Pin'ilʋg 41

Faaro zaansʋŋ la yɛla

1Yʋma ayi' nya'aŋ ka Faaro zaansim, ka o zi'e kɔldakanɛ ka ba buon Nail la nɔɔrin. 2Ka niigi ayɔpɔi yi kɔldaugin la na nɔb hali saalim ɔnbid kɔlkantima. 3Lin nya'aŋ ka niigi ayɔpɔi banɛ waŋim ka pʋ vɛnla yi kɔldaugin la na zi'e kpi'e na'abama la kɔldaug la nɔɔrin. 4Ka banɛ waŋim ka pʋ vɛnl la vɔl na'abanɛ nɔbi saalim la. Ka Faaro daa yirigi nie gbɛɛmin. 5Ka o lɛbi gbis ya'as ka lɛn zaansim nyɛ kawɛnna ayɔpɔi ka ba bɛdim ka vɛnl sʋ'ʋŋa la'asi bɛ kawɛndaug yinne ni. 6Ban nya'aŋ la ka kawɛnbaanlʋg ayɔpɔi mɛ yina ka sisi'em yi ya-nya'aŋ na nwɛ' ba ka ba ziank. 7Ka kawɛnbaanlʋg la vɔl kawɛnbɛda la, ka Faaro nie gbɛɛmin nyɛ ka li an zaansʋŋ.

8 # Dan 2:2 Bɛogʋ nie la ka o sʋʋnr san'am, ka o tʋm buol ya'am dim nɛ banɛ tʋm nyalima Egipt teŋgbauŋʋn la wʋsa. Faaro da tu'asi ba o zaansʋŋ la yɛla amaa sɔ' da pʋ nyaŋi tu'as o zaansʋŋ la gbinnɛ. 9Ani ka onɛ kuobid Faaro daam la yɛl ye, “Zina, m tiɛn gbɛlʋŋ kanɛ ka m maal la: 10Na'ab Faaro, fʋ sʋnfʋ da pɛlig nɛ fʋ yammis ka fʋ nɔk mam nɛ banɛ maan bodobodo kpɛɛm la keŋi yɔ sanrega ni banɛ gur na'ab tuongat la yin la, 11ti nidib ayi' la da zaansim yʋ'ʋŋ yinne ka zaansʋŋ wʋsa mɔri li gbin. 12Hibiru dim dasaŋ da la'am bɛ nɛ ti anina, ka an banɛ gur Na'ab tuongat la sankpan'as. Ka ti tu'asi ti zaansima la tis o ka o pa'al sɔ' wʋsa zaansʋŋ gbin. 13Ka si'el wʋsa sid maal nwɛnɛ on yɛli ti si'em la. Ba da lɛbis mam m tʋʋma ni ka yul dau kaŋa la tiig zug.”

Josef pa'al Faaro zaansʋŋ la gbin

14Faaro da tʋm ye ba mɔr Josef na, ka ba yis o sanrega la ni tɔ'ɔtɔ mɔr o na. On pʋni o zug ka yɛɛ o fuudi naae la, o kɛn Faaro tuon na. 15Ka Na'ab la yɛl Josef ye, “M zaansimnɛ ka sɔ' kae na nyaŋi tu'asimi li gbinnɛ, amaa m wʋmi fʋ yɛla ye, fʋ ya'a wʋm zaansʋŋ fʋ na nyaŋi tu'asi li gbin.” 16Josef da yɛl Faaro ye, “Man kʋ nyaŋi tu'asif zaansʋŋ la gbinnɛ, amaa Wina'am ma'aa na nyaŋi tu'as Faaro li gbin.” 17Ani ka Faaro yɛl Josef ye, “M zaansʋŋ la pʋʋgin ka m nyɛ ka m zi'e Nail kɔldaug la nɔɔrin, 18Ka kɔldaug la pʋʋgin ka niigi ayɔpɔi yina nɔbi saalim bɛ kɔlkantima la sʋʋgin ɔnbid. 19Lin nya'aŋ la, ka niigi ayɔpɔi yina waŋim pʋ vɛnla ka banlig hali. Ya'a an sida, man nan zi' nyɛ niigi Egipt teŋin ka ba waŋim ka lɛr wʋʋ na'abama. 20Na'awana ayɔpɔi banɛ pʋ vɛnl la vɔl na'abanɛ nɔbi vɛnl ka dɛŋi yi yiiga na la. 21Amaa ban vɔli ba naae la nya'aŋ, sɔ' kʋ baŋ ye ba vɔl si'ela, ka nan kpɛn an wʋʋ ban aan si'em la. Ani ka m nie gbɛɛmin. 22M zaansʋŋin la ya'as, m nyɛ kawɛnna ayɔpɔi la'asi bɛ kawɛndaug yinne ni vɛnl ka mɔr bielim sʋ'ʋŋa. 23Ban yina la nya'aŋ ka kawɛnna ayɔpɔi mɛ yina banlig hali ka sisi'em da'ae yi ya-nya'aŋ na nwɛ' ba ka ba ziank. 24Ka kawɛnbaanla la vɔl kawɛnsʋma ayɔpɔi la. Ka m zaŋi li yɛla tu'asi tisim tiim dim amaa sɔ' pʋ nyaŋi yɛli mɛ li gbinnɛ.”

25Ani ka Josef yɛl Faaro ye, “Naa na'ab Faaro, fʋ zaansʋŋ la anɛ yinne ka li gbin mɛ an yinne. Wina'am nienɛ pa'alif on bɔɔd ye o maal si'em. 26Na'asʋma ayɔpɔi la anɛ yʋma ayɔpɔi ka kawɛnsʋma ayɔpɔi la mɛ an yʋma ayɔpɔi. Li wʋsa anɛ yinne ka mɔr gbin yinne. 27Na'awana ayɔpɔi banɛ pʋ vɛnl ka yina la zi'enɛ pa'al yʋma ayɔpɔi, ka kawɛnbaanla banɛ ka sisi'em yi ya-nya'aŋ na ʋki ba la pa'an yʋma ayɔpɔi mɛn. Ba pa'an ye kɔ'ɔm na bɛ yʋma ayɔpɔi. 28Li kpɛn anɛ wʋʋ mam yɛlif si'em la. Wina'am pa'alif nɛ on bɔɔd ye o maal si'em. 29Yʋma ayɔpɔi la, Egipt teŋin la wʋsa ba na nyɛ zʋʋd hali ka li zu'oe, 30amaa yʋma ayɔpɔi banɛ dɔl la, kɔ'ɔmtita'ar na lu teŋin la; hali ka sɔ' mɛkama tam ye tigir daa bɛ Egipt teŋgbauŋʋn. Kɔ'ɔm la na ti daam teŋgbauŋ nwa' dim pamm. 31Ba kʋ lɛn tɛnr tigir kanɛ daa bɛ teŋin la, bɔzugɔ, kɔ'ɔm kanɛ na dɔlli li nya'aŋ la na wʋm nidib hali. 32Ka dinɛ kɛ ka zaansʋŋ la kɛn Faaro san'an na zin'is ayi' la anɛ ye Wina'am pʋn dɛŋi gban'e li sa, ka na tʋmi li ka li kʋ lɛn yuugɛ.

33“Nannanna, Na'ab Faaro, gaŋim dau onɛ mɔr ya'am ka mi' dinɛ an sʋm, ka kɛ ka o gɔsid Egipt teŋgbauŋ wʋsa. 34Ka gaŋ ninsieba ka ba na di'esid diib nidib la san'an la'asid Egipt teŋin la wʋsa. Zin'is anu wʋsa pʋʋgin ba na di'e yinne, yʋma ayɔpɔi linɛ ka diib na bɛ bɛdegʋ la. 35Ba di'esim diib la yʋʋm sʋma banɛ kenna la wʋsa, ka tis suor ka ba su'a diib la tempʋʋdin la ka li bɛ fʋn nu'usin, Na'aba. 36Dikaŋa ye li dignɛ an teŋgbauŋ la bʋn. Ba na ti dii li nɛ yʋma ayɔpɔi linɛ na an kɔ'ɔm la saŋa Egipt teŋin la. Ala ka kɔ'ɔm kʋ san'am teŋgbauŋ la.”

Ban dʋ'ʋs Josef Egipt teŋin si'em

37Gban'akaŋa da an sʋm tis Faaro nɛ o na'ayikpɛm la. 38Faaro da bu'osi ba ye, “Ti na lɛn nyɛ sɔ' ka o nwɛnɛ dau kaŋa onɛ ka Wina'am Siig bɛɛ o nii?” 39Ani ka Faaro yɛl Josef ye, “Wina'am sadigim nie nɛ'ɛŋa pa'alif la, sɔ' kae na mɔr ya'am nɛ mi'ilim nwɛnɛ fʋnɛ. 40Fʋ na sʋ'oe m na'ayir la gɔsid, ka m nidib la wʋsa na di'e fʋ nɔɔr zin'ig wʋsa. M na'am gbauŋ la zug ma'aa ka m na gatif.” 41Ala ka Faaro yɛl Josef ye, “M zaŋ Egipt teŋgbauŋ wʋsa niŋi fʋ nu'usin.” 42#Dan 5:29 Ani ka Faaro pidig o nu'ubil baŋ dinɛ an o zanbin la pid Josef. O da bɔb o nɛ fupiel sʋma ka nɔk sanlim zɔnti kɔl o niŋgɔɔnr. 43O da nɔk na'am tɛreko kanɛ paas ayi' ka widi tɛɛd la tis o ye o mɔri ken, ka kɛ ka sɔ' gaad tuonnɛ tansid ye, “Iginimi teŋin!” Ala ka Faaro kɛ ka Josef sʋ'oe Egipt teŋgbauŋ wʋsa. 44Faaro da yɛl Josef ye, “Manɛ an Faaro, amaa ya'a ka' fʋn na tis nɔɔrɛ, sɔ' ka' suori niŋid si'el Egipt teŋin ya'asa.” 45Faaro da pʋd Josef yʋ'ʋr ye Zafenaf-Panea, ka nɔk Potifera, onɛ an Oon teŋin maanmaan la pu'ayua onɛ yʋ'ʋri buon Asenat n tis o ka o di.

46Josef da anɛ yʋma pistan' ka pin'il Egipt na'ab Faaro tʋʋma. O da yi Faaro san'anɛ gilig Egipt teŋ wʋsa. 47Yʋʋm sʋma ayɔpɔi la saŋa zʋʋd da maal sʋ'ʋŋa. 48Ka yʋma ayɔpɔi banɛ ka zʋʋd maal sʋ'ʋŋa Egipt teŋin la Josef da di'es zuudi su'a tempʋʋdin la. Tempʋʋg wʋsa o da su'ad zʋʋd dinɛ ka ba buni anina la. 49Josef da su'a ki ka li zu'oe hali nwɛnɛ atɛuk titanbin'isʋg nɛ. Li da zu'oe nɛ galis ka o bas ka pʋ lɛn sɔbid on di'esid si'em, bɔzugɔ, li da zu'oe nɛ galis ka ba kʋ nyaŋi makɛ.

50Kɔ'ɔm la yʋma da nam pʋ paae la, Josef pu'a Asenat onɛ saamme an Potifera ka an Oon teŋgban maan la da du'a Josef biribis ayi'. 51Josef da pʋd o bikpɛɛm la yʋ'ʋr ye Manase ka yɛl ye, “Wina'am kɛya ka m tami m namisʋg la wʋsa nɛ m saam yir yɛla.” 52Biribiŋ kanɛ paas ayi' la, o da pʋd o yʋ'ʋr ye Efiram,#41:52 Li gbin anɛ ‘Du'am’. ka o yɛl ye, “Wina'am kɛ ka m paam du'am, teŋ kanɛ ka m nyɛ namisʋg la ni.”

53Yʋma ayɔpɔi banɛ ka diib da bɛ la da paae li bɛn, 54ka yʋma ayɔpɔi dinɛ an kɔ'ɔm yʋma la pin'il wʋʋ Josef n yɛl si'em la. Kɔ'ɔm da lu tɛɛns wʋsa pʋʋgin, amaa Egipt teŋgbauŋ wʋsa da mɔr diib. 55Kɔ'ɔm la da ti ye li wʋm Egipt dim la, ba da kaasi tis Faaro ye o tisi ba diib, amaa ka o da yɛl Egipt dim wʋsa ye, “Kemi Josef san'an, ka tʋm on yɛli ya ye ya niŋ si'em wʋsa.” 56Kɔ'ɔm la da yadig teŋgbauŋ la wʋsa la, Josef da yɔ'ɔg diib dɔɔd la kuos diibi tis Egipt dim bɔzugɔ kɔ'ɔmtita'ar da lu Egipt teŋgbauŋ la wʋsa zug. 57Tɛɛns wʋsa nidib da kennɛ Egipt teŋin na da'ad diib Josef san'an bɔzugɔ kɔ'ɔmtita'ar la da lu nɛ dunia wʋsa.

Currently Selected:

Pin'ilʋg 41: kus_gh

Highlight

Copy

Compare