Ezequiel 1
1
Laj yil slequilal yutsilal Dios ta xch'ulel li Ezequiele
1-2C'alal ja'o te oyun ta ti' muc'ta uc'um Quebar ta Babilonia banamil yo' bu chucbiluncutic batel jchi'uc yantic jchi'iltaque, laj quil ijam li vinajele;#Ap 19.11. te laj quil ta jch'ulel li Diose. Ja' ta yo'bal c'ac'al stsacoj xchanibal u ta slajunebal xcha'vinic (30) jabil, ja' yo'bal jabil xa'ox xchuquel batel ta Babilonia ec li ajvalil Joaquine.#2 R 24.10-16; 2 Cr 36.9-10. 3Te la sc'opanun Muc'ul Dios vu'un li pale Ezequielune, vu'un li xnich'onun Buzie. Te laj yac' tal svu'el stsatsal ta jtojol ti c'alal te oyun ta ti' uc'um Quebar ta yosilal caldeetique. 4Te laj quil iloc' tal jun muc'ta tsatsal ic' ta stuq'uil norte, xchi'uc jun muc'ta toc capal ta c'oc', sts'ayayet ta joyob li toque. Te ta o'lol li c'oq'ue oy c'usi te oy xco'laj xchi'uc bronce lec xch'ulet. 5Te ta o'lol noxtoque oy chanib c'usi te oy,#Ex 25.18-22; 1 R 6.23-28; Ap 4.6. cuxajtic yilel, xco'laj xchi'uc cristiano. 6Li jujunique chanjot satic xchi'uc chanib xiq'uic. 7Li yacanique tuc' telajtic. Li xpoch'omal yacanique cha'xol jech chac c'u cha'al yacan bic'tal vacax. Xlebte-lebteic ta q'uelel jech chac c'u cha'al bronce ti lec juxbile. 8Ta yolon li xiq'uic ta xchanjotal xoconique oy jujun sc'obic jech chac c'u cha'al sc'ob cristiano. 9Li xiq'uique snupanoj sba sni'. Mu persauc chjoyijic ti bu jotucal chbatique; te no'ox tuc' chbatic yu'un oy yelov ta jujujot xoconic. 10Li chanjot satique yantic o ta q'uelel. Li sat ta jtuq'uile xco'laj xchi'uc sat cristiano. Ta bats'ic'obe xco'laj xchi'uc sat león; ta ts'ete xco'laj xchi'uc sat tot vacax; ta spate xco'laj xchi'uc xic.#Ez 10.14; Ap 4.7. 11Li xiq'uique xlich'anojic ta toyol, snupanoj sba sni' yu'unic; li yan chibe ja' tsmac o sbec'talic. 12C'alal chanovic batel jujunique, te no'ox tuc' chbatic ti bu ch-ic'atic batel ta svu'el Diose; mu persauc tsjoybin sbaic ti bu jotucal chbatique. 13Te ta o'lol, oy c'usi xco'laj xchi'uc c'oc' tsanajtic jech chac c'u cha'al ac'aletic,#Ap 4.5. jech chac c'u cha'al jch'om toj te xjoyet ta o'lol yu'unic. Li c'oq'ue xojoban no'ox, te sjislajet loq'uel sacsevul noxtoc. 14Li chanib c'usi cuxajtic yilele yalel muyelic no'ox; ja' jech chanovic jech chac c'u cha'al sacsevul.
15C'alal ja'o jq'ueloje, te laj quil jujun yacan careta ta banamil ta stuq'uil li jujunique. 16Li chanib yacan careta yilele co'ol x'elan pasbilic, sts'ayayet jech chac c'u cha'al crisólito ton. Te ta yut li jujune xco'laj xchi'uc oy yan bic'tal yacan careta yilel noxtoc. 17Li chanib yacan careta yilele xu' tstserujic batel ta xchanjotal xoconic ec. Mu persauc joybinel tsc'an. 18Li chanib yacan caretae lec muc'tic, lec toyolic xotajtic; li xotxotile nojem ta puru satil ta joyob.#Ap 4.8. 19C'alal chlic xanovicuc li chanib c'usi cuxajtique, chlic xanovuc ec li chanib yacan caretae. C'alal chtoyic muyel li chanibique, chlic toyuc muyel ec li yacan caretaetique. 20Li chanibique te chbatic ti bu ch-ic'atic batel ta svu'el Diose. C'alal chbatique, te nabal chbat ec li yacan caretaetique, yu'un jmoj stsacoj sbaic ti c'u x'elan cuxulique. 21C'alal chanov batel li chanibique, chanovic batel ec li yacan caretae. C'alal chpajique, chpaj ec li yacan caretae. C'alal chtoyic muyel ta banamile, chtoyic muyel ec li yacan caretae, yu'un jmoj stsacoj sba li xcuxlejalique.#Ez 10.9-13.
22Ta yac'ol sjolic li chanibique oy c'usi te sepel yilel jech chac c'u cha'al nen, sts'ayayet ta q'uelel.#Ap 4.6. 23Te ta yolon li c'usi te sepel yilele ja' te tuc' xlich'ojic muyel xiq'uic li chanibique, snupanoj sba sni' jujun. Li yan chib xic' jujunique ja' tsmac o sbec'talic. 24Ti c'alal chanovique, laj ca'ay chbac' li xiq'uique. Ja' jech chbac' jech chac c'u cha'al nojelal uc'um,#Ap 1.4-15; 19.6. jech chac c'u cha'al sc'op li Boch'o ech'em svu'ele, jech chac c'u cha'al xvochet epal cristianoetic, xchi'uc jech chac c'u cha'al epal soldadoetic. C'alal chpajic ta xanubale, tsyales li xiq'uique. 25C'alal chpajic ta xanubal, xchi'uc c'alal tsyales li xiq'uique, laj ca'ay oy boch'o chc'opoj te ta yac'ol li c'usi te sepel ta yac'ol sjolique. 26Te ta sba li c'usi te sepel ta yac'ol sjolique oy jun muc'ta chotlebal yilel pasbil ta safiro ton. Te ta sba li chotlebale oy boch'o te chotol xco'laj xchi'uc vinic.#Ez 10.1; Ap 4.2-3. 27Xlic ta xchucbenal xch'ut c'alal ta sjole, ja' jech chvinaj jech chac c'u cha'al bronce ti lec sts'ayayete, joyibtabil ta c'oc' ta joyob yilel. Xyal batel ta yacane xco'laj xchi'uc c'oc';#Ez 8.2. oy xojobal ta joyob. 28Ja' jech ta q'uelel jech chac c'u cha'al vacnabal ti chvinaj ta toc c'alal chac' vo'e. Ja' jech laj quilbe yutsilal slequilal ta jch'ulel li Muc'ul Diose. C'alal laj quile, la jpatan jba ta banamil; laj ca'ay oy boch'o te chc'opoj tal.
Currently Selected:
Ezequiel 1: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.