Josué 1
1
I'ic'at yu'un Muc'ul Dios li Josuee
1C'alal chamen xa'ox li yajtunel Muc'ul Diose, ja' li Moisese, li Muc'ul Diose lic sc'opan li Josuee, ja' li yajcoltaubbail ono'ox ta abtel li Moisese, ja' li xnich'on Nune. Jech laj yalbe:
2“Ta sventa ti icham xa li cajtunel Moisese, li' ta orae vo'ot xa chavic' jelovel ta jot uc'um Jordán scotol li achi'iltac ta israelale yu'un chabatic xa te ta banamil ti bu chacac'boxuque. 3Vu'un chacac'boxuc scotol li banamil bu chbat axanique jech chac c'u cha'al laj calbe li Moisese. 4Ja' chacac'boxuc scotol li osil xlic ta xocol banamile xchi'uc li toyolaltic yu'un Líbano c'alal to ta muc'ta uc'um Eufratese, xchi'uc scotol li yosilal hetetique c'alal to ta muc'ta Nab Mediterráneo. 5Mu'yuc boch'o xu' chastsalot ti jayib c'ac'al cuxulote.#Dt 11.24-25. Vu'un chajchi'inot o, jech chac c'u cha'al la jchi'in scotol c'ac'al li Moisese. Me jliqueluc mu'yuc chajcomtsanot.#Dt 31.6,8; Heb 13.5. 6Tsotsan me, oyuc me lec stsatsal avo'nton,#Dt 31.6,7,23. yu'un vo'ot chavoc'be yosilic li achi'iltaque yu'un ja' yu'unic o, jech chac c'u cha'al calojbe ono'ox li amoltotaquic ta vo'onee. 7Ja' no'ox chacalbot ti ac'o oyuc lec stsatsal avo'ntone; mu me xaxi'. C'otuc me ta pasel avu'un li jmantaltac ti laj yalbot comel li Moisese. Paso me scotol; mu me xacomtsan me jutuc, yu'un jech lec chbat avu'un scotol li c'usitic chapase. 8Alilano me scotol c'ac'al c'usi chal ta svunal li mantaletic cu'une. Nopilano ta c'ac'al ta ac'ubal yu'un jech chc'ot ta pasel avu'un li c'usitic te ts'ibabile. Jech lec chbat avu'un buyuc no'ox chaxanov, xchi'uc lec chbat avu'un scotol c'usi chapas. 9Q'uelavil, vu'un jtuc chacalbot. Tsotsan me; oyuc me lec stsatsal avo'nton. Mu me xaxi'; mu me xchibaj avo'nton. Vu'un chajchi'inot scotol c'ac'al buyuc no'ox chabat, vu'un li Muc'ul Diosun avu'une”, xut.
Lic xchapan sba Josué sventa chbat yich'ic li banamile
10Ja' yu'un li Josuee lic yalbe mantal li banquilaletic yu'un israeletique. Jech laj yalbe: 11“Batanic ta scotol scarpanaic li jchi'iltactique. Jech xavalbeic scotol li jchi'iltactique: ‘Chapano ave'elic, yu'un oxib xa no'ox c'ac'al sc'an xbat jtuch'tic jelovel li uc'um Jordán sventa chbat quich'tic ta jc'obtic li osil yac'ojbutic Muc'ul Dios cu'untique’, uto”, xut batel li banquilaletique.
12Li Josuee la sc'opan noxtoc li jchop liquemic ta Rubén, ta Gad, xchi'uc li o'lol jchop liquemic ta Manasese. Jech laj yalbe:
13—Na'ic me c'usi yalojboxuc comel li Moisese, ja' li yajtunel Muc'ul Diose. Laj yalboxuc ti ja' Dios cu'untic chayac'boxuc li banamil li'i sventa xcuxubil avo'ntonique. 14Ja' yu'un li' xacomtsan li avajnil anich'nabique xchi'uc li ats'unub avovolique. Li' ac'o comuc scotol ta avosilic ti bu laj yac'boxuc Moisés li' ta jot uc'um Jordane. Yan li viniquetic ti xu' xa yu'unic pleitoe, ac'o xchapan sba xchi'uc yabtejebic. Ja' ba'yucbe ac'o baticuc yu'un scotol li yantic jchi'iltactique. Ac'o bat scoltaic ta paspleito. 15Ja' to me i'ac'bat li yosilic yu'un Muc'ul Dios bu xu' chcux yo'ntonic ec jech chac c'u cha'al laj xa ataic li vo'oxuque, xchi'uc me ja' xa yajvalic ic'ot o li banamil bu chich'ique, ja' to xu' chasutic tal ta avosilic li' ta jot uc'um Jordán ta stuq'uil sloq'ueb c'ac'ale,#1.15 C'ac'ale - Oy boch'o chalic jtotique. yu'un jech chtal avich'ic o ta j'ech'el li banamil ti laj yac'boxuc comel li Moisese, ja' li yajtunel Diose#Nm 32.28-32; Dt 3.18-20; Jos 22.1-6. —xut.
16Itac'ovic:
—Ta jpascutic scotol li c'usi laj avalbuncutique; ta xibatcutic ti bu chatacuncutic batele. 17Persa ta jch'uncutic amantal jech chac c'u cha'al calojbecutic ono'ox li Moisese. Ja' no'ox ta jc'ancutic ti ac'o xchi'inot Muc'ul Dios buyuc no'ox chabat jech chac c'u cha'al chi'inbil yu'un Muc'ul Dios li Moisese. 18Li boch'o ta sbaj amantale, ti mu sc'an xch'un c'usi chavalbe, ac'o milatuc. Ja' no'ox ta jc'antic ti ac'o oyuc lec stsatsal avo'nton, ti mu me xaxi'e#Nm 27.20; Dt 34.9. —xiic.
Currently Selected:
Josué 1: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.