Ai Vola I Sikariya Na Parofita 8
8
Ena lomani tale ko Jerusalemi, 1-6. O ira na bobula era na kauti tale mai, 7-17. Sa tukuni nai valavala ni siga ni lolo e vinakata na Kalou; kei na lewe vuqa ni tamata ena lotu mai, 18-23.
1A SA yaco tale vei au na vosa i Jiova ni lewe vuqa, ka vaka,
2Sa vosa vakaoqo ko Jiova ni lewe vuqa; Au a vuvu e na vuku i Saioni e na vuvu levu, io, e na cudru levu au a vuvu kina e na vukuna.
3Sa vosa vakaoqo ko Jiova; Au sa qai lesu mai ki Saioni, ia kaʼu na tiko ga e na loma i Jerusalemi: ena vakatokai talega ko Jerusalemi, me koro daudina; kei na ulu-ni-vanua i Jiova ni lewe vuqa, me ulu-ni-vanua tabu.
4Sa vosa vakaoqo ko Jiova ni lewe vuqa; Ena tiko lako tale e nai saqata mai Jerusalemi na tagane qase kei na alewa qase era dui vakaititoko voli e na vuku ni ra sa qase sara: 5ia nai saqata ni koro ena oso vei ira na goneatagane kei na gonealewa era qito tu e na kenai saqata.
6Sa vosa vakaoqo ko Jiova ni lewe vuqa; Kevaka ena ka veivakarabui ki matadra na vo ni mataqali o qo e na gauna ko ya, me sa ki mataqu beka talega me na vakurabui kina? sa kaya ko Jiova ni lewe vuqa.
7Sa vosa vakaoqo ko Jiova ni lewo vuqa; Raica, au na vakabulai ira na noqu tamata mai na vanua e cadra kina na siga, kei na vanua e dromu kina na siga; 8ia kaʼu na kauti ira mai, a ra na tiko e na loma i Jerusalemi: a ra na yaco me noqu tamata, oi au talega, kaʼu na yaco me nodra Kalou, e na yalodina kei na yalododonu.
9Sa vosa vakaoqo ko Jiova ni lewe vuqa; Me kaukauwa na ligamudou, oi kemudou sa rogoca e na gauna o qo na vosa o qori mai na gusudra na parofita, sa ra tukuna e na siga ka tauyavutaki kina na vale i Jiova ni lewe vuqa, io, na vale tabu me sa tara rawa. 10Ia eliu, ni sa bera ni yaco na gauna ko ya, sa sega na nonai voli na tamata, se na kenai voli na manumanu; ia vua sa curu yani se vua sa curu mai sa sega ga kina na vakacegu e na vuku ni meca: niʼu a dui cakavi ira kece na tamata me veimecaki vakai ira. 11Ia e na gauna o qo ena sega ni vaka e na gauna eliu na noqu cakacaka ki na kena vo ni mataqali o qo, sa kaya ko Jiova ni lewe vuqa. 12Ni na tokara ga na sese: na vaini ena vuavuai, ia ko vuravura ena vuataka na vuana, o lomalagi talega, ena solia na kena tegu; ia kaʼu na cakava na kena vo ni mataqali o qo me taukena na ka kecega o qo. 13Ia ena yaco, me vaka dou a yaco me ka veivakarusai e na veimatanitu, oi kemudou na mataqali i Juta, kei na mataqali nei Isireli; au na vakabulai kemudou, mo dou yaco vaka talega kina, mo ka e veivakalougatataki; dou kakua ni rere, me kaukauwa ga na ligamudou.
14Ni sa vosa vakaoqo ko Jiova ni lewe vuqa: Me vaka niʼu a nakita me caka ka ca vei kemudou, ni ra sa vakacudrui au ko ira na nomudou qase, sa kaya ko Jiova ni lewe vuqa, ia kaʼu a sega ni veivutuni: 15sa vaka talega kina na noqu nakita e na gauna o qo me caka ka vinaka ki Jerusalemi kei na mataqali i Juta: dou kakua ni rere. 16O qo na ka mo dou cakava; Dou dui vosa dina yadua vua na kai nona; na veilewai dina kei na veilewai ni veivinakati mo dou ia e na nomudou veimatamata-ni-koro, 17ia na ca e dui veikitaki, dou kakua ni nanuma e na lomamudou; kei na vosavavakini vakailasu dou kakua ni vinakata: ni sa ka o qo kecega kaʼu sa cata, sa kaya ko Jiova. 18A sa yaco vei au na vosa i Jiova ni lewe vuqa, ka vaka,
19Sa vosa vakaoqo ko Jiova ni lewe vuqa; A lolo e nai kava ni vula, kei na lolo o nai kalima, kei na lolo e nai kavitu, kei na lolo e nai katini ni vula, me sa nodra ka ni reki ga na mataqali i Juta, io, me ka ni marau, ka solevu vinaka; ia na ka dina kei na veilomani dou vinakata ga. 20Sa vosa vakaoqo ko Jiova ni lewe vuqa; Ena yaco talega, ena lako mai na veimataqali, kei na lewe ni veikoro e vuqa; 21a ra na lako mai na lewe ni koro e dua ki na lewe ni koro e dua, ka kaya, Me da mai lako kusarawa me kere loloma vei Jiova, ia me da laʼki qaravi Jiova ni lewe vuqa: au na lako talega koi au. 22Io, ena lako mai na veimataqali e vuqa kei na veimatanitu kaukauwa, me mai qaravi Jiova ni lewe vuqa e Jerusalemi, a me kere loloma vei Jiova. 23Sa vosa vakaoqo ko Jiova ni lewe vuqa; E na gauna ko ya, ena mai taura e lewe tini na tamata era duivosa-vosa kecega ni veivanua, io, era na taura na tutu ni nonai sulu sa kai Jutia, ka kaya, Keitou na lako kei kemudou: ni keitou sa rogoca ni sa tiko kei kemudou na Kalou.
Currently Selected:
Ai Vola I Sikariya Na Parofita 8: FIJ1864
Highlight
Copy
Compare
Share
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
