Kuurotokwe 12

Kig Herootol Jemsollu romiyoso'no aki Pitallu wuulo amerosoka tovinokwono

1Toro toga a'mwo aguto kig Herootol Jisasolluro mollu'bwoto pubuurai kaiyako sugollajukekono. 2Toro sugollajuko su tool a'mwo pworai amodapiyokaikono. Toro amodapiyoka tovida'ai a'mwo su tooro plaino sumaveyokwe Joonolluro gadai'yago Jemsollu molo'mo kwallu'mopto tokwe aromiyosopekono. 3Toro aromiyosopo tovino Herootol adokaikono. “Oo moro su toro yodore tovino a'mwo Juu tooro ilaiyo jadokwovo.” Toro juno sumaiyokwe aki aiko te pworai amodapiyokaikono. Toro amodapiyoka su tooro plaino sumaveyokwe Pitallu galomworaro'mno wuulo amerosopekono. Pitallu toro amerosopo su toga lubullu doto puruv Bret Yisomaiyokwe tovi sonomwalopogakono. 4#Moll. 12:1-27Toro te Pitallu merosuno sumaveyokwe duuwato'moneyokwe a'mwo mollurogudo 16-pela pworai amoduvomwalloporogano. 16-pela mollurogudo su tooro aral aral muudukuu'nodupudo kworo kuruv yiuno avalo puru'monodowakono. Toro towa puuwa puga amoduvomwallajuporogano. Aki puuwa puga amoduvomwallajuporogano. Wuulo killo'mo ago tovi toro amoduvomwallajuporogano. Pital wuulo killo'mo ago su tovi toro kuule'na'duke toga Herootol a'mwo abolo tonyuro sumdo tovi Pitallu kooti yogalo duuwiyo'mo kwinoka kwol kuruv yere maduuwiyokaikono. Su tov aro tovinokwono. A'mwo abolo su ton lubullu doto puruv me'no yonopiyopi kooti yogalo duuwiyo'moneyokwe sogwollo ainokaikono. Lubullu doto su tovino yovo tov Muunyu Toru'aro Surukuruwolovoka lubullu dotoveyokwono. 5Toro tovino sogwollo kuuno kinyuno sumaiyokwe a'mwo duuwatokwe tooro Pitallu wuulo killo'mo ago tovi toro amerosopekono. Toro amerosopo toolluno Jisasolluro mollu'bwoto tobuuro Gooti toollu subusu'nyogalo guureji kuujajupogano.

Ensel pwol Pitallu wuulo killo'mo ago tovida'ai abomollurolovomokalokwoka tovinokwono

6Toruda'ai Herootol Pitallu kooti yogalo duuwiyo'moneyokwe iruko pullugwo me'no ajesokaikono. Iruko ajesoka su tollugwo nobai'meyo'mo surakuuto toga Pital wuulo killo'mo ago tovi sa kwollajukekono. Pital toro wo'duke toollu gamoro ato puul a'mwo duuwatokwe pwolluro ato tovi'aro senyo wuulo tokwe amerosopekono. Aki Pitalluro ato pumguda'ai puul a'mwo duuwatokwe gabovo pwolluro ato tovi'aro amerosopekono. Toro te Pital a'mwo duuwatokwe su tooralluro akuuto toru wo'dowo sa kwollajukekono. Aki a'mwo duuwatokwe pworal wuulo killo'mo ago tovuro noullo toru aduvomwallajulorakono. 7Pital toro wo'duke toga Aguto toolluro ensel pwol yere bino sumaiyokwe abwiyalo'nokaikono. Aki bako bwotonyo tov wuulo killo'mo ago tovi anakuuto tomuu aulowopiyokakwono. Toro pwopino sumaiyokwe ensel tool bo'no Pitallu gamoro yagwo tovi'aro wuudukuuro'no kuudokaikono. “Yere dodukavono.” Toro kuudoka toga Pitalluro ato tovalluda'ai senyo wuulo amerosopo toval ikwolopino sumaleyokwe kwako tovi abwoloralovakono. 8Toro bwoloo'no sumaleyokwe ensel tool Pitallu aro kuudokaikono. “Gumi muulo tokwe'aro suulpweyo tokwe'aro toval yere domollosono. Yo'bi gumi nobwaiyo tokwe'aro mobwa'no'bi mi donumjunono.” Kuudokaikono. 9Toro kuudoka tovi Pital kaduko wino sumaiyokwe kuvinono kuumjunokaikono. Toro tooral wuulo killo'mo ago tovida'ai buugollu'mokalokwiyo'mo alokwolorakono. Toro lokwino sumaleyokwe Pital aro kuudo miyaurokaikono. Oo ensel tool anyu'mwojadopiko akav nebal'no donyumo'nadopiyo. Kuudo miyaurokaikono. Toro kuvi kuruv, yiuno wojo to'no juwo'nadokwono, kuudo saurokaikono. 10Toro tooral lokwino sumaleyokwe duuwatokwe muudu'nodo pwollu irukuruwolovolno aki duuwatokwe gabovo pwollu surukuruwolovolorakono. Toro irukuruwoleno sumaleyokwe noullo aiyowo'mo tovi sulai'movolorakono. Noullo su tov aiyon kudo'aiko tokwe da'mdowodokwono. Aki toro tov wagwolago tomuuno lokwiyo'mokwono. Toro towai ilai'mo'mno sumaleyokwe da'mdole toga kudo'aiko gavnokwe su tov me'no ausudavokakwono. Toro ausudavoka tovi'aro Pitaike'aro ensel tooke'aro tooral alokwolorakono. Toro lokwino sumaleyokwe puuto puvi avlavolorakono. Toro plavolno ensel tool Pitallu yere kuugollu'movokaikono.

11Su toro kuugollu'movoka toga'no'gwowi Pitalluro kuudo tov kuu'maiyo toru'no abuuwi'movokaikono. Toro tool aro kuudo saurokaikono. Oo nebalo'mdeyo. Aguto toolluro ensel amonuwopiyamoka tool Herootolluro jurogudo tovida'ai abomollurolovonumokalokuumokaldeyo. Aki Juu tooro kaiyako me'no sanyugolopujuko kwonyu kuruv ku'nono miyanyugolmaponyudeyo. Kuudo saurokaikono. 12Pital kuu'maiyo toru'no toro me'no youroma'no sumaiyokwe Mariyavuro ago tovino kuuwokaikono. Mariyav Joonollu ganeyagokwono. Joonolluno yovo puruv Makolekono. Aki Mariyavuro ago su to kuvi a'mwo abolo bwotonyago ton i'bwo'nomwalodupu subusu'nyogalo adomwallajupogano. 13Toro domwalodopure toga Pital wino sumaiyokwe agwapto tovuro noullo toru ki'movo'no kudo'aiko tovi iwago aromiyokaikono. Toro aromiyoka tovi abolo womdokwe puruv wuu'no'no abokakwono. Abolo su tovino yovo tov Roodavokwono. 14Toro tov Pitalluro yogaimaguurai tovi wuu'nyuno sumaiyokwe me'no suworovomarokakwono. Toro tov ilaiyo bwotonyo soka tovino tov kudo'aiko tovi yere mausokakwono. Toro kuvi kuruv ago tovino aikomgu kano kano kuula'no a'mwo abolo tonyu aro auluudokakwono. “Pital agwapto tovuro noullo toru akaibwol abodapso.” 15Toro kuudoka tovi a'mwo abolo ton wuu'no'mno aro kuudopogano. “Awi, abolo aka'guu amomo to'guubusuko migwanogwano ajuwo'nadokuuno.” Toro kuudopo kuvi kuruv abolo su tov aki aiko te guureji kuudokakwono. “Pital kwa'mgu toru adapso.” Toro kuudoka tovi a'mwo abolo su'bwo'numwallajupo ton sajunopogano. “Oo abolo akav Pitalluro ensel toollu kwonmoka tovino aboulanekudadopiyo.” Sajunopogano.

16Toro yajunodopure toga Pital kudo'aiko tovi aki aiko te iwago romino romino sokaikono. Toro romiyoduke toga a'mwo abolo ton bo'mno kudo'aiko tovi abilausopogano. Toro kuusuno sumaveyokwe Pitallu wono'mno luko amorumoukuropiyopogano. 17Toro yodopure tonyu kavo mwalpino'moneyokwe Pital gami ato tokwe ibwaso'no kuullukurokaikono. Toro wuulluku'no sumaiyokwe aki Aguto tool wuulo killo'mo ago tovida'ai amollurolovomokamoka tovino kuudokaikono. Toro wuujuno sumaiyokwe aro amodapiyokaikono. “Kevu Jemseke'aro yiuwi'nokai Jisasolluro a'mwo abolo togai'aro tonyu mi anyumo'numoka akavino jodubwasulo.” Amodapiyokaikono. Pital toro me'no modapino sumaiyokwe surakuuto su tollugwoji wuugollu'mo'mno sumaiyokwe pumuuno avlavokaikono.

18Toruda'ai lomwo sullourosoka toga wuulo killo'mo ago tovida'ai a'mwo duuwatokwe tooro Pital wuulo killo'mo ago tovi mamwaloduke wonyuno sumaveyokwe noo'nookwo yo'mno luko soporogano. Toro tooro aro sajunoporogano. “Awi, Pitallu buro'nyove tov kwimo'numokaldukono?” Sajunoporogano. 19Toro yajunodopure tovi Herootol wuu'no'no Pitallu yo'mgonomapino'moneyokwe a'mwo pworai amodapiyokaikono. Toro amodapiyoka kworo kuruv Pitallu miyo'mgonomaropekono. Toro te Herootol a'mwo mollurogudo aduuwallajupo toorai me'no wuudoganyuno sumaiyokwe a'mwo su toorai yiuno'no aromiyosokaikono. Toro romiyosuno sumaiyokwe Herootol lukomgu kwako Juudiya toru wuugollu'movo'no wagwolago Sisariya'no kwolokaikono. Toro wolno sumaiyokwe wagwolago su tomuu amwallajukekono.

Herootol aboloka tovinokwono

20To'no'gwowi a'mwo aguto kig Herootolluro mido amollomwallajuko kwako tomuu wosamujuko bwotonyago kwollajukokwono. Toro wo'duke tomuuno wagwolago Tairuke Saidoonke tovalluda'ai a'mwo abolo ton bodupu wosamujuko ton abiyomorabiyajupogano. Sumdomgu toro sajupo kuvi kuruv lukomgu Herootol a'mwo abolo su togai yogalo yajuno'mno surodo kuunokaikono. Toro kuunoka toga wagwolago su tovalluda'ai a'mwo abolo ton wosamujuko ton biyomorabiyo'mo supto sopogano. Toro tovino tov wagwolago su tovalluda'ai a'mwo pworo Herooteke kuuguudo domwalopi sumwoluko kavo nokwo wosunanoldukoneyokwe tovino aboporogano. Toro tooro bino sumaveyokwe muudu'no Herootolluro womdo agutokwe a'mwo pwollu abuuru'maroporogano. Toro toolluno yovo tov Blastosolekono. Toro tool Herootolluro sa wo'dowodo ago tovida'ai mido mollomwalokwe agutekono. A'mwo su toollu buuru'ma'no sumaveyokwe ne'nomallo'moneyokwe ilaiyo amolloporogano. Ilaiyo toro me'no molluno sumaveyokwe a'mwo aguto su tool plavo'no a'mwo abuuru'maropo su tooraino Herootollu kuudokaikono. Toro kuudoka tovi Herootol wuu'nyuno sumaiyokwe a'mwo su toorogai i'bwo'nyo'moneyokwe iruko pullugwo ajesokaikono.

21Toro jesuno sumaiyokwe iruko su tollugwo abai'movoka toga a'mwo abolo Herootolluro kuuguudo tovi kuu'nallo'moneyokwe abi'bwo'nopogano. Toro bi'bwo'nodopure toga Herootol gavnokweyolluro a'mwo aguto kig toolluro youro sugudo ton mollosuno sumaiyokwe abokaikono. Toro bino sumaiyokwe gami a'mwo aguto kig toolluro nyulomwallo'moneyokwe toru abomwalokaikono. Toro bomwalno sumaiyokwe a'mwo su'bwo'nomwalopo su tonyu kuuguudo pun kuudokaikono. 22Toro wuudoduke tovi a'mwo abolo su ton wuu'nyuno sumaveyokwe aro adelowo'naropogano. “Oo a'mwo kuuguudo anekudadopiko su tool a'mwo kuunodolmaiyo. Toro kwol kuruv gooti pwekono.” Adelowo'nugoulapogano. 23Toro delowo'nugoulodopure kuga'gwo kuuno Gooti Aguto toolluro ensel pwol bino sumaiyokwe Herootollu aboromiyosokaikono. Su toro aromiyosoka tov aro tovinokwono. Herootol a'mwo abolo gamino ilomoropiyodopure tonyu maduullukurokaikono. Aki Gooti toolluno milomoropiyokaikono. Toro kwol kuruv gavnokweyol ilomoropunyu yodowo nokwo wonyapino to'no sokaikono. Toro soka tovino tov ensel toolluro kuubweyoka tovida'ai avluko tooro gamoro sumwoluko tovi nugoulno nugoulno sumaveyokwe yiuno'no abolokaikono.

24Toro kuvi kuruv Jisasolluro kuurotokwe toorono'gwowi Gooti toolluro yogalo tokwe kuuno amoruudomollajuporogano. Toro moruudomollodopure tovida'ai kuuguudo sugudo tov yiuwi'nokai tomuu abomje'nugoullajukokwono. Toro bomje'nugouloduke tovida'ai a'mwo abolo ton wuu'nodupu kuudo kuubweyajupogano. Aki toro ton jurogudo sumo'nyajupogano.

25Toro yodopure toga Banabaseke Sooleke tooral wagwolago Jeruusalem towai kemi womdo ton me'no yopino sumaleyokwe Joon Makolluda'ai momworarolno Antiyook'no aikomgu amokailabolorakono.

Currently Selected:

Kuurotokwe 12: SMB

Highlight

Copy