Fúcihum 30

1Nan Raseel ámir mee ájuhut abaj Sakob aleeh, naciiñ atiool Leya. Narok araaŋool : « Eéni ukaanutom nibaj guleeh, ínje be ecet. » 2Sakob náñigen bu nꞌRaseel. Narogool : « Teer ínje Atúuha hasenuti mee guleeh ? » 3Ñeer Raseel narok araaŋool : « Uñoñow amiigeelom Biliha, ujow njinap mimbil abajom guleeh gumaañen nꞌguboŋom. » 4Raseel ñeer naŋar amiigeelool Biliha asen araaŋool Sakob ayab. Sakob nanap mꞌBiliha. 5Biliha naŋar búteb nabaj Sakob aleeh amaañen. 6Raseel narok : « Atúuha ajanjam báciinerom, nasenom bakooŋ nibaj aleeh amaañen. » Yo ecil mee narogool Daan (yo yommee : acafa.) 7Biliha amiigeel Raseel naŋar búteb benen, nabaj Sakob aleeh amaañen árubahen. 8Raseel narok : « Itataj nꞌatiom taf jaram iheekool. » Narok aleeh aahu Nefutali (yo yommee : bútaj).

9Nan Leya añow mee mara afaafaak gabugoor, naŋar amiigeelool Silipa asen araaŋool Sakob ayab. 10Silipa nabaj Sakob aleeh amaañen. 11Leya narok : « Héee, harije buu uyu ! » Narok aleeh aahu Gaad (yo yommee : harije). 12Silipa nabaj Sakob aleeh amaañen árubahen. 13Leya narok : « Héee, ñeer ibaje gásuumaay. Maareer ukoña gújuhe gurok ibabaj gásuumaay. » Narok aleeh aahu Aseer (yo yommee : gásuumaay).

14Funak fucee nꞌguwaagen, neyim ebule, Ruben najow bu nꞌurager waawu nábajul bo mutiñ man nja mukaan mee akoña nafaret. Náŋarul mo asen jaaool Leya. Raseel narok Leya : « Ubonket újiiom dó mꞌmutiñ man aleehi aseni mee. » 15Leya násuupool arogool : « Nuŋar mee araaŋom tooguti, bandiŋ nucamen be eyab mutiñ mara gafaret man aleehom aŋarulaam mee ? » Raseel nabaañ arogool : « Eéni usoŋ min usenom mutiñ maamu, jaat Sakob bu gaŋot baabu nꞌaw. »

16Nan Sakob abaañulo mee gárusa gaagu nꞌurager waawu, Leya nápurul ngurehoor. Narogool : « Jaat aw bu gaŋot baabe nꞌínje mara inoonoom gaŋoha gaagu mꞌmutiñ man aleehom aŋarulaam mee. » Ñeer Sakob naŋot bugo nꞌLeya.

17Leya naŋar búteb, nabaj Sakob aleeh amaañen atogen mara Atúuha nayayab báciinerool. 18Leya narok : « Atúuha asenansen bacaamom mara niŋare amiigeelom isen araaŋom. » Narok aleeh aahu Isakaar (yo yommee : bacaam). 19Leya nabaañ aŋar búteb nabaj Sakob aleeh amaañen hakaan mee futok nu hanur. 20Leya narok : « Atúuha asenansen waaf wajage. Maareer araaŋom bu gálebienom mara isenoosen guleeh gumaañen goono futok nu hanur. » Narok aleeh aahu Sabulon (yo yommee : gálebien). 21Púr to, nabaj aleeh akoña narogool Diina.

22Atúuha nawosen ñeer Raseel, nayab báciinerool, nakaanool mimbil ájuh abaj aleeh. 23Raseel naŋar búteb nabaj aleeh amaañen. Narok : « Atúuha ñeer ápurenampuren nꞌñisuu ! » 24Narok aleehool Suseef (yo yommee : gabenen). Náciin arok : « Emít ekaan Acehériit mee asenom aleeh acee benen. »

Sakob nakaan asaanum

25Suseef abajibaj, Sakob narok Laban : « Ukahenom min eet bu síndo'om bo mꞌmofom. 26Ñeer ukahenom ukoñaom gacil mee níjagak bu nꞌaw, bugo nꞌguleehom, min iŋariil nijow. Aw úmimir set gújagak buu nikaane bu nꞌaw. » 27Laban narogool : « Eéni múmbaam músuumisuum, nulako taahe. Ejiilom erogandok#30.27 Ejiilom erogandok Ejiil yaayu yo yommee ejiil yara búnaati. miiya mucile Acehériit mee násoonienom. 28Ulobom butum buu nibili bacaam mimbil icaami. » 29Sakob narogool : « Umímir set gújagak buu nikaani, ban uñow sikoorei sinogoor mee, ínje. 30Nan ijaalo mee fubaji furehut miñ, maareer fújalakojalako. Acehériit mee ásoonienisoonien kábiriŋ nan ikage taahe gaahom. Ñeer tíntiiŋ níjagak may bu nꞌfiilom. »

31Laban nabenen arogool : « Waa nibili bacaam ? » Sakob násuupool arogool : « Bajut wan ubilaam bacaam. Eéni usoŋe wan ibili mee elob, ínje bu gamat sikoorei benen. 32Jaat ínje be éjool iñeeroor ekoorei peepe, bu gápajul sísaaja nꞌsijaameen sapaar mee son sakaan mee tam tam son músaaja mañuget mee. Dó bil mee gáani bacaamom. 33Nanoonan nucamene be émir teer ínje an hara maregen, nújool uñow bacaamom. Ejaameen yanooyan nubile etook dó nꞌekooreom yakaanut tam tam ban epaarut, teer jísaaja janoojan jañugehut, númir urok íkuekuet so. » 34Laban narogool : « Iyoo isonsoŋ. »

35Bare no nꞌfunak faafu, Laban nápajul gújikal gara sijaameen gapaar mee son gammee tam tam. Nápajul may ubarak wapaar mee ban nukaan tam tam son sísaaja saasu peepe sañuget mee asen guleehool. 36Afaak naŋariil gukuhi Sakob butum ejow gunak gúfaajiir, min Sakob amat sikaj saŋaño to mee nꞌekoore yara Laban.

37Ñeer Sakob naŋar uhan wáninif wara ununuk úfaajiir wanogoorut amilij jaram muhiina maamu múpurul. 38Naŋar gugol gaagu akaan dó nꞌuŋant waawu min sikaj saasu siñow go, mara siregenregen jíŋooho so bajaalo bu marem. 39Nan nja sommee njíŋooho, nsiñeer gugol gabeheni ró mee nꞌuŋant waawu, yo ecil mee nsibaj muleeh : maamu mukaan tam tam, mucee muliisiis, maamu mmubaj upaar.

40Sakob nápajul ubarak wara sísaaja, nabaŋ wo uñeeroor nꞌsikaj sara Laban sapaar mee son sañuget mee. Maa nabaj maa maa ekoore yoola yásuupoorut nꞌsikaj sara Laban.

41Nanoonan sikaj sáluken mee son njíŋooho, Sakob naŋar uhan waawu akaan dó nꞌgaŋant gaagu dan sireme mee mimbil siñow wo so njíŋooho. 42Bare éeni sayoon mee son njíŋooho, mat abaŋ uhan waawu dó nꞌuŋant waawu. Yo ecil mee sayoon mee sara Laban, min sáluken mee sikaan sara Sakob. 43Sakob maa nabaj maa maa fubaj futambi. Ababaj sikoore samemmeeŋ, emiigeel ukoña, nꞌújagaga umaañen, siñonkome son sifalo.

Currently Selected:

Fúcihum 30: gsl

Highlight

Copy