YouVersion Logo
Search Icon

KUK 1

1
Yerusalem Kuk
1Gohlhain dius dyingh dah Yerusalem wus gas khasoeh nyang kyingh joq joq!
Gohlhain Mungkvn yah chungh zis xauh dah wus gvshih gas chauhmuh teh nghuot joq.
Yunghshop thank dah wus jens gas jonsdoeus loh goeus.
2Nyang dvnyens gonh ngaus las nyah bvlot mas nyoqdyeis yaus gyoh.
Nyang lyis nhaiqtaink das zis nyah dyenschangh cauh jens dvyuk eq ma nyet lo.
Nyang yah buisnoms kuot toh bang eq nyang lyis phanhlyen las gvshih dvnganh nyang lyis tyi loh goeus.
3Yuda dius jens gas mvshohjyen jons tsain nghuot, nyamoq lyis yhen mhayah tsoengh shwih loh.
Nyamoq gas nyamoq nyang zis oen lui das joqyos ma bos dah gohmau mas nyeis.
Jeswus jens yah tsain lhaink toh las phang luiq das cho ma bos.
4Gvshih gyingshang buisnyeis lyis
paiq das nyhenshang Yhenmuh mas hank eq ma los.
Houmha chunghthwe kat dah lonyi jens shanghsenh nyeis,
phudyei bang eq nos dvyoh kyingh lo.
Wus khomh jens gas vkom dvjoq las Zion ka loh thank shoq nos nyeis.
5Nyah jeswus jens nyang lyis ung loh; nyamoq dah yomsoq khau mha nyang lyis zwi toh.
Nyah yaunos nyoshoq gvng mas Yhensain ka nyang lyis nos nhang.
Nyah lo jens lyis nyhik las shwih jons loh.
6Yerusalem dah yunghshop nyings hoeuh cho ka lai loh goeus.
Nyah uhshe bang gas yuot shet las yomnhuk dah cvtzains teh nghuot.
Hauh cvt jens gas shoh khat bang masyah phang lha yom vluk thank goeus.
7Gvshih Yerusalem gas dyoq gyoh las mvshoh jyen nhaiqngis nyeis.
Nyang xikpheh yoh dah yunghshop cho dvnganh lyis soh nyeis.
Nyah dius jens lyis jeswus yah ung loh uhlyis pangh soeu ma bos yvlyis soh nyeis.
Nyah jeswus jens nyang dyoqbis yvlyis nyvng las tsain nyhap.
8Yerusalem gas gyukphoh yaunos kuot goeus las nyang ma lhoq ma shang.
Housoeh las nyang nyoqnho ngelang ma bos lo.
Nyang gas shohchen nghuot las xoqphuh goeus.
Nyang gas noskyingh las xoq zis yah nyah nyoqnho shung tyamp.
9Nyah ma lhoq cho dede dwvng laus eq
nyah uhpui loqkyoq lyis ma sen teh dvchixoeuq.
Nyang gyoh cho ka gyukphoh nghuot.
Nyang lyis nhaiq hank ma yoh taink lo.
Nyah jeswus jens nyang lyis ung goeus las nyang Yhensain lhyi Nhaiqnyen aq, ge ngaus.
10Jeswus gas nyah zisyos dvnganh lhuot loh.
Nyamoq gas Yhensain gohnyau bang lyis
ma wvng nhang dah Yhenmuh mas wvng loh yvlyis nyang nyvng.
11Nyah dius jens gas zo das zis dvja ja xo uhjyangh noskyingh.
Nyamoq gas nyamoq kang dwis das nyhenshang phauhdap zisyos yah zonoms thaiq.
Hauh wus gas, Yhensain eh, ngos lyis yoeuh dyei aq, ngos nhaiqngis yvlyis nyvng dyei aq, ge ngaus.
12Houchank suh lai loh bang yuk khanghmuh lyis, Ngos lyis yoeuh geh.
Houka Yhensain nhaiqyo uhlyis
ngah thoq mas she los dah
nos teh hank nos ku lah, ge kaiq ngaus.
13Nyang nyhang mhayah nyi khyoq las
hauh zis gas ngah vkhau mha ngeh loh.
Nyang ngos lyis lhyik thung lha nyeisjvng mas she khyoq.
Hauh thang lhyi nyang ngos lyis tyamp las
ngos lyis vjangh nos nhang toh.
14Nyang ngah yaunos dvnganh lyis comh las dvgeh twih dain zis yah
ngah lainzain mas lhangh dyei.
Ngos gas hauh yvwons vkhyei mas yomnhuk loh.
Yhensain ka ngos lyis ngah jeswus lyis kyauh las
ngos mvshohjyen ma yoh thoenk yap.
15Yhensain ka ngah jes thoeuqzoe jens dvnganh lyis yis.
Nyang ngah loyvm jens lyis mhont das zis jes dvphung nhang.
Nyang ngah dius jens lyis zvbiq nyhet zwvng mas zvbiq lyis teh gyik thyi tyamp.
16Housoeh yvmvyah ngah nyoqjeih mas nyoqdyeis shuon.
Ngos lyis nhaiq hank ma yoh taink.
Ngos lyis yom hank ma yoh dyei.
Jeswus jens ngos lyis ung loh las
ngah dius jens mas cha ma nyet lo.
17Ngos ngah loq yhonh kat laus eq ngos lyis hank ma pangh das.
Yhensain ka ngos lyis tyi lha shot khanghmuh masyah jeswus jens lyis khi toh.
Nyamoq ngos lyis ma lhoq dah vyhang lhyi teh tsain kuot.
18Ngos nyah domsyos ma gyo dah nyhenshang Yhensain kuot zis lyi jus.
Dius jens dvkhauyah bang eh, gyo geh, ngos nos cho lhyi yoeuh geh.
Ngah loloeu lonyi jens gas jonsdoeus loh goeus.
19Ngos ngah buisnoms kuot toh bang lyis lui laus eq nyamoq ngos lyis pangh das zis ngoek.
Phudyei bang yahge uhshe bang gas
nyamoq kang dwis das zis zonoms xo uhlyis wus talhoeu mha tsain shei.
20 Yhensain eh, ngos chiqjyen yvlyis yoeuh dyei aq. Ngah dyos shanghsenh nyeis.
Ngah yaunos gvng mas ngos kuk las nhaiqlom thank.
Wus talhoeu mha dius sat,
yhen khau mha yangh shei cho bos.
21Ngos noskyingh zis nyamoq xauhgyo laus eq ngos lyis nhaiqtaink das soeu hank ma bos.
Nvng ngah thoq mas she kat dah dyoqbis zainsmuh lyis ngah jeswus jens gas gaus.
Nvng ngah jeswus jens lyis ngos xauh teh xauh nhang das ge dangthoengh toh dah buisnyeis she kat aq.
22Nyamoq dah lhung cho dvnganh xiklyis dang thang thyet aq.
Nvng ngah yaunos gvng mas ngos lyis joeng teh nyamoq lyis joeng aq.
Ngos gas nhaiqngis zis yah noskyingh las ngah nhaiqlom mas nos nyeis.

Currently Selected:

KUK 1: NCB

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy