Miqueas 1
1
Li Diose ta xchapan Samaria xchi'uc Jerusalén
1C'alal yorail i'ochic ta ajvalilal ta Judá li Jotam,#2 R 15.32-38; 2 Cr 27.1-7. Acaz,#2 R 16.1-20; 2 Cr 28.1-27. xchi'uc Ezequiase,#2 R 18.1—20.21; 2 Cr 29.1—32.33. li Miqueas liquem ta Moresete ja' yorail ic'opanat yu'un li Muc'ul Diose. Ja' i'ac'bat yil c'u x'elan sc'oplal li Samaria xchi'uc Jerusalene.
2Lumetic, a'yo ava'yic acotolic.
Banamil, tuc'ulano lec ava'ay achi'uc li jnaclumetic avu'une:
Li Cajvaltic Muc'ul Dios te oy ta xch'ulnae,
ja' tsva'an sba ta testigo sventa chascontrainoxuc.
3Ja' stuc ta xloc' tal ta sna ti bu oye;
ja' chtal xpech'an ta teq'uel li toyol vitsetic li' ta banamile.
4Li muc'tic vitsetique ta x'unij ta yacan
jech chac c'u cha'al chab ti ch-unij ta c'oq'ue;#Sal 97.5.
ta xbein yalel ta stenlejaltic
jech chac c'u cha'al vo' ti chch'ac batel sbee.
5Ti jech chc'ot ta pasele, ja' ta scoj stoyobbail li Jacobe;
ja' ta scoj smul li smomnich'nab Israele.
¿Bu oy li stoyobbail Jacobe?
¿Me mu ja'uc te ta Samariae?
¿Bu oy li toyol c'opojebaletic yu'un Judae?
¿Me mu ja'uc te ta Jerusalene?
6Ja' yu'un jech chal li Muc'ul Diose:
“Li lum Samariae ta jyavnaijes o, puru tontic xa te sbusul-busul chcom;
chcom ta bats'i banamil sventa chich' ts'unel o ts'usubtic.
Ta jves batel ta soplejaltic li tonetic sventa naetique;
jeche' t'anal chcom cu'un li snaclebtaque.
7Li c'usitic scuyoj ta sdiosique ta jlilin scotol;
li te'etic yich'ojic ta muq'ue ta xcules scotol.
Jech noxtoc li matanaletic chaq'uic ta stojol sdiosique ta jchic' ta c'oc' scotol.
Yu'un ta smoton taq'uin jmulavil antsetic la spasic o,
jech ta staq'uin jmulavil antsetic ta xbat cu'un noxtoc”, xi.
Ta xat yo'nton Miqueas
8Ja' yu'un ta xi'oc', ta xi'avan;
jeche' xbixbun cacan, jeche' xit'ant'un chixanov.
Li' chime'on oc' jech chac c'u cha'al oq'uil;
li' xi'av-un jech chac c'u cha'al unin avestruz mut.
9Yu'un li xchamel Samariae mu stac' poxtael;
ipuc batel c'alal ta Judá;
ic'ot c'alal to ta jlumal, ja' li Jerusalene.
10Mu me xavalic batel ta stojol cajcontratic ta lum Gat;
mu me xavac'beic yil ti cha'oq'uique.
Te no'ox baletanic ta pucuctic ta Bet-le-afra.#1.10 Bet-le-afra - Ta hebreo c'op ja' smelol yavil pucuctic.
11Jnaclumetic ta Safir, batanic ta chuquel ta yan banamil;
q'uexovan ava'yic, yu'un jeche' t'anal chabatic.
Li boch'otic te nacalic ta Zaanane mu xu' chloq'uic.
Te ta Bet-esele toj tsots oq'uel,
jech mu'yuc boch'o xu' chaspojoxuc.
12Li jnaclumetic ta Marote
xlaj yu'unic ti ja' tstaic li c'usi leque,
pero li Muc'ul Diose ja' xa laj yac' tal li tsots vocole;
staoj xa c'alal ta ti'coralton yu'un Jerusalén.
13Jnaclumetic ta Laquis,
vo'oxuc ti sliqueboxuc mulil yu'un li boch'otic te nacajtic ta Sione,
ti ja' te ilic tal ta atojolic li stoyobbail israeletique,
chuco xa me lec li acaretaic ta aca'ic ti bu lec tsots x'anilajique.
14Jipo comel ta avo'ntonic o li lum Moreset-gate.
Li lum Aczibe ja' chtun ta sventa chlajic o ta lo'lael
li ajvaliletic ta Israele.
15Jech chal li Muc'ul Diose:
“Vo'oxuc ti te nacaloxuc ta Maresae,
ta jtacboxuc tal yan boch'o chtal stsaloxuc.
Li banquilaletic yu'un Israele chjatovic batel;
te chbat snac' sba c'alal to ta nailch'en Adulam.
16Sión, juxo loq'uel stsotsil ajol
ta scoj li avalab anich'nab ti lec ac'anoje.
Paso aba ta t'abjol jech chac c'u cha'al sjol xulem,
yu'un ta xich'ic chuquel batel ta yan banamil li jnaclumetic avu'une”, xi li Diose.
Currently Selected:
Miqueas 1: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.