Korɛntitɔnŋ kiri (1) 11

1Á ji míŋ nakitɔnŋ ni i, miŋ tu míŋ yɛrima ki i Kirisa rakitɔnŋ i ɲaan wɔ̀ tɛ.

Ŋununa la bi ki Kirinŋ gbɛmaŋ ki ru

(Efɛsitɔnŋ kiri 5.22–24; Timote (1) 2.8–14)

2Míŋ i ábɛɛ co-a, sabu ábɛɛ ɲakili i míŋ na á mabi kiri bataa ru, niŋ fa á i ji tagbɛ kiri pa miŋ tu míŋ yìrì kila wɔri-i ábɛɛ tɛ ɲaan wɔ̀ tɛ.

3Míŋ i ǹʼtɛ ábɛɛ i nwɔ̀ tɔ, niŋ i kaa : Kirisa i shuru bataa ŋununtiŋ i, shuru i ji mari ŋununtiŋ i, Kirinŋ i ji Kirisa ŋununtiŋ i.#11.3 Kirisa i shuru bataa ŋununtiŋ i, shuru i ji mari ŋununtiŋ i, Kirinŋ i ji Kirisa ŋununtiŋ i : Ǹʼbɛɛ ri i ka mani ka ɲaanbi-a tu ǹʼkɔri ku tu shuru po-i Kirisa ru, mari i po shuru ru, Kirisa i po Kirinŋ nu. 4Shuru woo shuru i Kirinŋ nafɛ-a walima ntiŋ i cintɔnbi wulu bi a ŋununa lamaan wu, nintiŋ i a ŋununtiŋ ki rufyɛ-a. 5Nka mari woo mari i Kirinŋ nafɛ-a walima nmari i cintɔnbi wulu bi a ŋununa labali wu, niŋ mari ki i a ŋununtiŋ ki rufyɛ-a, sabu nmari i ji-a miŋ tu mari wɔ̀ a ŋuniŋ ki shɛn-i, walima ǹʼsuntɛri-i. 6A mari wɔ̀ ji a ŋununa la-a kì, tu niŋ mari ki a ŋuniŋ ki suntɛri walima tu nmari ǹʼshɛn! Nka a ŋuniŋ shɛn ki walima ǹʼsuntɛri ki ji mari wɔ̀ ɲaankwun-a, tu nmari a ŋununa la sa!

7Shuru kakan ntiŋ i a ŋununa la kì, sabu shuru i Kirinŋ miniŋ ki i, ǹʼnɔɔri ki i ja-a nwɔ̀ ru. Nka mari ki i shuru nɔɔri ki i. 8Sɛli ki ra, shuru po mari ru kì, nka mari kɔniŋ po-i shuru ru, 9niŋ fa shuru ramɔni mari bira kì, nka mari ramɔni-i shuru bira. 10Niŋ ki ra, faan taanmashɛ kakan-i ŋì i ja mari ki ŋununu mɛlɛkɛn kiri bira, nwɔ̀ i ǹʼji-a tu nmari faan ki bɛɛ fɛ. 11Nka niŋ fa a fɔn na, Ŋuntiŋ ki gbɛ, shuru ki fa mari ki i arìmaŋ wɔ, ǹʼtɔri so-a shɔ-i ǹʼtɔri kɔɔtɛ kì. 12Mari po-i shuru ru, shuru i ji po mari ciiru, finŋ bataa i po-ri Kirinŋ nu.

13Ábɛɛ yɛrima kiri gbɛ, ǹʼshɔ-i mari i Kirinŋ nafɛ-ri a ŋununalabali wu wa? 14Ŋì i kɛɲɛ konanbi maka ɲaan shɔɔrinŋ ki wu, a shuru ja a ŋununshinŋ ki bo ŋì i ŋma, niŋ i ɲaankwunŋ na bi. 15Nka ŋununshinŋ ŋmani ki i mari wɔ gbɛbi i, sabu ǹʼwɔri-i nmari ki tɛ a ŋununalafinŋ i. 16Hali jiŋ konwɔtiŋ ji fa a sɔsɔɔlinŋ tan-a, tu ntiŋ ǹʼtɔ tu ladaŋ tɔri nmaŋ yibɛɛ gbɛ kì, ǹʼtɔri dumiŋ Kirinŋ wɔ konanbi kwuru kiri gbɛ ka kɔɔtɛ kì.

Ŋuntiŋ ki wɔ fani ki bi ki

(Matiyu 26.26–29; Maraka 14.22–25; Luki 22.15–20)

17A niŋ po san nmaŋ, míŋ jɛri-i ábɛɛ ra, sabu ábɔɔ manja kiri fu de-a ábɛɛ faninmwuŋ kì, duu fubalibi.

18Ǹʼjɔnɔ ki, míŋ ǹʼnama-i tu ábɛɛ ji manja ki ra, tu koŋ fɔn fa awɔ kwuru ji-a i, míŋ a bili niŋ kɛlinŋ ki bɛɛ ra. 19Sɛli yɛ, fubalibi kakan-i ŋì i kila ábɛɛ faninmwuŋ, nwɔma nwɔ̀ri i bilinatɔnŋ sɔbɛ kiri i, nini i tɔ po san ábɛɛ ru.

20Nka a ábɛɛ ámaŋ nakɔli Ŋuntiŋ ki wɔ fani wɔlinŋ ki numaŋ ki ru, ábɛɛ ǹʼma-a a maka ra kì. 21Sabu a ábɛɛ sɔɔ nuŋ ki tɛ waarinŋ wɔ̀ ru, koŋ bataa i a cunadi-a a yɛri wɔ nufinŋ simaan ki sun, niŋ ɲaan ki tɛ, nufinŋ ki i waa san-a ǹʼbɛɛ ri sun, ŋì i ǹʼtɔri ri kari-ri.

22A ǹʼŋuŋ ki ji ku numaanna fa lɔ mwunumaanna a, kaniŋ ni ábɛɛ gbɛ, á i niŋ ma niŋ mani kiri ru kì wa? Walima ábɛɛ i ǹʼtɛ á i Kirinŋ wɔ konanbi kwuru ki bikwɔ á sun, á i ǹʼnu gbɛwɔ kiri ɲaankwun wa?

Ábɛɛ ɲaanna tu míŋ kakan ŋí i ábɛɛ jii bi niŋ nu wa? Aayi dɛ, míŋ a so ábɛɛ tɔjii bi-i niŋ bishi ra kì. 23Míŋ ladaŋ wɔ̀ kila-i Ŋuntiŋ ki gbɛ, ŋí i ji ábɛɛ kali ǹʼwu, niŋ i kaa : cii wɔ̀ ru kí Ŋuntiŋ Yesu de-i koŋ jɛ kiri gbɛfɛ, ntiŋ bwuru ki shi-i, 24ntiŋ i baraka bi Kirinŋ tɛ, ntiŋ i ǹʼnucɛn cɛn. Ntiŋ i ǹʼbi : « Ka i míŋ firi ki i, ninwɔ̀ wɔri-i ábɛɛ bira, á tu, á i ka ma-ni, nwɔma á ɲakili i tu míŋ na. » 25Mìŋ ɲaan tenŋ ki tɛ, nufinŋ ki numaan ki kɔɔtɛ, ntiŋ i dunfɛnŋ kulu ki shi, ntiŋ i ǹʼbi : « Ka kulu ka i Kirinŋ wɔ tɔnwɔri ŋunaŋ ki i, ninwɔ̀ ki shi-i míŋ cunŋ ki baraka ra. Waaci woo waaci a ábɛɛ ji niŋ mwunu-na, á á ɲakilila bo míŋ bi tɛ. » 26Niŋ ki ra, a ábɛɛ ji ka bwuru ka nu-a, á i dunfɛnŋ ka mwunu-ni waarinŋ woo waarinŋ, ábɛɛ i Ŋuntiŋ ki beŋ ki sunjo-a, fɔ ŋì i ta so ǹʼpwulu na shikaŋ ki sun.

27Niŋ ki ra, a konwɔtiŋ Ŋuntiŋ ki wɔ fani wɔlinŋ ki nu, walima ntiŋ i a mwunu ǹʼwɔ jaakilaŋ ki ra ɲaan tɛ, nwɔ̀ nɔɔri bili-la Ŋuntiŋ ki sun kì, nintiŋ pɔli-i Ŋuntiŋ ki firi ki fa ǹʼcunŋ ki gbɛ. 28Niŋ ki ra, koŋ bataa a yɛri ciiru ki rufɔɔka shɔ, ntiŋ i kila ntiŋ i ka bwuru ka nu, niŋ fa ntiŋ i ka dunfɛnŋ ka mwunu. 29Sabu konwɔtiŋ bwuru ka nu niŋ fa ntiŋ i mwunufinŋ ka mwunu a miiribali ǹʼkɔri ki sun tu, Ŋuntiŋ ki firi ki i, nintiŋ Kirinŋ wɔ tɔnkwulu ki dɔri-i a yɛri wu a mabi ki wu. 30Ninki cin-i, kiratɔnŋ mwɔɔnna fa bɔlɔma mwɔɔnna i ji ábɛɛ kanfɛ, ǹʼbɛɛ ri fani i ji beeni. 31A yibɛɛ ji yi yɛri wɔ bi kiri rufɔɔ-ra yi yɛrɛtɛ, Kirinŋ wɔ kiti ki ra fɛɛn yibɛɛ sun kili kì. 32Nka Ŋuntiŋ ki i kiti ki fɛɛn-na yibɛɛ sun, ŋì i yi kulu, nwɔma a fa yibɛɛ fa juniɲa nu konaŋ kiri haliki tenŋ i kì.

33Niŋ ɲaan ki tɛ, ńʼtindaŋ ni, ábɛɛ ja ámaŋ nakɔli Ŋuntiŋ ki wɔ fani wɔlinŋ ki tɛ waarinŋ woo waarinŋ, á ámaŋ sunsuu ǹʼwu. 34A bɛɛ ji konwɔtiŋ wu, tu ntiŋ nufinŋ nu awɔ mani ki ru sun, nwɔma ábɔɔ maŋ nakɔlimaan ki fa na ta Kirinŋ wɔ tɔnkwulu ki dɔri a yɛri wu kì. Nwɔ̀ i nanɔri pyɛ kiri i, a míŋ na ta ábɛɛ tɛ waarinŋ wɔ̀ ru, míŋ a ta nini ɲaanpo.

Currently Selected:

Korɛntitɔnŋ kiri (1) 11: JOB

Highlight

Copy

Compare