Kuurotokwe 21

Poolol sip tovi ilomwalo'no wagwolago Jeruusalem'no avlavoka tovinokwono

1Toruda'ai nevu wagwolago Efesosda'ai a'mwono moduvomwallokwe toorai me'no wuugollu'mo'mno sumawoneyokwe sip pwollu mobiyosowono avlavowonogano. Toro toonol soolwaravi ido'nyuno wino sumawoneyokwe aku'momdo Koos toru ai'movowonogano. Toro ki'mo'mno sumawoneyokwe iruko aikomguda'ai tollugwoji kuuno plavowono aku'momdo Roodes toru ai'movowonogano. Aku'momdo su tovi ki'mo'mno sumawoneyokwe sip toolluda'ai bolokwowono wagwolago Patara tomuuno kwokado avlavowonogano. 2Toro toonol plaino sumawoneyokwe wagwolago Patara toru ai'movowonogano. Toro ki'mo'mno sumawoneyokwe sip pwol proovins Foonisiya tomuuno plaiyo'mo yoduke toollu so'mgonomarowonogano. Sip su toollu nuugwiyo mobiyosuno sumawoneyokwe ilomwalowono soolwaravuro wolo su toru kuugollu'movowonogano. 3Toro toonol plaino sumawoneyokwe aku'momdo Saipros tov nemoro kwonamo tomgu wo'duke tovi manyu toruda'ai kwonowonogano. Aku'momdo su tovi uuwoleno sumawoneyokwe proovins Siriya tomuuno avlavowonogano. Toro plaino sumawoneyokwe ajumiyo su tovi ai'movowonogano. Toro ki'mo'mno sumawoneyokwe wagwolago Tairu toru'no plaino sumawoneyokwe ai'movowonogano. Wagwolago ai'movowo su tovida'ai kuto ivito pun a'mwo pworo sip toolluda'ai morosuwoleyo'moneyokwe ai'movowonogano. 4Toro ki'mo'mno sumawoneyokwe nevu Jisasollu uumjunyokwe a'mwo pworai yo'mgonomarowono a'mwo su toorogai 7-pela iruko tobuul amwalowonogano. Toro mwalno sumawoneyokwe a'mwo su tooro Gooti toolluro Kuullo tool mollado'mo'mduke tovi'aro Poolollu duudapi aro kwiyoporogano. “Guu wagwolago Jeruusalem'no milabinekugono.” Kuudoporogano. 5Toro kuudopo kuvi kuruv nevu a'mwo su toorai kaduko mwiyowonogano. Toro te 7-pela iruko su tobuul me'no abawoka toga sip toolluro nuugollu'meyo'moneyokweyogakono. Toro toga a'mwo amwalowo toorogai'aro kemi julkwolaiyo togai'aro ton wagwolago tovida'ai kwa'mguno abomollubworonekumokalokwoponogano. Toro bomollubworonekumokalokwino sumaveyokwe soolwaravuro wolo toru ai'movowonogano. Toro ki'mo'mno sumawoneyokwe yiuwi'nokai tonol suduko inuguto'nowono subusu'nyogalo adowonogano. 6Subusu'nyogalo me'no juno sumawoneyokwe yiuwi'nokai tonol, “Ilaiyokwonoo,” dowono ajapinowonogano. Toro japinyuno sumawoneyokwe nevu sip toollu sulomwalowonogano. Toro ilomwalodowore toga a'mwo su toorogai'aro kemi julkwolaiyo togai'aro ton kemi ago tomuuno aikomgu avlavopogano.

Proofet pwol wagwolago Sisariya'no bo'no Poolollu kuuguudo adubweyoka tovinokwono

7Toruda'ai nevu sip toollu aikomgu me'no ilomwalno sumawoneyokwe wagwolago Tairu towai kuugollu'movowonogano. Toro toonol soolwara tovi wino sumawoneyokwe wagwolago Toolemes toru ai'movowonogano. Toro ki'mo'mno sumawoneyokwe wagwolago su tovida'ai Jisasolluro a'mwo pworai kuuru'marowonogano. Toro toorai aro kuudowonogano. “Oo ilaiyokwono.” Toro wuujuno sumawoneyokwe a'mwo su toorogai iruko pullugwo amwalowonogano. 8#Krt. 6:5, 8:5Toro mwalno sumawoneyokwe iruko aikomguda'ai tollugwoji wuugollu'movowono avlavowonogano. Toro plaino sumawoneyokwe wagwolago Sisariya toru abai'movowonogano. Toro bai'mo'mno sumawoneyokwe a'mwo kuuguudo sugudo tokwe modomollokwe pwolluro ago tovi aulomwalowonogano. A'mwo su toolluno yovo tov Filipolekono. Toro tool aiyoga Jisasolluro a'mwo kuurotokwe toorai wiyo'mwojumwalpino'moneyokwe 7-pela a'mwo ajesopo tooraida'ai pwekono. 9Aki toro tool sujuraiyo aval aval kwolo yere muuma'nodupudo punodotai kuunumiyagekono. Sujuraiyo su tonodoto Gooti toolluro proofet wimo'nodupu gamoro yogalo tokwe moruudodupudogano.

10 # Krt. 11:28 Toro te nevu a'mwo su toolluro ago tovi iruko pubuul mwalodowore toga proovins Juudiya tomuuda'ai proofet pwol wolabo'no abwolonekuru'marokaikono. Proofet su toolluno yovo tov Agabuusolekono. 11Toro tool bwolonekuru'ma'no sumaiyokwe Poololluro muulo tov irolomaro'no gavnokweyolluro suvlato tovallu amoweyollusopinokaikono. Toro mowellusopinyuno sumaiyokwe aro adokaikono. “Muulo akavi jukwo toollu wagwolago Jeruusalemda'ai Juu tooro galomworaropi nuu aikuduuwallumwako aka'busuko moweyollusosupinekono. Yopi a'mwo Juu tooravuro miyawosunodupudo toorai morubwepinekono. Toro wimo'nono tovino Gooti toolluro Kuullo tool toro anyudadopiyo.” Anekudokaikono.

12Toro doduke tovi nevuge'aro a'mwo ago tovi aulomwallajupo togai'aro tonol wuu'nowono Poolollu kumdo aro ajugonowonogano. “Guu wagwolago Jeruusalem'no nyulabiyo.” 13Toro kuudowo kuvi kuruv Poolol aro anekudokaikono. “Kevu mino buro'nyo'mo kumdo dodadokwovo? Kemoro kumdo adadokwopo tovi nuu ikuu'nodum kalo nonyunoduke kwonyu kuruv kevu manumjukupinogaikikono. Nuu wagwolago Jeruusalem'no plavo'mi ki'mo'mdo'mure toonyu wuulo tokwe agaleranbwepi tov nokwo'mokwono. Aki mi Aguto Jisasolluro yovo tovida'ai aromiyanubwepi kuruv nokwo'mokwono. Nuu su toro nonyumo'nono tonyuno luko miyodum kuudo me'no sovrowosunmwakonyugono.” Anekudokaikono. 14Poolol toro nekujuno sumaiyokwe nemi kaduko nekullo'mo mwinokaikono. Toro toolluno tov nevu aki aiko te guureji uumjukullo'mo muudowonogano. Toro kuvi kuruv yiuno aro to'no kuudowonogano. “Oo kurukwono. Aguto toolluro winodowo'jure tovi kuvinono agujumo'no'ji tov ilaiyokwonoo.” Kuudowonogano.

Pooleke tooro wagwolago Jeruusalem toru ai'movopo tovinokwono

15To'no'gwowi iruko pubuul me'no mwalno sumawoneyokwe wagwolago Jeruusalem'no plaiyo'moneyokwe sovraimwonyowonogano. Me'no yovraimwonyuno sumawoneyokwe wuugollu'movowono wagwolago Jeruusalem'no avlavowonogano. 16-17Toro pla'mdowore toga wagwolago Sisariyada'ai Jisasolluro a'mwo pworo nemi nekumjuno'mno nevu a'mwo su toorogai avlavowonogano. Toro plaino sumawoneyokwe wagwolago Jeruusalem toru abai'movowonogano. Toro bai'mo'mno sumawoneyokwe a'mwo anekumjunopo su tooro a'mwo pwolluro ago tovino amollubworonekumokavlavoponogano. A'mwo su toolluno yovo tov Nasoonolekono. Toro tool aku'momdo Saiprosda'aiyekono. Aki a'mwo su tool muudu'nodo togasuro Jisasolluno kuudo kuubweyoka pwekono. Toro tooke mwallo'moneyokwe gamoro ago tomuuno amollubworonekumokavlavoponogano. Toro mollubworonekumokavla'mno sumaveyokwe gamoro ago toru ai'movowonogano. Toro ki'mo'mdowore toga wagwolago Jeruusalemda'ai Jisasolluro a'mwo pworo nemi nekuru'maro'mno ilaiyo amollonekumaroponogano.

18Toruda'ai iruko aikomguda'ai tollugwoji nevu Pooleke toonol Jisasolluro a'mwono moduvomwallokwe pwollu iru'mato wiyo'moneyokwe avlavowonogano. A'mwo su toolluno yovo tov Jemsolekono. Toro toollomno plaino sumawoneyokwe Jemseke'aro yiuwi'nokai Jisasolluro a'mwono moduvomwallokwe toorogai'aro tooro gamoro ago tovi i'bwo'nomwalodopure toorai kuuru'marowonogano. 19Toro wuuru'ma'no sumawoneyokwe Poolol a'mwo su toorai, “Ilaiyokwonoo,” wuudo'no gamoro womdo somollajuko tovino kuuguudo tov pi'mwono aro kuudokaikono. “Nuu a'mwo Juu tooravuro miyawosunodupudo toorai kuuguudo sugudo tokwe amoruudomollajonyugono. Toro moruudomollodore toga Gooti tool a'mwo su tooravuro poowokalago tonyu womdo bwotonyo kwiyajukekono.” Poolol toro wuujuno sumaiyokwe yiuwi'nokai judo'no judo'no sumo'nyajuko tonyuno kuuguudo tov pi'mwono toro kuudokaikono.

Poolollu Gooti toollu ilomoropiyo'moneyokwe ago tovi kuulawono'moneyokwe amodapiyopo tovinokwono

20Toro kuudoka tovi wuu'no'mno yiuwi'nokai Jisasolluro a'mwono moduvomwallokwe tooro Gooti toolluno sulomoropiyaporogano. Toro ilomoropino sumaveyokwe Poolollu aro kuudoporogano. “Nevugeloo, guvnokwe tooku aro kuudo me'no youroma'dumdekugono. Juu a'mwo abolo tonyuda'ai bwotonyago ton Jisasolluno kuudo uubweyo'mno gamoro a'mwo abolo me'no wimo'nodupudogano. A'mwo abolo su ton kula'nyonmaiyo. Kwolallo tausen tausen tomgu'arogano. Jisasolluno kuudo kuubweyopo kwolallo su ton Moosesolluro loowo tonyu guureji uumjunyo'moneyokwe kuuno winodupudogano. 21Aki kwolallo su tonyuro pun gumino puu'yogalo aro bomjodumoulodapudogano. Poolol Moosesolluro loowo tonyu muumjunyo'mo tool molluduvolno yokwekono. Toro tool Juu pworai yodubwasodowodekono. Juu su tooro a'mwo Juu toonolluro miyawosunodowado pworai wobo toru mwalodupudorogano. Toro mwalodopure toorai aro yodubwasodowodekono. Kevu Moosesolluro loowo tonyu dodukwopiyogaulo. Aki kemi kwolaiyo tooravuro lakulkulako ton mamado'mwalpinorekikono. Aki nevu Juu toonolluro pasudo judo'no judo'nodo tonyu muumjunpinono. Poolol toro yodubwasodowodekono. Gumino puu'yogalo su toro bomjodumoulodopure tovi bwotonyago ton me'no wuu'nopiyodupudokwono. 22Toro wuu'nopiyodupudo ton aga gumino tov, Me'no abai'mo'mokaikono, kuu'nupi tov gumi kaiyako nogujupiyokwe 23nevu yogalo puruv me'no ajourosumwakuuwonogano. Nemoro yogalo ajourosumwakuuwo tov arokwono. Nevnokwe amwakuuwo akanolluro a'mwo aral aral pworo Gooti toollu subuu'yamju me'no kwiyoporogano. Toro me'no kwiyopo tovino duuwallo'moneyokwe pris pworo kemoro midoto ton madopinorogano. Aki nemoro aguda'ji akavi guu neya duumjunono. 24A'mwo aral aral su toorogai'aro guuge'aro toorekul Gooti toollu ilomoropiyo'moneyokwe ago tovino plavopi kemoro midoto ton madopino'moneyokwe mubiyo tov guu neya duubiyono. Aki guu a'mwo su toorogai uuguro'mwonyo'bi Gooti toolluro sumdo tovi sugudo imo'nyo'moneyokwe yovraimwonyumwalpinorekikono. Guu a'mwo aral aral su toorai kemi midoto ton madopino'moneyokwe toro kwiyo'mwojubi tovi a'mwo abolo ton gwonopi kuudo yaguupinogano. Oo Poolol kwol kuruv nevu Juu tonolluro loowo tovi uumjunodowodoldeyo. Toro kuudo yaguuropi gumino puu'yogalo bomjodumoulodopure tovi muu'nyubusuko to'no imwalpinogano.” Jeruusalemda'ai Jisasolluro a'mwono moduvomwallokwe tooro toro kuudoporogano. 25#Krt. 15:29Aki a'mwono moduvomwallokwe su tooro a'mwo abolo Juu tooravuro miyawosunodupudo tonyuno'gwowi aro adomwaloporogano. “Nevu muudu'nodo toga a'mwo abolo Juu toonolluro miyawosunodowado pun Jisasolluno kuudo me'no uubweyodupudo su tonyu pas puruv me'no sokwolluwapiyowonogano. Pas su tovi nemoro kuuguudo adomduukuurosowo tonyu neya uumjunmwalpino'moneyokwe aro sokwolluwapiyowokwono. Kevu wosamujuko pun kuunano gooti pworai me'no kwingiko tonyu nonyo'mo kumako neya domwalogaulo. Aki muugupto pworo mujako kuuno wo'dowo'jure tooraino kumako domwalogaulo. Aki allukuulolo tooro boruko tovi'aro aromiyogubulosungiko toorai manmwalpinogaikikono. Aki kevu kwonyalo mimwalpinogaikikono. Su toro yogalo ton pas tovi me'no sokwolluwapiyowokwono.” Adomwaloporogano. 26Toro domwalno sumaveyokwe Poolol a'mwo Gooti toollu subuu'yamju me'no kwiyopo aral aral toorai momworaro'no abomokalokwokaikono. Toro bomokalokwino sumaiyokwe iruko aikomguda'ai tollugwoji Poolol a'mwo su toorogai me'no yovraimwonyo'mno yiuwi'nokai tooro Gooti toollu ilomoropiyo'moneyokwe ago tovuro agwapto toru'no aulaporogano. Toro kuulno sumaveyokwe Poolol pris kuulomwalodopure pworai kuu'maiyo toru'no aro auluudokaikono. “Nevu 7-pela iruko tobuullu yovraimwonyano'monogano. Iruko su tobuullu me'no yovraimwonyowa'ji sugudo me'no sumo'na'ji toga pwolno pwolnodo toonol nemi noromiroudapiyo'moneyokwe sipsiporodeyo toorai mokabowa'ji Gooti toolluno boromiroudapiyanonogano.” Kuudokaikono.

Poolollu Gooti toollu ilomoropiyo'moneyokwe ago tovuro agwapto toru agalomworaropo tovinokwono

27Toruda'ai 7-pela iruko su tobuul nuuwoleyo'mo yoduke toga kwako Esiya tomuuda'ai Juu kwolabopo pworo Gooti toollu ilomoropiyo'moneyokwe ago tovuro agwapto tovi kuula'mno Poolollu auloonoporogano. Toro kuuloonyuno sumaveyokwe a'mwo abolo kuullu'bwo'nodopure tonyu Poololluno surodo ipureyokweyo'mo auloju'gwoloporogano. Toro ju'gwolno sumaveyokwe kwolallo ton surodo yo'mno Poolollu agalomworaropekono. 28Toro galomwora'no sumaveyokwe deko aro adopogano. “Isuraiyolda'ai a'mworavoo, kevu bopi banekullo'mwojulo! A'mwo akal nemi kaiyako maluko mojugolanekumeyokwekono. Toro tool yiuwi'nokai yomollodowodo tomuu a'mwo abolo tonyu nemi bwolomonekumwogapiyo'moneyokwe kuuguudo yodubwosumollodowodekono. Nevu Isuraiyolda'ai tonogai'aro Moosesolluro loowo togai'aro aki Gooti toollu ilomoropiyo'moneyokwe ago akakwe'aro tonolluno bwolomonekumwogapiyo'mo yogalo yodubwosumollodowodekono. Aki toro tool puga a'mwo Juu tooravuro miyawosunodupudo pworai Gooti toollu ilomoropiyo'moneyokwe ago tovuro agwapto akavi yasuwa'no amokaulabokaikono. Toro amokaulaboka tovino tov Gooti toolluro pwekwapto akaru kaiyako sugolamovokaikono.” Adoporogano. 29#Krt. 20:4Toro adopo tov aro tovinokwono. Sumdomgu toga Pooleke'aro Efesosda'ai a'mwo pweke'aro tooral wagwolago Jeruusalem toru yomollodole toorallu a'mwo pworo me'no kwonoporakono. Efesosda'ai a'mwo su toolluno yovo tov Troofimasolekono. A'mwo su tool Juu tooravuro miyawosunopekono. Toro tooral wagwolago Jeruusalem tomuu puuto tovi yomollodole toga a'mwo abolo ton wono'mno kuudo sauropogano. Oo Poolol Moosesolluro loowo tovi kisuvolo wiyo'no a'mwo Juu tooravuro miyawosunopo su toollu Gooti toollu ilomoropiyo'moneyokwe ago tovuro agwapto toru amokaulokaldeyo. Toro kuudo sauropo kuvi kuruv Poolol su toro miyokaikono.

30Toro te a'mwo su tooravuro deko adopo tovi wagwolago Jeruusalem toru bomje'nugoulno sumaiyokwe yiuwi'nokai a'mwo abolo ton kuu'nopokwono. Toro wuu'nyuno sumaveyokwe surodo wuuno'mno Gooti toollu ilomoropiyo'moneyokwe ago tovuro agwapto toru'no kano kano bino sumaveyokwe Poolollu abogalomworaropogano. Toro bogalomworaro'mno kwa'mgu tomuuno abome'nomokalokwopekono. Toro bome'nomokalokwodopure kuga'gwo kuuno a'mwo pworo Gooti toollu ilomoropiyo'moneyokwe ago tovuro kudo'aiko ton yere amallukuroporogano.

Roomda'ai a'mwo mollurogudo pworo Poolollu ameromokavlavopo tovinokwono

31Aki kwolallo su tooro Poolollu romiyoso'mo jaunodopure tovino a'mwo pworo Roomda'ai a'mwo mollurogudo tooravuro aguto pwollomno kuurokado amokavlavoporogano. Toro amokavlavopo tovi a'mwo aguto su tool wuu'no'no aro kuudo saurokaikono. E, yiuwi'nokai wagwolago Jeruusalemda'ai a'mwo abolo ton surodo'mo yodupu molo dukojadokwovo. 32Toro kuudo yau'no sumaiyokwe a'mwo mollurogudo pworogai'aro aki mollurogudo tooravuro mido mollomwalokwe pworogai'aro toorai yere aju'bworomarokaikono. A'mwo mido mollomwalokwe su tooro 100 a'mwo mollurogudo toorai mido amollomwallajuporogano. Toro toorai ju'bworoma'no sumaiyokwe kwolallo su tonyomno amollubworomokwolabokaikono. Toro mollubworomokwolaboduke toga a'mwo Poolollu iwago aromiyajupo tooro a'mwo mollurogudo tooravuro aguto toollu wono'mno kuumwogapiyoporogano. 33Toro uumwogapino sumaveyokwe mollurogudo tooravuro a'mwo aguto tool gami mollurogudo pworai aro amodapiyokaikono. “Kevu Poolollu dogaleromworallulo. Toro yopi senyo wuulo puruvake domerosulo.” Toro modapino sumaiyokwe a'mwo mollurogudo tooro kuvinono soporogano. Toro ino sumaveyokwe a'mwo aguto tool kwolallo tonyu aro samuugojokaikono. “A'mwo su tool ala'mwoldeyo? Aki toro toollu kevu iwago aromiyadokwopo tov buro'nyo'mo'mdeyo?” 34Toro samuugojoka tovi kwolallo su'bwo'nyajupo ton kuuguudo go'no go'nodo ton adelowo'nugoulapogano. Toro delowo'nugoulodopure tovino tov mollurogudo tooravuro aguto tool kavlo tovino noo'nookwo sokaikono. Toro ino sumaiyokwe gami mollurogudo toorai kuuguudo aduuwiyokaikono. “Kevu Poolollu momworaropi nemoro ago jurogudo tovino domollubworomokavlaiyulo.” 35Toro duuwino sumaiyokwe a'mwo mollurogudo tooro Poolollu amollubworomokavlavopekono. Toro mollubworomokavla'mdopure kuvi kuruv kwolallo tono'gwowi mollurogudo su toorai kuumjunopogano. Toro uumjunyuno sumaveyokwe Poolol mollurogudo tooravuro ago tovino i'deko tovi ki'mo'mduke toga kwolallo su ton Poolollu kaiyako guureji igollo'moneyokwe alo'nugoulapogano. Toro lo'nugoulodopure tovino tov mollurogudo tooro Poolollu kaiyako nuuwipiyokwe amollukwovopekono. 36Toro mollukwo'mno sumaveyokwe kemoro ago tovino amokailapekono. Toro mokailodopure kuga kuruv a'mwo kwolallo ton deko guureji aro aduumjunopogano. “A'mwo su tool neya abolonoo!” Aduumjunopogano.

Poolol Juu toorai gavnokweyolluno kuudoka tovinokwono

37Lukomgu a'mwo mollurogudo tooro Poolollu anoullo tovino nomokaullo'mo yodopure toga Poolol mollurogudo tooravuro a'mwo aguto toollu aro kuudoganokaikono. “Nuu kuuguudo pwekwo nokwo gudumonyudeyo?” Kuudoganokaikono. Poolol Grik yogaljo tovida'ai toro kuudoganoka tovi a'mwo aguto su tool wuu'no'no Poolollu aro kuudokaikono. “E, guu Grik yogaljo dodadokuuno. 38Muudu'nodo toga nuu gumino tov Ijupda'ai a'mwo pwoldeyo, kuudo yaguu'dumdekugono. Aro kuudo saguullajonyugono. Oo a'mwo akal kwako Ijup tomuuda'ai nemoro gavman tovi uuwoleyo'moneyokwe molo kwiyoka tooldeyo. Toro tool 4,000 a'mwo pworo kwallu'mopto togai molo yodupudo toorai momworaro'no kwako a'mwomaiyo kuu'maiyo tomuu amollubworomokavlaiyajuko tool kwoldeyo. Kuudo yaguu'dumdekugono. Toro yaguu'dumdo kuvi kuruv aga'no'gwowi aro kuudo souroguma'mono. Oo a'mwo akal kwolmaiyo.” 39Toro kuudoka tovi Poolol kuudokaikono. “Gumoro adumado tov kuvigono. Nuvno'gwowi Juu a'mwo pwonyugono. Toro toonyu proovins Silisiya wo'dowodo wagwolago Tasos tomuuda'ai sonmaroponyugono. Moro wagwolago su tov yovo agutokweyorukono.” Poolol toro wuujuno sumaiyokwe aro kuudoganokaikono. “Nuu a'mwo kwolallo deko adelowo'na'mwakopo su tonyu kuuguudo pwekwo wuujo'mo anyunadopiyo. Toro te guu nuwonyapino nokwo ibinekudeyo?” Kuudoganokaikono. 40Toro kuudoganoka tovi a'mwo aguto su tool kuudokaikono. “Yowa'nogano, nokwo wuudubinekugono.” Toro wuujuno sumaiyokwe Poolol i'deko tovi muunyu toru sulodavokaikono. Toro iloda'mno sumaiyokwe gami ato tov bomokaila'no kwolallo deko delowo'na'dopure tonyu kavo amwalpureyokwe aduullukurokaikono. Toro duulluku'no sumaiyokwe kwolallo su ton mago maro'moulodopure toga Hibruu yogaljo tovida'ai kuuguudo kuudokaikono.

Currently Selected:

Kuurotokwe 21: SMB

Highlight

Copy