2 Corintios 1
1
Sliqueb scarta li Pabloe
1Vu'un Pabloun, vu'un yajtacbolalun li Jesucristoe yu'un jech la sc'an yo'nton li Diose. Chajc'opanoxuc tal jchi'uc li quermanotic Timoteo, vo'oxuc li jtsob jch'unolajeloxuc te ta lum Corintoe#Hch 18.1. xchi'uc vo'oxuc li yu'untacoxuc Dios ta sjunul Acaya banamile. 2Ac'o xc'uxubinoxuc, ac'o spasboxuc ta jun avo'ntonic li Diose, ja' li Jtotique, xchi'uc li Cajvaltic Jesucristoe.
Laj yal Pablo c'u x'elan laj yich' contrainel
3Ac'o ich'atuc ta muc' li Diose, ja' li Stot Cajvaltic Jesucristoe, ja' li Totil ti ep chc'uxubinvane, ja' li Dios ti chispatbutic co'ntontique. 4Ja' chispatbutic co'ntontic ta sventa scotol jvocoltic, yu'un jech xu' ta jpatbetic yo'nton ec li boch'otic oy c'usiuc no'ox vocolal cha'yique, yu'un stsatsubtasojbutic xa co'ntontic ec li Diose. 5Me chquich'tic ep vocol jech chac c'u cha'al laj yich' li Cristoe, ja' jech ta sventa Cristo ch-epaj spatubil co'ntontic noxtoc. 6Yu'un c'alal chquich'cutic vocol li vu'uncutique, ja' sventa chpat avo'ntonic xchi'uc sventa chacolic. C'alal chispatbun co'ntoncutic li Diose, ja' sventa chpat avo'ntonic ec li vo'oxuque, xchi'uc ja' sventa ch-ayin smuc'ul avo'ntonic, yu'un jech chcuch avu'unic vocol ec c'alal chavich'ic vocol jech chac c'u cha'al chquich'cutique. 7Jch'unojcutic ti j'ech'el mu xchibaj avo'ntonique. Ta sventa ti co'ol chquich'tic vocol ta scoj li Cajvaltique, jech ta jna'cutic ti ja' jech co'ol chquich'tic patbel co'ntontic noxtoc yu'un li Diose.
8Quermanotac, ta jc'an chana'ic c'u x'elan laj quich'cutic vocol te ta Asia#1 Co 15.32. banamile, yu'un bats'i ech'em tsots vocol laj quich'cutic. Mu xa xcuch cu'uncutic o laj ca'icutic; la jnopcutic ti te chichamcutic oe. 9Yu'un chapanbil o sc'oplal ti chichamcutique. Lec ti jech ic'ot ta pasele yu'un jech mu me jch'uncutic ti xu' ta jcolta jba jtucutique. Ja' no'ox la jpat co'ntoncutic yu'un li Dios ti xu' yu'un ta xcha'cuxes animaetique. 10Ja' la scoltauncutic ta tsots vocol ti ja' sventa xu' chichamcutic oe. Jch'unojcutic ti ja' jech chiscoltauncutic o batele. 11Yu'un chacoltauncutic ta sc'opanel Dios ec li vo'oxuque. Me ep boch'o tsc'opanic Dios ta jtojolcutique, jech ep boch'o tstojbeic ta vocol Dios noxtoc ti c'alal ta jtatic coltaele.
Laj yal Pablo c'u yu'un muc xjelov ta Corinto
12Oy c'usi ti toj jun co'ntoncutic yu'une, ja' ti jna'oj lec ta jol ta co'ntoncutic ti lec jchabioj jbacutic, ti lec jq'ueloj jbacutic ta stojol Dios li' ta banamile. X'ech' to jech la jpascutic te ta atojolic li vo'oxuque, pero muc ta jbijiluc jtucutic, ja' ta sventa slequil yo'nton ta scoltauncutic li Diose. 13Li c'usi ta jts'ibaboxuc tale ma'uc ti yu'un yan o smelole, ti mu xava'ibeic smelole. Ta jch'un ti chava'ibeic lec smelol scotole, 14jech chac c'u cha'al ti oy j'o'loloxuc laj ava'ibeic lec smelol ti vu'uncutic ta jventacutic ti jun no'ox avo'nton chava'yique; jech chac c'u cha'al vo'oxuc ta aventaic toj jun no'ox co'nton chca'icutic ec ti c'alal chtal li Cajvaltic Jesuse.
15-16Ta sventa ti jech jch'unoje, jech ta jc'an ox vo'oxuc ba'yuc te ch-ech' jq'ueloxuc tal ti c'alal lital li' ta Macedonia#Hch 19.21. banamile, xchi'uc te ch-ech' jq'ueloxuc noxtoc ti c'alal chisut batele, yu'un jech xu' chataic chib velta xcuxetel avo'ntonic. Ts'acal xu' chacoltaicun batel ti c'alal chisut batel ta Judea banamile. 17C'alal jech jnopoj ox ta jpase, ¿me chanopic ti toj anil la jnope? ¿Me chanopic ti ta sventa no'ox jbec'tal jech ta jpas jech chac c'u cha'al tspas li cristianoetic ti chalic “xu'” xiic; ts'acal “mu xu'” xiique? 18Ja' tuq'uil testigo cu'uncutic li Diose. Sna'oj ti mu'yuc baq'uin xcalcutic ta atojolic “xu'” xichicutic, ti ts'acal “mu xu'” xichicutique. 19Yu'un li Jesucristo Xnich'on Diose, ja' ti la jcholboxuc ava'yic sc'oplal jchi'uc Silas jchi'uc Timoteoe,#Hch 18.5. le'e mu sna' xal “xu'”; ts'acal chal “mo'oj”. Li stuque puru melel c'usi chal. 20Scotol li c'usitic yaloj Diose chc'ot ta pasel yu'un ta sventa li Jesucristoe. Ja' yu'un “Jechuc” xijchi ti c'alal ta jc'opantic Diose, jech ich'bil ta muc' chc'ot li Diose. 21Ja' li Dios ti chijyac'butic stsatsal co'nton jcotoltic ta sventa li Cristoe, xchi'uc ti laj yac'butic svu'el yu'un jech voc'bil lijcom ta sventa yabtele. 22Xchi'uc ti laj yac'butic jselloaltic ti yu'unutic oe, ja' li Ch'ul Espíritu yac'ojbutic ta co'ntontique.#Ef 1.14. Ja' sliqueb quich'ojtic li c'usi ta to xc'ot quich'tique.
23Ti jech muc x'ech' jq'ueloxuc tale, ja' sventa alequilalic. Ja' testigo cu'un li Diose; ja' yilojbun co'nton ti ta melel jech xcale. 24Mu yu'unuc ta jc'an vu'un yajvalun xch'unojel avo'ntonic chic'ot. Ja' no'ox ta jc'an ta jcoltaoxuc, yu'un jech xcuxet no'ox avo'ntonic. Yan li xch'unojel avo'ntonic ta stojol Cajvaltique jna'oj ti staoj yav ach'unojic oe.
Currently Selected:
2 Corintios 1: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.