1 Corintios 1
1
Lic sc'opan ta carta jch'unolajeletic ta lum Corinto li Pabloe
1Vu'un Pabloun, ic'bilun ta sventa yajtacbolal li Jesucristoe, yu'un jech la sc'an li Diose. Ta jc'opanoxuc tal ta carta jchi'uc li quermanotic Sóstenes, 2vo'oxuc li steclumaloxuc Dios te ta lum Corintoe.#Hch 18.1. Vo'oxuc ti voc'biloxuc xa ta sventa li Cristo Jesuse, ti ic'biloxuc sventa chac'otic ta yu'untac Dios, yu'un jech co'ol chac'otic xchi'uc li boch'otic tsc'anbeic vocol Cajvaltic Jesucristo buyuc no'ox oyique, ja' li Cajvaltic ta jcotoltique. 3Ac'o xc'uxubinoxuc, ac'o yac'boxuc jun avo'ntonic li Diose, ja' li Jtotique xchi'uc li Cajvaltic Jesucristoe.
Stojbel ta vocol Dios c'uxubinel ta sventa Cristo
4Scotol c'ac'al ta jtojbe ta vocol Dios ta sventa ti ep xc'uxubinojoxuc ta sventa li Cristo Jesuse. 5Yu'un ja' ta sventa Cristo Jesús ti laj xa ataic scotole, ja' ti c'u x'elan chac'opojique xchi'uc li c'usitic xavotquinique. 6Ta sventa laj ach'unic li sc'op Cristo la jcholboxuque, jech laj ata lec stsatsal avo'ntonic ta stojol Dios. 7Jech mu'yuc xa c'usi yan sc'an avu'unic; ataojic xa scotol li matanal chac' Diose. Ja' xa no'ox chamalaic c'usi ora chvul ta loq'uel li Cajvaltic Jesucristoe. 8Jech noxtoc ja' chastsatsubtasboxuc o batel avo'ntonic c'alal to ta slajeb, yu'un jech mu'yuc amulic chc'ot ti c'alal tsta sc'ac'alil ta xchapanvan li Cajvaltic Jesucristoe. 9Li Dios ti laj yic'oxuc ta stojole mu sna' sjel sc'op. Laj yic'oxuc sventa jun chac'ot achi'uquic li Xnich'one, ja' li Cajvaltic Jesucristoe.
Svoq'uilanoj sbaic li jch'unolajeletic ta Corintoe
10Quermanotac, ta jc'anboxuc vocol ta atojolic ta sbi li Cajvaltic Jesucristoe. Co'oluc me ac'op acotolic; mu me xavoq'uilan abaic. Co'oluc c'usi xanop acotolic; jun no'ox me xava'ay aba ta acotolic. 11Ti jech chacalboxuque quermanotac, yu'un laj xa ca'ay ac'oplalic ti oy c'op avu'unique. Ja' laj yalbun li boch'otic te oyic ta sna quermanotic ants Cloee. 12Laj ca'ay ti acotolic jech chavalic jujunoxuque: “Vu'une ja' lec chquil li Pabloe. Vu'une ja' lec chquil li Apolose.#Hch 18.24. Vu'une ja' lec chquil li Cefase.#1.12 Cefas - Pedro yan sbi. Vu'une ja' lec chquil li Cristoe”, xachiic. 13¿Me yu'un jech svoq'uilanoj sba ec li Cristoe? ¿Me yu'un ja' icham ta cruz ta acojic li Pabloe?, o ¿me yu'un ja' ta sbi Pablo ti laj avich'ic vo'e? 14Coliyal Dios ti mu'yuc laj cac'boxuc avich'ic vo' junuc li vo'oxuque. Ja' no'ox laj cac'be yich' vo' li Crispoe#Hch 18.8. xchi'uc li Gayoe.#Hch 19.29; Ro 16.23. 15Yu'un jech mu xu' chavalic ti vu'un ta jbi laj avich'ic vo'e. 16Ja' laj cac'be yich'ic vo' noxtoc ta sjunul sna li Estefanase.#1 Co 16.15. Ts'acal to mu xa jna' me oy boch'o yan laj cac'be yich' vo'. 17Yu'un muc tacbilucun yu'un Cristo sventa chcac' vo'. Ja' no'ox tacbilun ta xcholel li Lequil A'yeje. Pero ma'uc ta sventa chcac' ta ilel ti oy lec jbijil c'u x'elan chic'opoje, yu'un jech mu me alticuc chc'ot ti icham ta cruz li Cristoe.
Sc'oplal bijilil ta sventa Dios xchi'uc ta sventa banamil
18Ta melel, c'alal chich' albel sc'oplal li cruz ti bu icham li Cristoe, bol lo'il no'ox cha'yic li boch'otic ch'ayel chbatique. Pero li boch'otic sc'oplal chcolique, ja' li vu'utique, ja' stsatsal Dios ta jventatic.#Ro 1.16. 19Yu'un jech ts'ibabil ta sc'op Dios:
“Ta jlajesbe sc'oplal sbijilic li boch'otic bijique;
ta jch'aybe sjolic li boch'otic oy c'usi lec sna'ique”,#Is 29.14. xi ts'ibabil.
20Ja' yu'un ¿c'usi stu sbijilic li boch'otic bijique? ¿C'usi stu li boch'otic lec sna' xchanubtasvanique?#Job 12.17; Is 19.12; 33.18. ¿C'usi stu li boch'otic lec sna'ic yalel c'u x'elan oy li banamile? Yu'un li Diose laj xa sc'atajesbe ta svovijolalic li sbijilic ti sventa no'ox banamile.#Is 44.25. 21Li Diose ta sventa sbijil muc xac' ti ac'o yotquinic Dios ta sventa sbijil stuquic li cristianoetique. Yu'un snopoj ono'ox ti ja' te chac' colicuc o ta sventa li Lequil A'yeje, ja' li Lequil A'yej ti bol lo'il no'ox chich' a'yel c'alal ta jcholcutique.
22Yu'un li judioetique ja' no'ox ibat ta yo'nton tsc'anbeic senyail; jech ec li yanlum cristianoetique ja' no'ox ibat ta yo'nton tsa' ep sbijilic. 23Li vu'uncutique ja' chcalbecutic sc'oplal li Cristo ti ijoc'anat ta cruze, pero li judioetique solel jmacbe cha'yic o. Jech ec li yanlum cristianoetique bol lo'il no'ox cha'yic. 24Pero ta sventa li boch'otic ic'bilique, me judioetic, o me yanlum cristianoetic, ja' mero stsatsal Dios; ja' mero sbijil Dios cha'yic ti c'alal cha'ibeic sc'oplal li Cristoe. 25Yu'un li c'usi ja' yu'un Dios ti bol lo'il no'ox chich' a'yele, ja' ech'em sbijil chc'ot yu'un li cristianoetique. Li c'usi ja' yu'un Dios ti mu'yuc stsatsal tscuyic li cristianoetique, ja' jeloven stsatsal chc'ot yu'unic. 26Quermanotac, q'uelo avilic vo'oxuc ti ic'biloxuque. Mu'yuc ep boch'o bij avu'unic ta sventa abec'talic; mu'yuc ep boch'o tsots svu'el avu'unic; mu'yuc ep boch'o tsots yabtel avu'unic. 27Yu'un li boch'o bol ch-ilat li' ta banamile, ja' cht'ujat yu'un Dios, yu'un jech ac'o q'uexovuc li boch'otic bij yalojique. Li boch'o mu'yuc stsatsal ch-ilat li' ta banamile, ja' cht'ujat yu'un Dios, yu'un jech ac'o q'uexovuc li boch'otic ech'em stsatsal yalojique. 28Li boch'o solel bajbil oe, ti mu'yuc stu ch-ilat li' ta banamile, ja' cht'ujat yu'un Dios, yu'un jech ac'o mu'yucuc stu chc'ot li boch'o oy lec stuic yalojique. 29Yu'un jech mu'yuc boch'o xu' tstoy sba ta stojol li Diose. 30Yu'un li vo'oxuque ja' ta sventa Dios ti oyoxuc xa ta stojol Cristo Jesuse. Ja' li boch'o laj yac' jna'betic c'u x'elan sbijil stuc li Diose. Ja' ti c'u x'elan tuc' co'ntontic chijyilutique, ti c'u x'elan chijlecubutic batele, xchi'uc ti c'u x'elan chijcole. 31Yu'un jech ac'o c'otuc ta pasel jech chac c'u cha'al ts'ibabil ta sc'op Diose: “Li boch'o tsc'an lec muc' sc'oplale ja' ac'o muc'uc sc'oplal ta sventa li Cajvaltique”,#Jer 9.23-24. xi ts'ibabil.
Currently Selected:
1 Corintios 1: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.