1 Macabeos 1
1
Sc'oplal ajvalil Alejandro xchi'uc jts'ac-abtelaletic
1Li Alejandro liquem ta Macedoniae, ja' li xnich'on Filipo ti tiq'uil ta ajvalilal ta Grecia banamile, iloc' batel ta Macedonia, bat stsal ta paspleito li Darioe, ja' li ajvalil ta Persia xchi'uc ta Media banamile; jech ja' icom o ta ajvalilal yu'un li lumetique. 2La sliques ep pleitoetic, laj yu'unin ep lumetic ti setbilic ta coraltone, te la smil ajvaliletic. 3La stsal batel c'alal to ta sti'iltic banamil, la spojbe c'usi oy yu'unic epal lumetic. Solel xch'ijan icomic c'alal i'och ta sc'ob scotol li banamile. Jech lic stoy sba, toj muc' la spas sba. 4Lic stsob yajsoldadotac bats'i tsots xu' yu'unic, jech la stsalic ep lumetic xchi'uc yantic banamiletic xchi'uc epal ajvaliletic, lic suj ta stojel spatanic. 5Ta ts'acal itsaque ta chamel, laj ya'ay ti ta xa xcham oe. 6Jech lic yic'an li banquilal soldadoetic ti lec ich'bilic ta muq'ue, ja' li boch'otic co'ol ibijubtasatic tal ta sbic'talic xchi'uque. C'alal mu'yuc to'ox chchame, la svoc'anbe li c'u smuc'ul yich'oj ta ventae.#Dn 11.3-4. 7Lajchab jabil yochel ta ajvalilal li Alejandroe jech icham. 8Li banquilal yajsoldadotaque lic ochicuc ta pasmantal. Ta jujuntal lic spasic ta mantal ti c'u smuc'ul i'ac'bat sventainique. 9C'alal chamen xa'ox li ajvalil Alejandroe, scotolic la slapic scoronail sjolic sventa ajvalilal. Ep jabil jech la spasilanic c'alal ta xnich'nabic ta smomnich'nabic, jech i'epaj yu'unic c'usi chopol ta sbejel banamil.
Ja' c'u x'elan laj yac' ta chanel stalel yanlumetic li Antíoco Epifanese
10Oy jun chopol vinic iloc' yu'unic Antíoco Epífanes sbi, tacbil to'ox batel ta Roma. Ja' xnich'on li muc'ta ajvalil Antiocoe. Ja' i'och ta ajvalilal ta yabilal vuclajuneb svucvinic (137)#1.10 137 - Ja' co'ol xchi'uc 175 jabil sc'an xtal ta banamil li Cristoe. jech te lic pasvanicuc ta mantal li griegoetique.
11Ta sc'ac'alil le'e ja'o ilic te ta Israel li boch'otic la scomtsanic xch'unel Diose xchi'uc ep boch'otic la slo'laic, jech laj yalilanic: “Jchaptic jc'optic xchi'uc li lumetic ti li' no'ox jts'aquinojantique, yu'un ja' yorail te lic jtatic ep vocoliletic ti c'alal laj voc' jba jchi'uctique”, xi. 12Oy ep israeletic lec laj ya'yic li c'usi laj yalique, 13jech la snaban sbaic ta stojol li ajvalile. Li ajvalile laj yal ti xu' chchanbeic stalel li yanlumetique. 14Jech lic snopic ti ta spasic jun muc'ta yavil tajinabal te ta Jerusalene, jech chac c'u cha'al tspasilanic li yanlumetique. 15Jech te lic xcha'pac'anic li snuculil sni' sc'unilique, jech la scomtsanic li c'usi xchapanojic ono'ox xchi'uc Diose, ja' bat spas sbaic ta jmoj xchi'uquic li yanlumetique, ja' laj yac' sbaic o ta spasel li c'usitic chopole.
La spoj scotol c'usitic lequic te ta ch'ulna ta Jerusalén li Antiocoe
16C'alal laj yil li Antíoco ti lec chbat li yabtel ta ajvalilale, la snop noxtoc ti ta xu'unin li lum Egiptoe yu'un jech ja' ajvalil chc'ot ta xchibal lum. 17Jech i'och batel ta Egipto xchi'uc ep yajsoldadotac ti lec xu' yu'unique. Ibatic ta careta, ta tsemen, ta ca', xchi'uc ta epal barcoetic. 18Jech lic stsac ta c'op li ajvalil Tolomeo ta Egiptoe. Li Tolomeoe ijatov sutel, ep boch'otic icham yu'unic. 19Li Antiocoe laj yu'unin li lumetic te ta Egipto ti lec setanbil ta coraltone xchi'uc laj yich' batel li c'usitic oy ta scotol li yosilal Egiptoe.#Dn 11.25. 20C'alal la stsal li lum Egipto ta yabilal oxib xvaxacvinique (143)#1.20 143 - Ja' co'ol xchi'uc 169 jabil sc'an xtal li Cristoe. iloc' batel, bat stsac ta c'op noxtoc li Israele xchi'uc li Jerusalene. Xchi'uc batel ep yajsoldadotac ti lec xu' yu'unique. 21Ta stoyobbail i'och batel ta yut ch'ulna, laj yich' batel li scajleb smoton Dios pasbil ta c'anal taq'uine xchi'uc li xvuchleb candiletique xchi'uc scotol li c'usitic ta xtunan tee, 22xchi'uc li mexa yo' bu oy li pan ac'bil ta stojol Diose, xchi'uc li copae, xchi'uc li tazaetique, xchi'uc li muc'tic cucharaetic pasbil ta c'anal taq'uine, xchi'uc li muc'ta poq'ue, xchi'uc li coronaetique, xchi'uc la st'ol loq'uel scotol li c'anal taq'uin ti ac'bil sventa st'ujumal li yochebal ch'ulnae.#Cf. 1 R 7.48-49. 23Laj yich' batel noxtoc li saquil taq'uine, li c'anal taq'uine, xchi'uc li c'usitic toyolic stojol ti c'upilic sbae xchi'uc li c'ulejalil la staic ta sa'el ti bu nac'bil leque. 24Laj yich' batel ta slumal scotol, la smil comel ep cristianoetic solel ta stoyobbail ic'opoj comel.#Dn 11.28.
25Ta scotol li yosilal Israele solel ep oq'uel avanel laj ya'yic.
26X'avetic ta vocol li moletique xchi'uc li banquilaletic yu'unique,
i'ich'bajic ta at-o'nton li querem tsebetique.
Li antsetic ti lec c'upilic sbae ich'ay st'ujumalic ta at-o'nton.
27Li queremetic ti ja' to inupinique iliquic ta me'on oq'uel;
li tsebetic ti ja' to imalijique iliquic ta oq'uel ta svayabic.
28Li banamile inic ta xi'el,
yu'un laj ya'ay c'usi chc'ot ta stojol li jnaclumetic yu'une.
Scotol li smomnich'nab Jacobe iyalic ta q'uexlal.
Laj yich' jinesel li Jerusalene
29C'alal i'ech' xa'ox chib jabile, li ajvalile la stac batel ta lumetic ta yosilal Judá li banquilal jtsobpatane yu'un bat sc'anbe spatanic. Ic'ot c'alal ta Jerusalén, xchi'uc batel ep yajsoldadotac. 30C'alal ic'ote, lec la slo'la li cristianoetique; laj yalbe ti mu'yuc tsa'c'ope, ja' yu'un la xch'unic li israeletique. Pero ta anil no'ox lic scontrain li lume, tsots laj yac'be svocolic; la smilic comel ep israeletic. 31La sloq'uesic batel scotol li c'usitic oy te ta lume, la xchiq'uic, xchi'uc la sjinesic li naetique xchi'uc li coralton ti setbil o li lume. 32La xchuquic batel li antsetique xchi'uc li ololetique, xchi'uc laj yu'uninbeic o li xvacaxique. 33Li ajvalile la xcha'va'anic li lum yu'un Davide; la setic lec ta coralton, lec toyol, lec tsots la spasic, xchi'uc la spasic lec tsots q'uelub osiletic noxtoc. 34Ja' te la snacanic li yanlumetic ti ven chopolique xchi'uc li israeletic ti la scomtsanic xch'unel Diose, ja' xa ven tsots la spas sbaic. 35Lic stsob yabtejebic sventa pleito xchi'uc sve'elic; te la stsobic li c'usitic laj yelc'anic tal ta lum Jerusalene, ja' xa te ta xmalavanic.
36Solel abul sba icom li ch'ulnae,
ta scotol ora puru xi'el laj yac'beic li israeletique.
37Yu'un te la smilic ta pat xocon ch'ulna li boch'o mu'yuc smulique,
solel la soquesic scotol.#Sal 106.38.
38Li jnaclumetic te ta lum Jerusalene ijatovic loq'uel ta scojic;
li lum Jerusalene ja' xa slumal ic'ot li yanlumetique,
ja' xa yanlumetic ic'otic li boch'otic te ivoq'uique yu'un i'ictaatic comel.
39Li xch'ulnaique jeche' taquipojan icom jech chac c'u cha'al jun xocol banamil.
Li sq'uinique ic'ataj ta at-o'nton,
li xcuxubil yo'ntonique na'lebil icom,
li yich'elic ta muq'ue ic'ataj ta xq'uexlalic.
40Ti c'u x'elan smuc'ul i'ay li sc'oplalique,
ja' to jech iyich' bic'tajesel;
li yutsilalique ic'ataj ta svocolic.#Sal 74.3-9; 79.1.
Laj yaq'uic ta ich'el ta muc' yan diosetic
41Li muc'ta ajvalile laj yal jun mantal ta scotol ti bu c'alal yich'oj ta ventae ti jun no'ox lum ac'o comuc ta scotole. 42La suj ti ac'o scomtsanic li mantaletic xchi'uc li stalel stuquic ta jujun lume. Scotol li yantic lume la xch'unbeic smantal li muc'ta ajvalile. 43Ep israeletic la xch'unbeic c'usi laj yac' ta ch'unel li ajvalile, jech lic yac'beic milbil matanal li c'usitic cuybil ta diosetique, ja' la soquesbeic o sc'oplal li sc'ac'alil xcuxubil yo'ntonique. 44Li ajvalile la stac batel j'almantaletic ta Jerusalén xchi'uc ta lumetic ta yosilal Judá, jech laj yal batel mantal ta vun: “Persa ac'o xch'unbeic stalel li yantic lumetique; 45ac'o scomtsanic yaq'uel chic'bil matanal ta ch'ulna xchi'uc milbil matanaletic xchi'uc matanaletic ti sts'anlajete, xchi'uc ac'o scomtsanic li sc'ac'alil xcuxubil yo'ntonique, xchi'uc li sq'uinique. 46Li xch'ulnaic xchi'uc c'usitic ts'u'iltasbilic to'ox yu'unique, ac'o soquesbeic sc'oplal. 47Ac'o spasbeic yan sna, xchi'uc scajleb smoton li c'usitic cuybil ta diosetic yu'une. Ac'o smilbeic smotonin chitom xchi'uc yantic chonbolometic ti ven i'lal sbaique. 48Mu xa me setbeic sni' sc'unil li yol xnich'onique, ac'o sbolibtas sbaic ta sventa scotol li c'usitic chopolique. 49Ac'o xch'ay ta yo'ntonic li mantaletic yu'un Diose; ac'o sjel li stalelique. 50Li boch'o mu sc'an xch'un li mantaletic cu'une ac'o yich' milel”, xi batel ta svun li ajvalile.
51Jech noxtoc li ajvalile ja' jech la sts'ibabe batel ta vun scotol ti bu c'alal sventainoje. La st'uj jq'uelvanejetic ta scotol slumal, laj yal batel mantal ta scotol lumetic ta yosilal Judá ti ac'o yaq'uic milbil matanal ta sventa li c'usitic cuybilic ta diose. 52Ep israeletic, ja' li boch'otic la sbajbeic smantal Diose, ja' la snaban sbaic ta stojol li boch'otic la xch'unbeic smantal li ajvalile, jech lic soquesic o sjunul lum. 53La sujic li israeletic ti ac'o snac' sbaic, ti buyuc no'ox xu' tsnac' sbaique.
54Ta vo'lajuneb c'ac'al yochel u Quisleu ta yabilal vo'ob xvaxacvinique (145),#1.54 145 - Ja' co'ol xchi'uc 167 jabil sc'an xtal ta banamil li Cristoe. li ajvalile laj yal mantal ti ac'o sva'anic jun loc'om#1.54 Loc'om - Ja' sloc'obal sdiosic griegoetic, ja' ti toj chopol chil Dios c'alal jech tspasique. ti toj chopol te ta sba scajleb li xchic'ubil matanale. Jech noxtoc lic spasic scajleb matanaletic ta jujun lum ta yosilal li Judae. 55Te la xchiq'uic pom ta sti' snaic xchi'uc ta cuxub o'ntonaletic. 56La sli'ic la xchiq'uic ta c'oc' li svunal mantaletic yu'un Dios ti bu la staique. 57Li boch'o yich'oj jpocuc svunal mantal yu'un Diose, li boch'o xch'unoj li mantale, la smilic, yu'un ja' jech yac'oj mantal li ajvalile. 58Scotol u jech tsots ch-uts'intaatic li israeletic ti bu chtaatic ta jujun lume.
59Ta vo'ob xcha'vinic (25) c'ac'al yochel jujun u laj yac'beic smoton li loc'om ti te va'anbil yu'unic ta sba scajleb smoton Diose. 60Me oy antsetic ti ta xaq'uic to ta setbel sni' sc'unil li yolique, ta xich'ic milel, yu'un jech yaloj mantal li ajvalile. 61Xchi'uc yalabic ta xich'ic joc'anel ta te' ta snuq'uic, ja' jech ta xmilat ta sjunul snailalic, xchi'uc li boch'o laj yac' ta setbel sni' sc'unil yol xnich'onique.
62Pero ep israeletic jun yo'ntonic la xch'unic o li Diose, jech muc sc'an sve'ic li c'usitic i'lal sbae. 63La sc'an slajelic ti c'alal mu'yuc to tsve'ic li c'usi i'lal sbae, xchi'uc ti c'alal mu'yuc to tsoquesic li c'usi xchapanojic ta stojol li Diose,#Dn 1.8-16; 3.8-18; 2 Mac 6.18-19. jech ichamic. 64Ja' jech toj xi'bal sba i'ac'bat svocolic li israeletique.
Currently Selected:
1 Macabeos 1: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.