Korɛntitɔnŋ kiri (1) 10
10
Isirayɛlidaŋ kiri wɔ Kirinŋ wulu sɔsɔ bi ki
(Iburu kiri 3.7–19)
1Ńʼtindaŋ ni, míŋ i ǹʼtɛ ńʼtu ábɛɛ i tu yibɛɛ tiŋ cɛɛnni kiri mabi kiri tɔbali li kì : Musa wɔ sunŋ ki ra, kí bataa wuru tiri-ra loŋ ki fɛ, kí fɔn bataa i ji wɛɛlufinju ki fwuu. 2Kí bataa i ji Musa wɔ wurama ki kila loŋ ki fa wɛɛlufinju ki ru.#Pyɛɛri (1) 3.20. 3Nufinŋ wɔ̀ po wuru Kirinŋ yɛrima ki gbɛ, kí bataa i niŋ nufinŋ ki bɛɛ nu.#Pobi ki 16.4–35; Sariya kiri 8.3; Shu kiri 78.24–29; Yuhana 6.31–49. 4Ju wɔ̀ po-i Kirinŋ gbɛ, kí bataa i ji ǹʼbɛɛ mwunu niŋ na. Niŋ ju ki wuru Kirinŋ wɔ ju u, nwɔ̀ wuru byin po-a faa ru. Niŋ faa ki po wuru Kirinŋ nu, ŋì i a maanni de-ri Isirayɛlidaŋ kiri fan. Niŋ faa ki wuru Kirisa.#Pobi ki 13.21; 14.22; 16.4; 17.6; Nubitan kiri 20.7. 5Niŋ fa a fɔn na, kí bataa bi so di-i Kirinŋ tɛ kì, sabu kí mwɔɔnna beeni-i jaŋ ki faninmwuŋ.#Nubitan kiri 14.30–32.
6Niŋ bi kiri bataa i yibɛɛ gbɛ ɲaanjifinŋ ni i, nwɔma yibɛɛ fa yi ɲaninpo bi kulinŋ kiri tɛ, miŋ tu kí ma-i ɲaan wɔ̀ tɛ kì.#Nubitan kiri 11.4. 7Á fa ji nini bɛɛ sali, á i pɛli li tan-ni kì. Kirinŋ wɔ wulu ki i ǹʼbi-a ka ɲaan ka tɛ tu : « Konaŋ ki bataa i sɔɔ, kí i nuŋ ni nu, kí i mwunufinŋ ni mwunu. Niŋ kɔɔtɛ, kí i arì bo jɔnŋ kulinŋ kwuru ki bataa tan sun. »#Pobi ki 32.6.
8Yi fa yi yɛri ji nankulinŋ ni i, miŋ tu ǹʼbɛɛ ri arì yɛri ji wuru ɲaan wɔ̀ tɛ kì, fɔ ŋì i ji sababu kí ru koŋ waa kɔniŋ fa byaŋ (23.000) i beeni sunŋ tenŋ.
9Yi fa Kirisa kɔrɔbɔ, miŋ tu ǹʼbɛɛ ri ǹʼma wuru ɲaan wɔ̀ tɛ kì, niŋ i ji sababu kí i beeni myɛɛn ɲiin ta kiri ra.#Nubitan kiri 21.5–6.
10Á fa ámaŋ ŋunuŋunu, miŋ tu ǹʼbɛɛ ri ǹʼma wuru ɲaan wɔ̀ tɛ kì, niŋ i ji sababu koŋ kilɛn mɛlɛkɛn ki i kí haliki.
11Niŋ ɲaanfɛkwulu bi kiri bataa kí kila-i, yìrì i sɛbɛ, nwɔma yìrì i ji ɲaanjifinŋ i, yibɛɛ juniɲa nakɔɔratɔnŋ kiri tɛ. 12Niŋ ki ra, konwɔtiŋ cirasun tu afinŋ tumaan a, tu nintiŋ a ɲakili tu a yɛri ra, nwɔma a fa na fɛɛn kì.
13Kɔrɔbɔ bi wɔ̀ri ábɛɛ kila-i, á ǹʼtɔ tu niŋ bishi ǹʼbɛɛ ri kila fwuude ábɛɛ jɛŋ. Kirinŋ i dariwulutiŋ i, ŋì a ncusun kɔrɔbɔ bi i tu ábɛɛ ra tu nwɔ̀ a kwun ábɛɛ ru kì. Kɔrɔbɔ bi ki waari ki ru, Kirinŋ a na ɲaan wɔri ábɛɛ tɛ, á i so ǹʼkwun-i á ru.
Bilinatɔnŋ ki fa ɲinijɛ kiri dɛbɛ bi ki
(Korɛntitɔnŋ kiri (2) 6.14–18; Ɔrɔmutɔnŋ kiri 14.13–23)
14Niŋ ki ra, ńʼwɔ wɔshuru byii ri, á bili pɛli tanmaanna ki jɛŋ. 15Míŋ i wulu ki bi-a ábɛɛ tɛ ka ɲaan ka tɛ, sabu ábɛɛ i ɲakilitiŋ ni. Ábɛɛ yɛrima kiri míŋ bi wulu kiri rufɔɔka shɔ. 16Yi yi miiri Ŋuntiŋ ki wɔ fani wɔlinŋ ki bi sun, yibɛɛ i baraka bi-a Kirinŋ tɛ mwunukulu wɔ̀ bira, niŋ yibɛɛ fa Kirisa cunŋ ki wɔ tenbi ki taanmashɛ ki ji-a kì wa? Yi i baraka bi-ri Kirinŋ tɛ bwuru wɔ̀ bira, niŋ i ji yibɛɛ fa Kirisa firi ki wɔ tenbi ki taanmashɛ ki i kì wa? 17Bwuru ŋuŋ tenŋ i nmaŋ, niŋ ki ra, hali yibɛɛ ji mwɔ, yibɛɛ bataa i firi tenŋ i, sabu yibɛɛ fɔn bataa dɛbɛ-i bwuru ŋuŋ tenŋ sun.
18Ábɛɛ Isirayɛlidaŋ kiri ɲaan ki shɛɛli, nwɔ̀ri i Kirinŋ tɛ sarakawɔrɔmaŋ ki sun finŋ kilɛnmaan kiri nu-a, tenbi i nini fa Kirinŋ faninmwuŋ, sabu sarakawɔrɔmaŋ ki i Kirinŋ wɔ.
19Míŋ i ǹʼtɛ ŋí i nfɛnŋ bi ábɛɛ tɛ? Tu pɛlilashɛn ki fa pɛli kiri finŋ sɔbɛ ri i wa? 20Aayi, míŋ i ǹʼtɛ, ŋí i ǹʼbi tu kíbɛɛ i saraka wɔ̀ri san-a, ńʼtu kí yìrì san-a ɲinijɛ ri tɛ, ńʼtu kí yìrì san-a Kirinŋ tɛ kì, míŋ dumiŋ ǹʼtɛ ábɛɛ fa ɲinijɛ ri i dɛbɛ kì. 21Ábɛɛ ra so á mwunu-i Ŋuntiŋ ki wɔ mwunukulu ki ra, á i á mwunu ɲinijɛ kiri wɔ ki ra mìŋ manaanŋ tenŋ ki ru kì. Ábɛɛ ra so nufinŋ ki nu-i Ŋuntiŋ ki wɔ tabali ki sun, á i ta ǹʼtɔri nu ɲinijɛ kiri wɔ tabali ki sun kì. 22Walima yibɛɛ i ǹʼtɛ yi Ŋuntiŋ ki wɔ tɛnbi ki darupo bo yi sun wa? Ábɛɛ i ǹʼmiiri-ra tu yibɛɛ faan ki gbɛ ǹʼwɔ ki wu wa?
Kirinŋ gbɛ bi ki yi mabi ki bataa ru
23Ǹʼbɛɛ ri tu saa i yibɛɛ gbɛ, yi i bi bataa ma, nka sɛli ki ra, bi bataa ma shɔ kì. Kí tu saa i yi gbɛ yi i bi bataa ma, nka sɛli ki ra, bi bataa ma ǹʼbɛɛ bo-a koŋ wɔ bilinabi sun kì.
24Tu koŋ tɔri tenŋ fa a yɛri nafan ceeli kì, nka tu ntiŋ koŋ tɔri kiri wɔ ki ceeli.
25Finŋ woo finŋ i ju-a kuka ra, á niŋ bataa sa nu, á fa nanɔri tan niŋ kilaka ɲaan sun kì, nwɔma ábɛɛ ciiru tɔnŋ ki fa na á sɔsɔ kì, 26sabu ǹʼsɛbɛ-i Kirinŋ wɔ wulu ki ru tu : « Pwɔkulinŋ ki fa a ciiru finŋ kiri bataa i Ŋuntiŋ Kirinŋ ki wɔ. »#Shu kiri 24.1.
27A bilinabali ki bɛɛ ábɛɛ dɔri nufinŋ wu awɔ mani nu, a ntiŋ ta finŋ woo finŋ wɔri ábɛɛ tɛ, á niŋ nu byɛyi. Á fa nanɔri tɔri tenŋ tan niŋ bi sun kì, nwɔma ábɛɛ ciiru tɔnŋ ki fa na á sɔsɔ kì. 28Nka, a koŋ ǹʼbi ábɛɛ tɛ tu : « shɛn ka kilɛn-i pɛli la » walima « ǹʼji-i saraka a », wulubitɔnŋ ki bira, á fa niŋ nu kili kì, nwɔma nintiŋ ciiru tɔnŋ ki fa na ntiŋ sɔsɔ kì. 29A míŋ ǹʼbi tu ciiru tɔnŋ ki fa sɔsɔ tan kì, míŋ ábɛɛ yɛrima kiri ciiru tɔnŋ kiri wulu bi-a kì, nka konwɔtiŋ ki tɔɔnnakwun ki tan-i, ninki wɔ ki wulu yɛ. Ábɛɛ ra ǹʼbi tu « nfɛnŋ na míŋ ńʼyɛri suu san-ni ńʼdintɛ bi ma sun koŋ tɔri bira? 30Míŋ baraka bi-i Kirinŋ tɛ nufinŋ wɔ̀ bira, nfɛnŋ na koŋ tɔri i míŋ tɔli-li niŋ bira? »
31Niŋ na, ábɛɛ ji nuŋ nu-a woo, á ji mwunufinŋ mwunu-na woo, á ji finŋ woo finŋ ma-a, á Kirinŋ gbɛ ǹʼbataa ra. 32Á fa ji koŋ tɔri tenŋ ŋununli sababu u kì. Ŋì shiya tɔri woo, Yawutu i woo, nwɔ̀ri bili-i Kirinŋ na woo, á fa ji koŋ tɔri tenŋ ŋununli sababu u kì. 33Míŋ yɛri ki i ǹʼma-a mìŋ ɲaan ki tɛ, ŋí i koŋ bataa dintɛ bi ki ma-ni, ŋí a ńʼtenŋ wɔ nafan ki ceeli-li kì, nka míŋ i koŋ mwɔɔnna nafan ki ceeli-la, nwɔma kí i so arì mwu-i.
Currently Selected:
Korɛntitɔnŋ kiri (1) 10: JOB
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc.