kanakana, ka butuka sobu na vatu e rabotaki; a ra na gunu, ka kaila, me vaka ni ra gunu waini; a ra na vakamamautaki me vaka na bilo e tawa, ka vaka na tutu ni cabocabo-ni-soro. 16Ia ena vakabulai ira ko Jiova na nodra Kalou e na siga ko ya me vaka na qele ni sipi, io, na nona tamata: ni ra na vaka na vatu dredre e nai sala sa laveti kicake e na nona vanua. 17Ia na kena levu ni nona loloma! kei na kena levu ni nona ka vinaka! na sila, era na bula kina na cauravou, kei ira na gonealewa, e na waini vou.
Currently Selected:
Ai Vola I Sikariya Na Parofita 9: FIJ1864
Highlight
Copy
Compare
Share
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
