1 Johani 4

Mupepo o shemwa nou o mbango

1Ashimiwa ange, mwa tawa munu yomuhe o ku amba ci o di no Mupepo Oukenu. Unone mu wa ereke tango ku mona ci mupepo ou a di nao waa tunda kwa Nyambi, inene akwakukethza owangi o mbango a na yara mu kaye. 2Kenge dyodiyo nga mu dimuka ci Mupepo wa Nyambi: mupepo ouhe o ku pa ombangi ci Yesu Krisitu wa keyire muno mu kaye konu, oyo po o di no Mupepo o ku tunderera kwa Nyambi. 3Unone mupepo ouhe o kukana ku pa ombangi ci Yesu wa keyire muno mu kaye konu, oo mupepo kadi cingwa waa tunda kwa Nyambi. Oo po o mupepo wa Shifoto Krisitu ou mwa yuvire ci waa keya, pano honi na u kumu kare mu kaye.

4Anange awa na shima, amwe po mwaa tunda kwa Nyambi, karo na mu wa othzo, inene oyu di mu mwenu po mukuru kupita oyu di mu kaye. 5Awo po akwakaye, mweyo, a ambaura yo kaye, karo akwakaye aa teerera erongithsa yo. 6Uno honi atwe po twaa tunda kwa Nyambi. Yomuhe oyu na dimuka Nyambi aa tu teerera, karo yomuhe oyu na kana ku dimuka Nyambi tumba a tu teerera. Kenge dyo tu na dimukanga Mupepo o shemwa no mupepo o kwangera.

Mu cishime oandu

7Ashimiwa ange, tu cishimenu oandu, inene thsishimo po thsaa tunderera kwa Nyambi. Munu yomuhe o ku shima aenthzenthzi po naerekiwa ope, karo na dimuka Nyambi. 8Uno honi yomuhe o kukana ku shima muenthzenthzi, ka a dimukire Nyambi, inene Nyambi po thsishimo.

9Thsishimo thsa Nyambi ku kwetu po thsa monaharire kenge, wa tumine mu kaye Mwane pakamutwa ci tu wane mwoyo kenthzi.

10Ethsi thsodiyo thsishimo, kadi cingwa yatwe twa shimine Nyambi, unone yodiyo wa tu shimine, karo wa tumine Mwane ku nekara thsiyambero thso ku tetera evi yetu.

11Ashimiwa ange, pakuninga ci Nyambi wa tu shimine, natwe twaa roera ku cishima oandu. 12Kwithsa munu oyu wa mona Nyambi. Ngeci atwepo tu cishima oandu, Nyambi a ekarerera mu mwetu no thsishimo thsenthzi thsi na kwanenena mu mwetu.

13Kenge dyo tu na dimukanga ci mu mwenthzi tu di, naye mu mwetu a di, inene na a tu pa Mupepo wenthzi. 14Karo natwe na tu mono no ku pa ombangi ci Tata wa tumine Mwane ku nekara Muyoyithsi o kaye. 15Yomuhe o ku pa ombangi ci Yesu po Mwana Nyambi, Nyambi mu mwenthzi a di, naye mwa Nyambi a di. 16Karo tu na dimuka no ku tawa thsishimo ethsi a tu shima Nyambi.

Nyambi po thsishimo, karo yomuhe o kwikara mu thsishimo a ekarerera mwa Nyambi no Nyambi a ekarerera mu mwenthzi. 17Kenge dyodiyo thsi na kwanenenanga thsishimo mu mwetu ci twa kwikare nondume mu diyuwa dyo raturo, inene mwoyo wetu muno mu kaye waa cipitura nou wa Krisitu.

18Mu thsishimo kwithsa wowa, unone thsishimo thso kwononoka thsaa cithza wowa. Inene wowa waa enderera no humbithso, karo yomuhe o ku yapa, ka ononokithsiwire mu thsishimo. 19Tu di no thsishimo, inene Nyambi yodiyo wa tangire ku tu shima.

20Ngeci munu ayepo amba ci: “No mukwa ku shima Nyambi,” unone aa thzimba muenthzenthzi, oyo wa kwangera. Inene yomuhe o kukana ku shima muenthzenthzi oyu a mona, tumba a shimi Nyambi oyu a kana ku mona. 21Ethsi thsodiyo thsiraerera na tu piwa ku kwenthzi, yomuhe o ku shima Nyambi a roera ku shima no muenthzenthzi kengeyo.

Currently Selected:

1 Johani 4: mho

Highlight

Copy

Compare