1 Crónicas 21
21
La spas tsactsacvun li Davide
(2 S 24.1-17)
1Pero li Satanase#Job 1.6; Zac 3.1; Ap 12.10. lic scontrain li israeletique, lic yac'be sna' David ti ac'o spas tsactsacvun ta stojol li xchi'iltaque. 2Ja' yu'un li Davide lic yalbe li Joab xchi'uc banquilaletic yu'un xchi'iltaque:
—Bat pasic tsactsacvun ta stojol li jchi'iltactique; liquesic ta Beerseba c'alal to ta Dan. Xtal avalbicun ca'ay yu'un jech ta jna' c'u yepal —xut.
3Pero li Joabe jech laj yal:
—Muc'ul Diose ac'o yepajes stuc vo'vinic (100) velta li jchi'iltactic jech chac c'u cha'al yepalic li' ta orae. ¿Me mu xana' ti scotolic jun yo'ntonic ta atojole? ¿C'usi stu avu'un ti chbat jpascutic jeche, yu'un ja' no'ox xu' tsta smulic o li jchi'iltactique? —xut.
4Pero li smantal ajvalile jech icom o. Jech iloc' batel li Joabe; ibat ta scotol yosilal li israeletique. Ts'acal isut batel ta Jerusalén, c'ot yalbe ya'ay David c'u yepal oy ta scotol li israeletique. 5Ta scotol li israeletique oy jun millón xchi'uc vo'vinic ta mil (1,100,000) ti xu' xa yu'unic pleitoe. Ta Judae ja' oy chanib ciento xchi'uc lajuneb xchanvinic ta mil (470,000) ti xu' xa yu'unic pleitoe. 6Pero mu'yuc laj yich' atel li levietique xchi'uc li benjaminetique. Yu'un li Joabe mu lecuc laj ya'ay li smantal ajvalile.
7Li Diose chopol laj yil ti jech la spasique, jech la stac tal tsots vocol ta stojol li israeletique. 8Li Davide jech lic yalbe li Diose:
—Laj xa jta tsots jmul ta atojol ta sventa ti jech la jpase. Ja' yu'un avocoluc pasbun perdón yu'un jmul vu'un li avajtunelune, yu'un ta jbolil no'ox ti jech la jvovil pase —xut.
9Ja' yu'un li Muc'ul Diose la sc'opan li Gade, ja' li j'alc'op ti oy ono'ox c'usi tsjac'be li Davide, jech laj yalbe: 10“Batan, bat albo ya'ay David ti oy oxchop c'usi ta jpasbee. Ac'o st'uj bu junucal tsc'an ta jpasbe”, xut. 11Ibat li Gade, jech c'ot yalbe li Davide:
—Jech chal li Muc'ul Diose: 12‘T'ujo c'usi junucal chac'an. ¿Me ja' chac'an chtal oxib jabil vi'nal, o me ja' chac'an tsalbil chacom oxib u yu'un li avajcontrae, ti chavich' avocol ta uts'intael yu'unique, o me ja' chac'an ti chtal tsatsal chamel oxib c'ac'al li' ta avosilale, ti ch-ulesatic yu'un caj'almantal scotol li achi'iltaque?’, xi. Ja' yu'un nopo me c'usi chatac'be li boch'o la stacun tale —xut.
13Itac'ov li Davide:
—Toj ep chcat co'nton chca'ay. Ac'o xa no'ox ochcun ta sc'ob stuc li Muc'ul Diose yu'un ja' toj ep c'uxubinel yu'un. Ja' mu lecuc me ja' chi'och ta sc'ob li cristianoetique —xut.
14Ja' yu'un li Muc'ul Diose la stac tal tsatsal chamel ta stojol li israeletique, jech ichamic lajuneb xchanvinic ta mil (70,000). 15Li Muc'ul Diose la stac batel yaj'almantal yu'un ac'o yules li Jerusalene. C'alal ja'o yochel yulesele, li Muc'ul Diose toj abul sba laj yil, jech lic c'uxubajuc ta yo'nton. Jech laj yalbe li yaj'almantale: “Xu' xa o; mu xa xamil”, xut.
Li j'almantale te xa'ox oy batel ta yav smajubil strigo li Ornán jebuseo vinique. 16C'alal la stoy sat li Davide, laj yil ti te oy ta o'lol vinajel li j'almantale, stsacoj jun espada loq'uem xa ta sna; te xbechoj batel ta sba li lum Jerusalene yu'un ja' tsmil o. Ja' yu'un li David xchi'uc banquilaletique la spatan sbaic ta banamil, slapojic c'u'il sventa at-o'nton ti ch'ixlajan ta lapele. 17Li Davide jech lic yalbe li Muc'ul Diose:
—Vu'un no'ox ti laj cac' ta atel c'u yepal li jchi'iltaque. Jech vu'un no'ox jtuc ti oy jmule, yu'un la jpas li c'usi chopole. Pero li jchi'iltac le'e mu'yuc smulic. Muc'ul Dios, Dios cu'un, ta jc'anbot vocol ti vu'un no'ox ac'o c'otuc ta jbacutic jchi'uc calab jnich'nab li stojol mulil avu'une. Mu xa xavac'be svocol li jchi'iltaque —xut.
La spasbe jun scajleb smoton Dios li Davide
(2 S 24.18-25)
18Li yaj'almantal Muc'ul Diose jech laj yalbe li Gade: “Albo David ti ac'o spasbe jun scajleb smoton Dios te ta yav smajubil strigo Ornán jebuseo vinique”, xut. 19Li Davide la spas jech chac c'u cha'al i'albat yu'un Gad ta smantal Muc'ul Diose. 20Li Ornane ja'o te ta smaj strigo. C'alal ijoyije, laj yil ti te oy li j'almantale. Jech bat snac' sbaic ta ora li chanib xnich'nab te xchi'uque. 21Li Davide te ibat yo' bu oy li Ornane. C'alal laj yil li Ornane, iloc' batel yo' bu tsmaj strigoe, bat spatan sba ta banamil ta stojol li Davide. 22Li Davide jech laj yalbe li Ornane:
—Ac'bun li yav smajubil atrigo li'i, yu'un ta jpasbe jun scajleb smoton li Muc'ul Diose. Ta jtojbot ti c'u yepal stojole, yu'un jech xu' ch-ech' o li tsatsal chamel oy ta stojol jchi'iltaque —xut.
23Itac'ov li Ornane:
—Lec oy, ajvalil, ich'o; paso li c'usi anopoje. Li' oy vacaxetic; xu' chachic'be smotonin li Diose. Li' oy smajubil jtrigo; ac'o tunuc ta sventa si'il. Li' oy trigo sventa chavac'be smotonin li Muc'ul Diose. Scotol li'i, xu' chacac'bot vo'ot li ajvalilote —xut.
24Pero li Davide jech laj yal:
—Lec oy, colaval. Pero ta jmanbot, ta jtoj ti c'u yepal stojole. Mu ja'uc no'ox ta jc'anbot c'usi ja' avu'un ti chcac'be ta stojol li Muc'ul Diose, xchi'uc mu xu' ta jchic'be smotonin ti me mu'yuc jtojoje —xut.
25Li Davide la stojbe li osile; ja' vaquib ciento (600) ta sep c'anal taq'uin la stoj. 26Jech te lic spasbe jun scajleb smoton li Muc'ul Diose. La xchic'be smoton, xchi'uc la smilbe smoton sventa co'ol yo'ntonic xchi'uc. Lic sc'anbe vocol li Muc'ul Diose. Li Muc'ul Diose la stac'be sc'op li Davide; la stac yalel tal c'oc' ta vinajel te ta sba li scajleb smotone. 27Ja' yu'un li Muc'ul Diose laj yalbe yaj'almantal ti ac'o xa stic' ta sna li yespadae.
Sc'oplal yav ch'ulna
28C'alal laj yil David ti i'aybat sc'op yu'un Muc'ul Dios te ta yav smajubil strigo Ornán jebuseo vinique, te lic smilbe ep smoton li Diose. 29Yu'un li ch'ulna pasbil ta nucul ti la spas li Moisés te ta xocol banamile xchi'uc li scajleb xchic'ubil smotone te oy ta yav te ta lum Gabaón. 30Pero li Davide mu xu' te to chbat sjac' tal ta stojol Dios li c'usi tsc'an tspase, yu'un xi'em yu'un li yespada yaj'almantal Muc'ul Diose.
Currently Selected:
1 Crónicas 21: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.