जेपा 21
21
पाउलु येरुसालेमदु सोवा
1एफीसुगी क्षो़छोकगी गोठीक्याने घोङपा श्युरी, हेक्या डु श्यो़न्दी स्यारी कोस ॱनागीन ॱलीङठेनदु ॱलेप्पालाक। धेनी ॱङेटोगो हेक्या रोदोस ॱनागीन साजारु ॱलेप्ती, होदेने पातारा ॱनागीन ग्याजाला ॱलेप्पालाक। 2होदुरु हेक्याला फोनीके स्योकला डोगीन डु ॱङेदी, होदेलाराङ श्यो़न्दी सोवी। 3हेक्या साईपुरुस साजागी भोलोकने झ्युरी, होदेगी ल्हो स्योकला हो़गीन सीरीया स्योकला सोवी। धेनी ताएर ग्याजारु डुने चालाकक्या तो़न्घोये झ्येरी होदुरु घुक्पालाक। होझ्येरी हेक्या होदुरु भाप्पी। 4धेनी होदुरु हो़गीन धेपा-झ्यीगीनक्याला हेक्या थुक्तु सोरी, खुङक्यामुला धी़न्डा च्यीक धेबी। धेनी धाम्पे थुक्ङीने ॱङो़न खेन्दी, होदेक्याई पाउलुला येरुसालेमदु माडो ॱनेरी श्योवा पुवालाक। 5घीहीन्ना, धी़न्डा च्यीक जोक्ती हेक्या खुङक्याने घोङपा श्युरी डोये झ्येवी। धेनी धेपा-झ्यीगीन आज्यो-नो, ईजी-नुमु धाङ टुवा घीरी हेक्याला, ग्याजा फी थुक्पे क्यारु होवालाक। धेनी हेक्या घीरी ग्याछोगी थामारु पीमु चुक्ती ॱमो़लाम ग्याप्पी। 6होदे स्याम्ने च्यीक-च्यीकला घोङपा श्युरी, हेक्या डु खाला श्यो़न्बी। धेनी खुङक्यागो खोरी खाङबा स्योकला लोक्पालाक।
7ताएर ग्याजाने हेक्या तोलेमाईस ग्याजारु ॱलेप्ती डुने भाप्पी। धेनी होदुरु हो़गीन धेपा-झ्यीगीन आज्यो-नोक्या थुक्तु सोवी धेनी ङीमा च्यीक खुङक्यामुला राङ धेबी। 8ॱङेटोगो होदेने घोङपा श्युरी, हेक्या केसारयारु ॱलेप्पालाक। धेनी होदुरु हेक्या क्षो़ स्येगीन फीलीपगी नाङदु धेबी। फीलीपगो येरुसालेमदु श्याप्तोक पुयेला दाम्दा, मी धी़नने च्यीक लाक। 9खोला ॱनामाला ॱमासोसा भोमो श्यी हो़तालाक। खुङक्या ॱङो़नस्ये खेन्दालाक।
10हेक्या केसारयारु ङीमा आरुङ मा धेदी घाङला, आगाबु ॱनागीन ॱङो़नस्येखेन च्यीक युदेयाने हेक्याचारु होजुङ। 11खी़ पाउलुगी केराक खेरती, खोरी लाक्पा धाङ काङबाक्या धाम्दी ॱनेवालाक, “धाम्पे थुक्ङीगी देरे सुङी, येरुसालेमला डोना याहुदापाक्याई दे काउगी दाक्पोला देरे झ्येरीराङ धाम्गीलाक धेनी याहुदापा मेन्गीन मीरीकगी लाक्पाला ची ग्याप्कीलाक।” 12दे लाब ॱहाघोरती, हेक्या धाङ होदुरु हो़गीन मी घीरीगी पाउलुला येरुसालेमला माडो ॱनेरी श्योवा पुवी। 13हीना पाउलुगी ॱनेवालाक, “घीझ्येरी खेक्या ङी़री ङी सेम ॱमीकीदा शोवाले? ङा येरुसालेमदु चो़न्खाङदु धाक्येला च्यीगा मेन्दा, ङारी चोवो येशुगी छीला स्यीयेला डाढीक हो़क।” 14धेनी पाउलुला काक ॱमाथुक्ती हेक्याई खोला “चोवोगी थुकोङ डुपास्योक” ॱनेरी खाबा धेबी।
15होदे स्याम्ने हेक्या क्षोम्दी येरुसालेम स्योकला सोवालाक। 16केसारयागी धेपा-झ्यीगीन रीङगा हीकीमुला होवालाक। धेनी खुङक्याई हेक्याला मानासोन ॱनागीन, धेपा-झ्यीगीन ॱङीङबा च्यीकगी नाङदु धेयेला क्यावालाक। मानासोनगो साईपुरुस ग्याजाने लाक।
येरुसालेमदु पाउलुगी याकोबला थुक्पा
17हेक्या येरुसालेमदु ॱलेप्ती होदुरु हो़गीन पी़नक्याई, हेक्याला ॱमीच्यीकी ङ्यामो घेरी फेप्सु श्युसुङ। 18ॱङेटोगो पाउलुगी हेक्याला याकोबचारु ठीक्ती लाजुङ। याकोबगी नाङला क्षो़छोकगी गोठी घीरी जोम्दी धेदुक। 19धेनी पाउलुगी खुङक्याला घासु श्युरी, खुङक्याला याहुदापा मेन्गीन मीरीकक्याई घुङदु ताम्शाङ स्येली घाङला, को़न्क्षोकगी जेजा लेगाक्याई कोरला घीरी स्येबालाक। 20पाउलुगी लाबला ङेन्दी खुङक्याई को़न्क्षोकला तो़टा पुवालाक। धेनी खुङक्याई खोला ॱनेवालाक, “पी़नक्याओ, दुरुवा याहुदापाक्याने मी तोङठाकगी चोवोला धेपा झ्येरी, मोशेगी ॱनाङना क्षो़ठीमला ॱमीच्यीकी हुरा झ्येरी चीरी धेदुक। 21धा, ‘मोशेगी क्षो़ठीमला ची घोगीमालाक धेनी टुवाक्याई पाउ चेगीन ॱरो झ्यी घोगीमालाक धेनी याहुदापागी ॱरोला ची घोगीमालाक’ ॱनेरी खेराङगी याहुदापा मेन्गीन मीक्या खोक्दु धेगीन याहुदापा घीरीला ॱलावी ॱनेरी खुङक्याई ॱहाघोरदुक। 22धा हेक्या घी झ्यीये? धा खुङक्याई खेराङ दुरु ॱलेप्दुक ॱनेरी ॱङोन्ने ॱहाघोरकीलाक। 23होझ्येरी हीकी ॱनागीनगो ङेन्रोझ्यी। धान्दा दुरु हेक्यामुला को़न्क्षोकगी डुङदु ॱना क्याक्या मी श्यी हो़क। 24धेनी खेराङ खुङक्यामुला क्षो़खाङदु फेप धेनी खुङक्यामुला चाङमा शोगीन ॱरोगो जे। धेनी खुङक्या घीरीगी ॱरा चेगीनगी आलेगो ॱनाङाजे। देरे झ्येरी खेराङगी क्षो़ठीम चीगीनगो थोङना, मी घीरीगी खेराङगी कोरला ॱनेना लाबक्या शोक्पो लाक ॱनेरी ॱहाघोरकीलाक। 25हीना याहुदापा मेन्गीन मीरीकगी धेपा-झ्यीगीनक्याला ‘कुन्डाला पुपा शामा माशा, ठाक ॱमाथुङ धेनी मीक्पा चीरती, सेसा धी़डोगी स्या माशा धेनी लोक्येम झ्यीगीन लेगाने थाक्रीङबो धो़क’ ॱनेरी हेक्याई ढो़ झ्येरी यीक ढीक्ती कुसाहो़क।”
26ॱङेटोगो पाउलुगी होदे मी श्यीला ठीक्ती, क्षो़खाङदु चाङमा झ्युङये लेगा झ्यीरु सोवालाक। पाउलु खुङक्यामुला चाङमा झ्युङगीन ॱरो दे झ्येवालक। धेनी खो क्षो़खाङ नाङदु जुरी होदे ॱरो जोक्कीन धी़चो़ धाङ खोङ रे-रेगी क्षीला ॱमारछो़ पुगीन, धी़चो़गी कोरला मीमाङक्याला स्येपालाक।
पाउलुला क्षो़खाङ नाङदु शीम्पा
27धेनी ङीमा धी़न्बागो जोक्कु झ्यीदी घाङला, एशीया स्योकने होवा याहुदापाक्याई पाउलुला क्षो़खाङदु थोवालाक। खुङक्याई मी ॱमीच्यीकी माङाला पाउलुगी डाला ॱलारी खोला शीम्दी, 28फेरा ग्याप्पालाक, “ईस्राएल्पाक्याओ, हेक्याला रोवा झ्यीरोझ्यी! घारु-घारु सोरी होराङ ईस्राएल्पाक्या धाङ मोशेगी क्षो़ठीम धाङ क्षो़खाङ देगी कोरला ॱमेटा पाप्कीन मीगो देराङ लाक। धेनी देचो़ च्यीगा मेन्दा, याहुदापा मेन्गीन मीरीकगी मीक्याला दे क्षो़खाङ नाङदु ठीक्ती होरी दे धाम्पे साजाला खी़ ॱमेचाङा शो़जुङ।” 29खुङक्याई एफीसुने होवा तोरोफीमोसला पाउलुमुलाराङ ग्याजारु थोवालाक धेनी पाउलुगी खोला क्षो़खाङ नाङदु ठीक्ती होवालाक ॱनेरी साम्दी दे ॱनेवालाक।
30दे लाबगी ग्याजा नाङ घीरी ठुक्पालाक धेनी मीक्या छोक घीरीने भाङ तारी होवालाक। धेनी खुङक्याई पाउलुला शीम्दी, क्षो़खाङने ढी़दी फीला तो़न्बालाक धेनी क्षो़खाङगी घो ग्याप्पालाक।
31खुङक्याई पाउलुला सेगु झ्यीदी घाङलाराङ, रोमापा ॱमाक्पो़न च्यीकगी येरुसालेम ग्याजा घीरी ठुक्ती धेगीन लाब ॱहाघोरपालाक। 32धेनी खो उक्कुरा ॱमाक्मीक्या धाङ ग्यापो़नक्या ठीक्ती भाङ तारी मीक्याचारु सोवालाक। खुङक्या हुङगीन थोरी मीक्याई पाउलुला श्युरयेगो भोरपालाक। 33धेनी होदे ॱमाक्पो़नगी पाउलुला शीम्दी च्याक्थाक ॱङीगी खोला दोम ॱनेरी, का तेरती मीक्याला ढीवालाक, “मी दे सुले धेनी खी़ घी झ्येजो?” 34हीना मीमाङक्याने रीङगागी लाब च्यीक रीङगागी श्येम्मा तारी केक ग्याप्पालाक। देरे झ्येरी ॱमाक्पो़नगी होदे ठुक्कीनगी दो़नगो क्षा माझ्युवालाक। होझ्येरी खी़ पाउलुला ॱमाक्मीक्याई धेजारु ठीक्येला का तेरपालाक। 35खुङक्या थेपाला जाक्ये झ्यीदी घाङला, मीक्याई पाउलुला सेये झ्येवालाक। होझ्येरी मीक्याने क्योप्येला ॱमाक्मीक्याई खोला खुरती सोवालाक। 36“खोला सो़, खोला सो़” ॱनेरी मीक्या फेरा ग्याप्ती, खुङक्या स्याबाला होवालाक।
पाउलुगी खोरी कोरला स्येपा
37धा ॱमाक्मी धेजा नाङदु जुये झ्यीदी घाङला, पाउलुगी ॱमाक्पो़नला ॱनेवालाक, “खेराङला श्योवा च्यीक पुना ढीक्कुले?”
धेनी ॱमाक्पो़नगी ॱनेवालाक, “ख्यो़ गीरीक केक ग्याप थुक्वाले? 38श्याक्मो तीते एन्ला दे ग्याजाला ठुक्तु च्युक्ती, होदे मी ङेन्पा तोङ श्यीला रीतोङदु ठीक्ती डोगीन एजेप्पागो ख्यो़ माले?”
39पाउलुगी लेन ग्याप्पालाक, “ङा होदे मेन। ङा नी कीलीकीया युगी टारसो ॱनागीन ग्याजा केटाक्क्षेदु क्येक्या याहुदापा च्यीक हीन। दे मीक्याला लाब ताङदु च्युक्रोनाङ ॱनेरी, ङा खेराङला श्योवा पुलाहीन।” 40धेनी ॱमाक्पो़नगी खोला लाब ताङदु च्युक्पालाक धेनी पाउलु थेपा खाला जाक्ती, मीक्याला तीङचोई धो़क ॱनेरी, लाक्ते झ्येवालाक। धेनी मीक्या खाबा धेदी पाउलुगी ईब्रीपा केकला ॱनेवालाक,
Currently Selected:
जेपा 21: LOY
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
