जेपा 18
18
पाउलु कोरीन्थु ॱनागीन ग्याजारु
1होदे स्याम्ने पाउलु एथेनेने घोङपा श्युरी, कोरीन्थु ग्याजारु सोवालाक। 2होदुरु खी़ आकुला ॱनागीन, याहुदापा च्यीकला थुक्पालाक। आकुलागो पोनतुर साजाला केवालाक धेनी खोरी केमी पीरीस्कीलामुला, ईटालीने होरी माङा मेडोवालाक घीझ्येरी ॱनाना रोमापा ग्यावु कालोदेहुगी, याहुदापा घीरीला रोम ग्याखापने थो़न्दी डोयेला का ॱनावालाक। धेनी पाउलु खुङक्याला थुक्तु सोवालाक। 3होदे मीक्या घुर शोगीन लेगा झ्येरी मीछे पी़लालाक। धेनी पाउलु खोराङ घुर शोगीन मी झ्येरी, खोवा खुङक्यामुला धेदी लेगा झ्येवालाक। 4धेनी ङासुगीन ङीमा घीरीला पाउलु च्योई छोक्खाङला सोरी, याहुदापाक्या धाङ गीरीकक्या ङीगाराला चो़लीङ झ्येरी खेलेन्दु च्युक्येला स्युक ग्याप्पालाक।
5सीलवानु धाङ तीमोथेउ माकेडोनीयाने ॱलेप्ती, पाउलुगी खोरी धी़चो़ घीरी याहुदापाक्यामुला, येशुराङ मास्यीका लाक ॱनागीन लाबगी पाङपो तेरये धाङ ताम्शाङ स्येयेला केलालाक। 6हीना खुङक्याई पाउलुला खेमेलेन्दा ॱमेटा तावालाक। धेनी पाउलुगी खोरी घो़ पी़दी होदेगी थाला ॱरुक्ती ॱनेवालाक, “खेक्याला छेपा फोक्ना, खेरी घोवालाराङ फोक्कीलाक। ङी क्यो़न घीया मेक। धा देने ॱहाला, ङा याहुदापा मेन्गीन मीरीकक्या चारु डोयेहीन।”
7होदे स्याम्ने पाउलु याहुदापाक्याई छोक्खाङने थो़न्दी, को़न्क्षोकला चीगीन तीतीउस युसीतो ॱनागीन, याहुदापा मेन्गीन मीगी नाङला सोवालाक। खी़ खाङबा छोक्खाङ भोलोक्तु हो़तालाक। 8याहुदापा छोक्खाङगी चो कीरीस्पु ॱनागीन, मी धाङ खी़ नाङमी घीरीगी चोवोला धेपा झ्येवालाक धेनी कोरीन्थुगी मी श्येम्मा ॱमीच्यीकी माङागीयाः, पाउलुगी ॱलापच्या ङेन्दी धेपा झ्येरी ठी़सो़ लेन्बालाक।
9छेन्मो च्यीक चोवोगी पाउलुला थोङनाङ च्यीकला सुवालाक, “माजीक धेनी खाबा माधेक। धेनी ताम्शाङ दे मीक्याला स्येदी सोङ। 10ङा ख्यी़मुला हो़क धेनी मी सी़याः ख्यो़ला घीया मीझ्यीगीलाक घीझ्येरी ॱनाना दे ग्याजाला ङी मी माङा हो़क।” 11देरे झ्येरी पाउलु कोरीन्थु ग्याजारु को़न्क्षोकगी का ॱलाप्ती, लो च्यीक धाङ दावा ढुक धेपालाक।
12हीना गाल्यो़न ॱनागीन मी आकाईया साजागी पो़न्पो झ्युङी घाङला, याहुदापा रीङगा क्षाम्दी पाउलुला शीम्बालाक धेनी खोला पो़न्पोचारु ठीक्ती 13ॱनेवालाक, “दे मी देगी होरी क्षो़ठीमला ॱमीथी़न्गीन, को़न्क्षोकला तो़पा ताङये मीक्याला ॱलावी।”
14धेनी पाउलुगी लाब ताङये झ्यीदी घाङलाराङ, गाल्यो़नगी याहुदापाक्याला ॱनेवालाक, “याहुदापाक्याओ, दे लेगा दे लेगा आ धाङ ॱमीच्यीकी क्षे नोन्डु च्यीक हीन्ना, ङा खेक्याई श्योवा पुगीन देला ङेन्दी ठीम चेना ढीक्ये हो़तालाक। 15हीना दे लाब दे, छीकक्या धाङ मीङक्या धाङ खेराङक्याई क्षो़ठीम कोरला च्यीगा दुक। होझ्येरी खेराङक्याराङ दी ठीम चो़। ङा नी, लाब देरेक्याई ठीम्पो़न झ्युङयेमेन।” 16दे ॱनेरी खुङक्याला होदेने तो़न्दी झावालाक। 17धेनी देक्या घीरीगी छोक्खाङगी पो़न्पो सोसथेनेला शीम्दी, होदे ठीम चेजा साजागी दोङलाराङ खोला दुवालाक। हीना गाल्यो़नगी घीया या माझ्येवालाक।
पाउलु आन्तीयोक ग्याजाला लोक्पा
18पाउलु श्याक्मो आरुङ माङा, कोरीन्थुरु धेपा-झ्यीगीनक्यामुला धेपालाक। धेनी खुङक्याने घोङपा श्युरी, खो पीरीस्कीला धाङ आकुलामुला ग्याछोगी लाम्गाने झ्युरी सीरीयारु सोवालाक। धेनी खी़ धाम्चा च्यीक श्याक्सा झ्येरी, खो केन्कीरीयाने डोये एन्ला खोरी ॱरा घीरी चेदी घोदोक शो़वालाक। 19धेनी एफीसुरु ॱलेप्ती पीरीस्कीला धाङ आकुला होदुरुराङ धेपालाक। पाउलुगो एफीसुगी छोक्खाङदु सोरी, याहुदापाक्यामुला चो़लीङ झ्येवालाक। 20धेनी खुङक्याई खोला ङीमा तीते खुङक्यामुला राङ श्युक ॱनेरी, श्योवा पुवालाक हीना खी़ माङेन्बालाक। 21धेनी पाउलुगी डी़ घाङला देरे ॱनेवालाक, “को़न्क्षोकगी थुकोङ हो़ना ङा याङ खेक्याचारु लोक्ती हुङयेहीन।” धेनी खो एफीसुने ग्याछोगी लाम्गाने सोवालाक।
22केसारया ग्याजारु ॱलेप्सारती पाउलु येरुसालेमला सोवालाक धेनी होदेगी क्षो़छोकगी मीक्या थुक्पालाक। धेनी खो आन्तीयोक ग्याजाला सोरी धेपालाक। 23ङीमा आरुङ माङा होदुरु धेसारती, खो गालातीया धाङ फारुगीया लुङबागी साजाक्या झ्युरी सोवालाक। धेनी होदे साजाक्याला हो़गीन धेपा-झ्यीगीनक्या, धेपाला स्युक्क्षेरु तारी सोवालाक।
आपोल्लोस एफीसु ग्याजारु
24होदे घुङला आलेक्जेन्डीयागी मी आपोल्लोस ॱनागीन, याहुदापा च्यीक एफीसुदु ॱलेप्पालाक। खो ॱमीच्यीकी घा लाब ताङ थुप्कीन धाङ क्षो़ठीमगी कोरला ॱमीच्यीकी खेवा हो़तालाक। 25खोला चोवोगी लामगी ॱलापच्या जोर हो़तालाक धेनी ॱङीङक्षे झ्येरी, येशुगी कोरला मीक्याला ताई-ताई ॱलापच्या तेरालाक। हीना खोला योहान्नागी ॱनाङगीन ठी़सो़गी कोरला च्यीगा क्षा हो़तालाक। 26खो याहुदापाक्याई छोक्खाङला ॱमीच्यीकी ॱङीङक्षे झ्येरी ॱलापच्या तेरालाक। हीना खी़ ॱलापच्या ङेन्दी, पीरीस्कीला धाङ आकुलागी खोला नाङदु ठीक्ती खोला को़न्क्षोकगी लामगी कोरला स्येदी, धोराङा साला ॱहाघोतु च्युक्पालाक।
27होदे स्याम्ने आपोल्लोसगी आकाईयारु डोये साम्लो तावालाक। धेनी एफीसुरु हो़गीन धेपा-झ्यीगीनक्याई, खोला होदुरु सोङ धेनी खोला घामोमा फेप्सु श्यु ॱनेरी, आकाईयागी ङेनेक्याला यीक ढीक्ती कुरपालाक। आकाईयारु ॱलेप्ती चोवोगी थुक्जेगी झ्येरी होवा धेपा-झ्यीगीनक्याला, आपोल्लोसगी ॱमीच्यीकी घा रोवा झ्येवालाक। 28घीझ्येरी ॱनाना खी़ सुङरापने येशुराङ मास्यीका लाक ॱनेरी पाङपो तेरती, याहुदापाक्याला मीमाङक्या दोङदु ॱमीच्यीकी वाङक्षे लाब तावालाक।
Currently Selected:
जेपा 18: LOY
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
