HOSEA 1
1
1Ndika olyo elaka ndyoka Omuwa e li pe Hosea yaBeeri pomasiku gaakwaniilwa yaJuda Usia, Jotam, Ahas naHiskia nomanga Jeroboam yaJehoas a li omukwaniilwa gwaIsrael.
MukadhaHosea noyana
2Uuna Omuwa a popitha Israel muHosea, okwa ti: “Inda, wu ka hokane; mukadhoye ota ka kala kee shi kwiinekelwa naanona yoye otaa ka kala ye mu fa. Osho ngaaka aantu yandje oya thigi ndje po nokaye shi kwiinekelwa.”
3Hosea okwa hokana omukulukadhi edhina lye Gomer yaDiblajim. Nguka okwe mu valele osheeli shomumati. 4Omuwa okwa ti kuHosea: “Mu luka Jesreel, oshoka itapu piti ethimbo ele inaandi geela omukwaniilwa gwaIsrael molwomadhipago ngoka ga ningwa kuhekulu Jehu puJesreel. Otandi ka hulitha po ezimopangeli lyaJehu. 5Nopethimbo ndyoka otandi ka hanagula po omatangakwiita gaIsrael mesilu lyaJesreel.”
6Gomer okwa vala okanona okatiyali; haka oka li okakadhona. Omuwa okwa ti kuHosea: “Ka luka ‘Kiimuhole’, oshoka itandi kala we ndi hole oshigwana shaIsrael nenge oku shi dhimina po. 7Ihe oshigwana shaJuda otandi kala ndi shi hole. Ngame, Omuwa Kalunga kawo, otandi ya hupitha, ihe itandi shi ningi niita — negongamwele nenge nuutati nenge nuukambe naakawilinkambe.”
8Gomer sho a toyitha okakadhona ke, okwa ningi ishewe omusimba e ta vala okamati. 9Omuwa okwa ti kuHosea: “Ka luka ‘Kamushiyandje’, oshoka oshigwana shaIsrael kashi shi oshigwana shandje, nangame kandi shi Kalunga kawo.”
Israel tashi ka shituluka
10Oshigwana shaIsrael otashi ka fa evi lyokefuta, oshindji tashi nyenge okuyalulwa nenge okuudhikwa. Ngashingeyi Kalunga ota ti: “Kamu shi aantu yandje,” ihe esiku otali ke ya, uuna ta ka tya: “One aana yaKalunga omunamwenyo.” 11Oshigwana shaJuda noshigwana shaIsrael otayi ka hangana ishewe. Otaa ki ihogololela yo yene omuwiliki gumwe, nopolumwe otaa ki indjipala notaa ka kala ye na elago mevi lyawo. Eeno, esiku lyaJesreel otali ka kala esiku enene.
Currently Selected:
HOSEA 1: ONDB
Highlight
Share
Copy
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.